Related Post
ആലപ്പുഴ: പിഎംശ്രീ ധാരണാപത്രം ഒപ്പിട്ടതില്‍ ഇടഞ്ഞുനില്‍ക്കുന്ന സിപിഐയെ അനുനയിപ്പിക്കാനുള്ള മുഖ്യമന്ത്രിയുടെ ശ്രമം പാളി. സിപിഐ സംസ്ഥാന സെക്രട്ടറി ബിനോയ് വിശ്വവുമായി മുഖ്യമന്ത്രി പിണറായി വിജയന്‍ നടത്തിയ കൂടിക്കാഴ്ച ഫലം കണ്ടില്ല. ആലപ്പുഴയിലെ ഗസ്റ്റ് ഹൗസില്‍ ഒരു മണിക്കൂറോളം നീണ്ട ചര്‍ച്ചയിലും സിപിഐ നിലപാടില്‍ ഉറച്ചുനിന്നു. തങ്ങള്‍ ഉന്നയിച്ച പ്രശ്‌നങ്ങളില്‍ പരിഹാരമുണ്ടായിട്ടില്ലെന്ന് ബിനോയ് വിശ്വം കൂടിക്കാഴ്ചയ്ക്ക് ശേഷം പ്രതികരിച്ചു. അതിനാല്‍ പ്രശ്‌നങ്ങള്‍ ഇപ്പോഴും ബാക്കി കിടക്കുന്നു. സിപിഐ മന്ത്രിമാര്‍ മന്ത്രിസഭാ യോഗങ്ങള്‍ ബഹിഷ്‌കരിക്കുമോ എന്ന ചോദ്യത്തിന് പിന്നീട് അറിയിക്കാം എന്നായിരുന്നു അദ്ദേഹത്തിന്റെ മറുപടി. സിപിഐ സെക്രട്ടേറിയറ്റിനു പിന്നാലെ ആലപ്പുഴയില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം. അതേസമയം വൈകീട്ട് പുന്നപ്ര വയലാര്‍ രക്തസാക്ഷി അനുസ്മരണത്തില്‍ മുഖ്യമന്ത്രിയും ബിനോയ് വിശ്വവും വേദി പങ്കിടുന്നുണ്ട്.
