ടെഹ്‌റാൻ: എതിരാളികൾക്ക് വൻ വെല്ലുവിളി സൃഷ്ടിക്കാൻ കഴിയുന്ന, അത്യാധുനിക മിസൈലുകളും ഡ്രോണുകളും ഉൾപ്പെടെയുള്ള വമ്പൻ യുദ്ധസന്നാഹങ്ങളുമായി ഭൂഗർഭ നഗരങ്ങൾ ഇറാൻ നിർമിച്ചതായി റിപ്പോർട്ട്. പേർഷ്യൻ ഉൾക്കടലിനും ഒമാൻ സമുദ്രത്തിനും ഇടയിലാണു വൻ ആയുധ സജ്ജീകരണങ്ങൾ ഒരുങ്ങുന്നത്. ഇറാൻ വിപ്ലവ ഗാർഡ്(ഐആർജിസി) പബ്ലിക് റിലേഷൻസ് വിഭാഗം മേധാവി ബ്രിഗേഡിയർ ജനറൽ അലി മുഹമ്മദ് നൈനിയാണു പദ്ധതിയുടെ പ്രഖ്യാപനം നടത്തിയതെന്ന് ഇറാൻ മാധ്യമമായ ‘പ്രസ് ടിവി’ റിപ്പോർട്ട് ചെയ്തു.
പുതിയ സൈനിക സന്നാഹങ്ങൾ ഇറാൻ ഇപ്പോൾ വെളിപ്പെടുത്താനുണ്ടായ സാഹചര്യം ഇസ്രായേലിന്റെയും അമേരിക്കയുടെയും ഭാഗത്തുനിന്ന് ആക്രമണഭീഷണി നിലനിൽക്കുന്നതാണ്. കഴിഞ്ഞ ശനിയാഴ്ച ഇറാന്റെ പടിഞ്ഞാറൻ പ്രവിശ്യയിൽ ആരംഭിച്ച ‘പയ്ഗമ്പറേ അഅ്‌സം’ എന്ന പേരിലുള്ള വിപുലമായ സൈനികാഭ്യാസത്തിനിടയിലാണ് ആയുധശേഖരമായി നിർമിച്ച രണ്ട് ഭൂഗർഭനഗരങ്ങൾ അവതരിപ്പിക്കാനിരിക്കുന്നത്. ഐആർജിസിയുടെ എയറോസ്‌പേസ് ഫോഴ്‌സിനാണ് നഗരത്തിന്റെ മേൽനോട്ട ചുമതല. അത്യാധുനികമായ മിസൈലുകളും ആയുധങ്ങളുമാണ് ഇവിടെയുണ്ടാകുക. ഇതോടൊപ്പം ഒരു നാവികതാവളവും ഇറാൻ പുതുതായി നിർമിച്ചിട്ടുണ്ട്.
വിപ്ലവ ഗാർഡ് കൂടുതൽ സങ്കീർണവും ദീർഘവുമായ പോരാട്ടത്തിന് സജ്ജമാണെന്ന് ബ്രിഗേഡിയർ അലി മുഹമ്മദ് നൈനി വാർത്താസമ്മേളനത്തിൽ വ്യക്തമാക്കി. ഇസ്രായേലിനെ ആക്രമിക്കാനുള്ള ഉത്തരവ് വരാൻ കാത്തിരിക്കുകയാണു സൈന്യം. രൂപകൽപനയിലും ശേഷിയിലും വലിപ്പത്തിലും ആയുധങ്ങളുടെ കരുത്തും ഉൽപാദനവും ദിനംപ്രതി വർധിച്ചുകൊണ്ടിരിക്കുകയാണ്. പുതിയ ആയുധശേഷികളും ഞങ്ങൾ സ്വന്തമാക്കിയിട്ടുണ്ട്. ഒരു യുദ്ധത്തിലും ശത്രുക്കൾക്ക് മേൽക്കൈ നേടാനാകില്ല. ഇറാൻ ഒരിക്കൽ പോലും ശത്രുവിന്റെ ഭാഗത്തുനിന്ന് ഇന്റലിജൻസ് തലത്തിലുള്ള തിരിച്ചടി നേരിട്ടിട്ടില്ല. ഇറാൻ വിപ്ലവ ഗാർഡിൽനിന്ന് നേരിട്ട സൈനിക-ഇന്റലിജൻസ് പരാജയങ്ങൾ മറയ്ക്കാൻ വേണ്ടി ശത്രുക്കൾ പുതിയ വ്യാഖ്യാനങ്ങൾ ചമയ്ക്കുകയാണെന്നും ബ്രിഗേഡിയർ അലി മുഹമ്മദ് ചൂണ്ടിക്കാട്ടി.
