മുംബൈ: മഹാരാഷ്ട്രയിലെ പൻവേലിൽ മൂന്ന് ദിവസം മാത്രം പ്രായമുള്ള പെൺകുഞ്ഞിനെ മാതാപിതാക്കൾ റോഡരികിൽ ഉപേക്ഷിച്ച നിലയിൽ, ഒപ്പം ഒരു കുറിപ്പും കണ്ടെത്തി. ‘റിയലി സോറി, സാമ്പത്തിക പരാധീനത മൂലമാണ് കുഞ്ഞിനെ ഉപേക്ഷിക്കുന്നത്. ഞങ്ങളോട് ക്ഷമിക്കണം.’ എന്നായിരുന്നു കുഞ്ഞിനെ കിടത്തിയ ബാസ്ക്കറ്റിലുണ്ടായിരുന്ന കുറിപ്പിലെ വാചകം.
പൻവേലിലെ ടാക്ക കോളനിയിലെ റോഡരികിൽ ഉപേക്ഷിച്ചനിലയിൽ കുഞ്ഞിനെ കണ്ടെത്തിയതിനെ തുടർന്നു പ്രദേശവാസി പോലീസിനെ അറിയിക്കുകയായിരുന്നു. പോലീസെത്തി കുഞ്ഞിനെ ഏറ്റെടുത്തു. കുഞ്ഞിനെ വളർത്താനുള്ള സാമ്പത്തികാവസ്ഥയില്ലെന്നുള്ള മാതാപിതാക്കളുടെ ഇംഗ്ലീഷിലെഴുതിയ കുറിപ്പ് ലഭിച്ചതായി പോലീസുദ്യോഗസ്ഥൻ അറിയിച്ചു. തങ്ങൾക്കു ഇതല്ലാതെ മറ്റ് മാർഗമില്ലെന്നും ‘സോറി’ എന്നും കത്തിൽ കുറിച്ചിരുന്നതായും ഉദ്യോഗസ്ഥൻ പറഞ്ഞു.
അതേസമയം കുഞ്ഞിനെ ഉടനെ ശിശുരോഗവിദഗ്ധനെ കൊണ്ട് പരിശോധിപ്പിച്ചു. ആരോഗ്യപ്രശ്‌നങ്ങളൊന്നുമില്ല. കുഞ്ഞിന്റെ മാതാപിതാക്കളെ കണ്ടെത്താനുള്ള അന്വേഷണം ആരംഭിച്ചതായും ഭാരതീയ ന്യായ സംഹിതയുടെ അനുബന്ധവകുപ്പുകൾ പ്രകാരം കേസ് രജിസ്റ്റർ ചെയ്തതായും പോലീസ് അറിയിച്ചു. ഇതിനിടെ പർദയണിഞ്ഞ ഒരു വ്യക്തി കുഞ്ഞിനെ കിടത്തിയ ബാസ്കറ്റുമായി നീങ്ങുന്നതും ബാസ്കറ്റ് ഉപേക്ഷിക്കുന്നതുമായും സിസിടിവിയിൽ കണ്ടെത്തിയിട്ടുണ്ട്.
Related Post
