ഭോപ്പാല്‍: ഭാര്യയ്ക്ക് മുന്നില്‍വച്ച് ‘അങ്കിൾ’ എന്ന് വിളിച്ച കട ഉടമയെ കൂരമായി മര്‍ദിച്ച് ഭര്‍ത്താവും സുഹൃത്തുക്കളും. മധ്യപ്രദേശിലെ ഭോപ്പാലിലുള്ള ജട്ട്‌ഖേഡിയിലെ ഒരു തുണിക്കടയില്‍ ശനിയാഴ്ചയോടെയാണു സംഭവം. ഇവരുടെ ഗുരുതരമായി പരുക്കേറ്റ കടയുടമ നിലവില്‍ ആശുപത്രിയില്‍ ചികിത്സയിലാണ്. വിശാല്‍ ശാസ്ത്രി എന്നയാൾക്കാണ് മർദനത്തിൽ ഗുരുതര പരുക്കേറ്റത്. കടയിൽ സാരി വാങ്ങാൻ വന്ന രോഹിത് എന്നയാളും കൂട്ടുകാരും ചേര്‍ന്നാണ് വിശാലിനെ മര്‍ദ്ദിച്ചതെന്ന് പോലീസിനു നൽകിയ പരാതിയിൽ പറയുന്നു.
ഭാര്യയോടൊപ്പം സാരി വാങ്ങാനായി വസ്ത്രവ്യാപാര സ്ഥാപനത്തിൽ എത്തിയതായിരുന്നു രോഹിത്. സാരികൾ തെരഞ്ഞെടുക്കുന്നതിനിടെയാണ് സംഭവം. വിലകൂടിയ സാരികൾക്കു പകരം ആയിരം രൂപയിൽ താഴെയുള്ളവ നൽകാൻ രോഹിത് ആവശ്യപ്പെട്ടു. എന്നാൽ അങ്കിളെന്ന് അഭിസംബോധന ചെയ്തുകൊണ്ടാണ് കടയുടമ വിശാൽ ഇതിന് മറുപടി നൽകിയത്.
തുടർന്ന് കടയിൽ നിന്നിറങ്ങിപ്പോയ രോഹിത് കൂട്ടുകാരുമായെത്തി കടയുടമയെ ആക്രമിക്കുകയായിരുന്നു. വടി, ബൽറ്റ് എന്നിവയുപയോഗിച്ചാണ് ഇവർ വിശാലിനെ ക്രൂരമായി മർദിച്ചത്. ഇയാൾക്ക് ഗുരുതരമായി പരുക്കേറ്റിട്ടുണ്ട്. രോഹിത്തിനും കൂട്ടുകാര്‍ക്കുമെതിരേ പോലീസ് കേസ് രജിസ്റ്റര്‍ ചെയ്തിട്ടുണ്ട്.
Related Post