തെറ്റിദ്ധാരണയിലേക്കാണ് പശ്ചിമേഷ്യയിലെ പുതിയ സംഭവവികാസങ്ങൾ ഇസ്രായേൽ ഭരണകൂടത്തെ നയിച്ചിരിക്കുന്നതെന്നും സിറിയയിലെ രാഷ്ട്രീയ മാറ്റത്തെ സൂചിപ്പിച്ച് അദ്ദേഹം പറഞ്ഞു. ഏതു നിമിഷവും ഞങ്ങൾ ആക്രമണത്തിന് ഒരുക്കവും സജ്ജവുമാണെന്നാണു ശത്രുക്കളെ അറിയിക്കാനുള്ളത്. മടിച്ചുനിൽക്കുകയോ തീരുമാനം മാറ്റുകയോ ഒന്നും ചെയ്തിട്ടില്ല. ഉത്തരവ് വരുന്ന മുറയ്ക്ക് ഞങ്ങളുടെ കരുത്ത് പ്രദർശിപ്പിക്കാനിരിക്കുകയാണ്. ശത്രുവിന്റെ കണക്കുകൂട്ടലുകളും ധാരണകളും ഞങ്ങൾ മാറ്റിക്കൊടുക്കും. ഇറാൻ ഒരൊറ്റ ദിവസം പോലും മിസൈൽ നിർമാണം നിർത്തിയിട്ടില്ല. രാജ്യത്തെ മിസൈൽ പ്രതിരോധ സംവിധാനം പൂർണമായി പ്രവർത്തനസജ്ജമാണെന്നും ഐആർജിസി പബ്ലിക് റിലേഷൻസ് തലവൻ അറിയിച്ചു.
അധിനിവിഷ്ട പ്രദേശങ്ങളിലെ ആകാശം ഇറാൻ സൈന്യത്തിനു മുന്നിൽ തുറന്നുകിടക്കുകയാണെന്ന് സയണിസ്റ്റ് സൈന്യത്തിന് നല്ല തിരിച്ചറിവുണ്ടെന്ന് വാർത്താസമ്മേളനത്തിൽ സംബന്ധിച്ച ഐആർജിസി കമാൻഡർ മേജർ ജനറൽ ഹുസൈൻ സലാമി പറഞ്ഞു. കൂടുതൽ വേഗത്തിലും കൃത്യതയോടെയും ശക്തമായും ഇസ്രായേൽ സ്വത്തുക്കൾ ആക്രമിക്കാൻ സൈന്യത്തിനാകുമെന്നും അദ്ദേഹം മുന്നറിയിപ്പ് നൽകി.
ഇറാനിലെ തന്ത്രപ്രധാനമായ സ്ഥലങ്ങളിൽ വ്യോമപ്രതിരോധ സംവിധാനങ്ങൾ സ്ഥാപിച്ചതായും പ്രഖ്യാപനം വന്നിട്ടുണ്ട്. വ്യോമസേനയുടെ ഭാഗമായ ഖത്താം അൽഅമ്പിയ എയർ ഡിഫൻസ് ബേസിലെ കമാൻഡർ ബ്രിഗേഡിയർ ജനറൽ ഖാദിർ റഹീംസാദയാണ് ഇക്കാര്യം അറിയിച്ചത്. ഇത് എവിടെയൊക്കെയാണെന്ന് വെളിപ്പെടുത്തില്ലെന്ന് അദ്ദേഹം പറഞ്ഞു. അടുത്ത സൈനികാഭ്യാസങ്ങളിൽ പുതിയ സജ്ജീകരണങ്ങൾ പരീക്ഷിക്കുമെന്നും ഖാദിർ റഹീംസാദ അറിയിച്ചു.
അതിനിടെ, പേർഷ്യൻ ഉൾക്കടലിൽ ഇറാൻ നാവികസേന യുദ്ധപരിശീലനവും നടത്തുന്നുണ്ട്. 300 യുദ്ധക്കപ്പലുകളാണ് അഭ്യാസത്തിൽ പങ്കെടുക്കുന്നത്. 2,000ത്തിലേറെ വരുന്ന സൈനിക-സിവിലിയൻ കപ്പലുകൾ ഭാഗമാകുന്ന നാവിക പരേഡും ഇതിന്റെ ഭാഗമായി നടക്കും. വിപ്ലവ ഗാർഡിനു കീഴിലുള്ള അർധസൈനിക വിഭാഗമായ ബാസിസ് സേനയിലെ 1,10,000ത്തോളം അംഗങ്ങൾ പങ്കെടുക്കുന്ന സൈനികാഭ്യാസവും ഉടൻ തെഹ്‌റാനിൽ നടക്കുമെന്ന് ഐആർജിസി അറിയിച്ചിട്ടുണ്ട്.
