കൊച്ചി: മിനി സ്ക്രീനിലൂടെയെത്തി മലയാള സിനിമയിൽ ഒരു പിടി നല്ല കഥാപാത്രങ്ങൾ നൽകിയ നടനാണ് സുരേഷ് കൃഷ്ണ. രണ്ട് പതിറ്റാണ്ടിലേറെയായി മലയാള സിനിമയിൽ സുരേഷ് കൃഷ്ണയുണ്ട്. കരിയറിന്റെ ഭൂരിഭാഗവും വില്ലൻ വേഷങ്ങളാണ് ചെയ്തതെങ്കിലും പതിയെ കോമഡിയിലും ക്യാരക്ടർ റോളിലുമെല്ലാം താരം കൈയ്യടി നേടിക്കഴിഞ്ഞു. ഇന്ന് സോഷ്യൽ മീഡിയയിലെ കൺവിൻസിംഗ് സ്റ്റാർ എന്നാണു സുരേഷ് കൃഷ്ണ അറിയപ്പെടുന്നതു തന്നെ.
സുരേഷ് കൃഷ്ണ അഭിനയിച്ച തമിഴ് ചിത്രമാണ് പൊട്ട് അമ്മൻ. ഈ ചിത്രത്തിലെ സുരേഷ് കൃഷ്ണയുടെ വേഷപ്പകർച്ച പലപ്പോഴും ചർച്ചയായി മാറിയിട്ടുണ്ട്. കണ്ടാൽ മനസിലാകാത്ത രൂപത്തിലേക്കുള്ള ആ മാറ്റത്തിന് പിന്നിൽ പക്ഷെ ഒരുപാട് വേദനകൾ ഉണ്ടെന്നു സുരേഷ് കൃഷ്ണ പറയുന്നു. ജിഞ്ചർ മീഡിയ എന്റർടെയ്ൻമെന്റ് യൂട്യൂബ് ചാനലിന് നൽകിയ അഭിമുഖത്തിൽ അതേക്കുറിച്ച് സംസാരിക്കുന്നുണ്ട് സുരേഷ് കൃഷ്ണ.
‘പൊട്ടു അമ്മൻ സിനിമയിൽ മേക്കപ്പ്മാൻ ചെയ്ത സാധനം ഒട്ടും ശരിയാകുന്നില്ല. അരമണിക്കൂർ പോലും നിൽക്കുന്നില്ല. സ്‌പ്രെഡ് ആയി പോവുകയാണ്. എന്റെ മനസിൽ തോന്നിയൊരു ഐഡിയ ഞാൻ സംവിധായകനോട് പറഞ്ഞപ്പോൾ നോക്കാം എന്ന് അദ്ദേഹം പറഞ്ഞു. ടിഷ്യൂ പേപ്പർ അമ്പിളി അമ്മാവന്റെ ഷേപ്പിൽ കട്ട് ചെയ്യും. സ്പിരിറ്റ് ഗം കണ്ണിന്റെ താഴെ ഭാഗത്തായി തേക്കും. അതിന് മേലെ ആ പേപ്പർ ഒട്ടിക്കും. വീണ്ടും മുകളിൽ ഗം തേക്കും. അത് ചുരുക്കി പിടിച്ച് ഡ്രൈ ആക്കും. പിന്നെ സ്റ്റിക് ഇട്ട് മാച്ച് ചെയ്തു. ഭയങ്കര ലുക്ക് കിട്ടി. പക്ഷെ ചെയ്ത ഏറ്റവും വലിയ മണ്ടത്തരമായിരുന്നു അത്” സുരേഷ് കൃഷ്ണ പറയുന്നു.
Related Post
”എട്ട്-പത്ത് ദിവസം കഴിഞ്ഞപ്പോഴേക്കും കണ്ണിന് താഴെ പൊട്ടി, പഴുത്ത് ലിക്വിഡ് വരാൻ തുടങ്ങി. ഡോക്ടറെ കാണിച്ചു. അന്ന് തന്നെ ആർക്കും അറിയില്ല. അതിനാൽ എന്താണ് ചെയ്യുന്നതെന്ന് ഡോക്ടർ ചോദിച്ചു. നടനാണ്, മേക്കപ്പിൽ ചെറുതായൊരു പണി കിട്ടിയതാണെന്ന് ഞാൻ പറഞ്ഞു. അയാൾ പിന്നെ എന്നെ തെറിയോട് തെറിയായിരുന്നു. ഒരു നടന് ഏറ്റവും പ്രധാനപ്പെട്ടതാണ് കണ്ണ്. അത് നശിപ്പിക്കരുതെന്ന് ഉപദേശിച്ചു. പക്ഷെ എന്ത് ചെയ്യാനാകും. കണ്ടിന്യുവിറ്റി ആയിപ്പോയി. അതിന് ശേഷം അഞ്ചാറുമാസം ഈ സിനിമയുടെ ഷൂട്ടുണ്ടായിരുന്നു. ഒന്ന് ഉണങ്ങി വരുമ്പോഴേക്കും വീണ്ടും മേക്കപ്പിടും” എന്നും സുരേഷ് കൃഷ്ണ പറയുന്നു.
അതേസമയം സുരേഷ് കൃഷ്ണയുടെ ആദ്യ തമിഴ് ചിത്രമാണ് പൊട്ടു അമ്മൻ. അദ്ദേഹത്തിന്റെ ആദ്യ സിനിമയും ഇത് തന്നെയാണ്. പിന്നീടാണ് കരുമാടിക്കുട്ടനിലൂടെ മലയാളത്തിലെത്തുന്നത്. മരണമാസ് ആണ് സുരേഷ് കൃഷ്ണുടേതായി ഒടുവിൽ പുറത്തിറങ്ങിയ സിനിമ. ഫ്ളാസ്ക്, രവീന്ദാ നീ എവിടെ? എന്നിവയാണ് തീയറ്ററിലെത്താനുള്ള അടുത്ത സിനിമകൾ.
