കോതമംഗലം: കുട്ടമ്പുഴയില് പശുവിനെ തിരഞ്ഞ് കാട്ടിനുള്ളില് വഴിതെറ്റിപ്പോയ മൂന്ന് സ്ത്രീകൾ ഒരു രാത്രി കഴിച്ചു കൂട്ടിയത് പ്രാണനും കയ്യിൽ പിടിച്ചുകൊണ്ട്. ജീവനും മരണത്തിനുമിടയ്ക്കുള്ള ഒരു രാത്രി. പശുവിനെ തിരഞ്ഞ് കാട്ടിലെത്തിയവർ അകപ്പെട്ടത് ആനകളുടെ മുന്നിൽ. ചുറ്റും ആനകളെത്തിയതോടെ ചിതറിയോടിയവർ ആദ്യം ഒരു മരപ്പൊത്തില് അഭയം തേടി. എന്നാൽ അവിടേക്കും ആനകൾ പാഞ്ഞടുക്കുകയായിരുന്നു. അതോടെ നിന്നും വീണ്ടും ഓടി പാറക്കെട്ടിനടുത്ത് അഭയം തേടുകയായിരുന്നു.
ആനയ്ക്ക് പിടിക്കാന് കഴിയുന്നതിലും അകലെയായിരുന്നു പാറപ്പുറത്ത് ഇവർ ഇരുന്നത്. ആന പിടിക്കാന് വന്നാല് മാറാനുള്ള സൗകര്യം പാറയുടെ മുകളില് ഉണ്ടായിരുന്നു. രാത്രി രണ്ടുമണി വരെ ചുറ്റിലും ആന ഉണ്ടായിരുന്നു. അടുത്ത് ആളിരുന്നാലും കാണാന് കഴിയാത്തത്ര കൂരിരുട്ടിൽ രാത്രി ഉറങ്ങാതെ എഴുന്നേറ്റിരുന്ന് പ്രാർഥിക്കുകയായിരുന്നുവെന്നും അവർ മാധ്യമങ്ങളോടു പറഞ്ഞു. .
കാട്ടിൽ പോയവരെ കാണാതായതോടെ രാത്രിയില് വനത്തില് ഉച്ചത്തില് പേര് വിളിച്ച് തിരച്ചില് നടത്തുമ്പോള് മൂവരും തങ്ങള് വിളിക്കുന്നത് കേട്ടിരുന്നുവെന്ന് ദൗത്യസംഘം മാധ്യമങ്ങളോടു പറഞ്ഞു. എന്നാല് ആരാണെന്ന് തിരിച്ചറിയാന് കഴിയാത്തത് കൊണ്ട് മൂവരും തിരിച്ച് മറുപടി പറയാതെ മിണ്ടാതിരുന്നു. ഒപ്പം പുറത്ത് ആനകളുടെ ശബ്ദവും വന്നതോടെ സൗണ്ട് കേട്ട് ആനകളെത്തിയാലോയെന്ന പേടിയും. നാലുമണിക്കൂര് നേരമാണ് കാട്ടില് ദൗത്യസംഘത്തിടുത്തടുത്തായി മൂവരും ഉണ്ടായിരുന്നതെന്നും ദൗത്യസംഘം പറഞ്ഞു.
Related Post
വനാതിര്ത്തിയിൽ താമസിക്കുന്ന മായാ ജയന്, പാറുക്കുട്ടി, ഡാര്ലി എന്നിവരാണ് വ്യാഴാഴ്ച വൈകുന്നേരം കാട്ടിലകപ്പെട്ടത്. ഇവരിൽ മായയുടെ പശുവിനെ ബുധനാഴ്ച മുതല് കാണാതാവുകയായിരുന്നു. എന്നാൽ പശുവിനെ കണ്ടെത്തി മടങ്ങുന്നതിനിടെ ഇവര് ആനയുടെ മുന്നിലകപ്പെട്ട് പേടിച്ച് ചിതറിയോടിയതായി മായ ഭര്ത്താവിനെ മൊബൈല് ഫോണില് വിളിച്ച് അറിയിച്ചിരുന്നു. എന്നാല് പിന്നീട് ഇവരെ ബന്ധപ്പെടാൻ കഴിഞ്ഞില്ല.
ഇരുട്ടു വീണതോടെ രാത്രി തിരച്ചിൽ അവസാനിപ്പിച്ചിരുന്നു. നേരം വെളുത്തതോടെ തിരച്ചിലിന് കൂടുതൽ സംഘത്തെ നിയോഗിക്കുകയായിരുന്നു. വനം വകുപ്പ് ജീവനക്കാർ, ഫയർ ഫോഴ്സ്, നാട്ടുകാർ, വനം വാച്ചർമാർ എന്നിവരാണ് തെരച്ചിൽ സംഘത്തിലുണ്ടായിരുന്നത്. ഇതിനിടെ പശു തിരിച്ചെത്തിയതോടെയാണ് ആശങ്കയിലായ വീട്ടുകാര് വീണ്ടും തിരച്ചിലിനിറങ്ങിയത്. മണിക്കൂറുകള് നീണ്ട തിരച്ചിലിന് ഒടുവില് മായയുടെ മകന് ഉള്പ്പെടുന്ന സംഘം കുട്ടമ്പുഴ വനത്തിനകത്ത് ആറു കിലോമീറ്റര് അകലെ അറക്കമുത്തി എന്ന സ്ഥലത്ത് നിന്ന് ഇവരെ കണ്ടെത്തുകയായിരുന്നു.
