ന്യൂഡൽഹി: വികാസ്പുരിയിലെ മാലിന്യക്കൂമ്പാരത്തിൽ നിന്നെത്തിച്ച ഒരു ലോഡ് മാലിന്യം ഫിറോസ് ഷാ റോഡിലെ അരവിന്ദ് കേജ്രിവാളിന്റെ വീടിനു മുൻപിൽ കൊണ്ടിറക്കി എഎപി രാജ്യസഭാ എംപിയുട പ്രതിഷേധം. കേജ്രിവാളിന്റെ കട്ടൗട്ട് മുൻപിൽ പതിപ്പിച്ചായിരുന്നു എഎപിയുമായി ഇടഞ്ഞു നിൽക്കുന്ന രാജ്യസഭ എംപി സ്വാതി മലിവാളിന്റെ പ്രതിഷേധം . സംഭവത്തിൽ എംപിക്കെതിരെ പോലീസ് കേസെടുത്തു.
‘വികാസ്പുരിയിൽ അനധികൃതമായി മാലിന്യ നിക്ഷേപം നടക്കുന്നതിനെതിരെ പ്രദേശവാസികൾ പലതവണ പരാതി നൽകിയിട്ടും നടപടിയുണ്ടായിട്ടില്ല. വനിതകൾ നടത്തുന്ന ശുചീകരണ പ്രവർത്തനത്തിൽ പങ്കെടുക്കാനാണ് അവിടെയെത്തിയത്. കേജ്‌രിവാൾ ജനങ്ങൾക്കു നൽകിയ ഈ സമ്മാനം എന്തു ചെയ്യണമെന്ന് അദ്ദേഹത്തോട് തന്നെ ചോദിക്കാനാണ് ഇതുമായി ഇവിടെയെത്തിയത്’ – ട്രക്കിൽനിന്ന് കേജ്രിവാളിന്റെ വീടിനു മുന്നിൽ മാലിന്യമിറക്കുന്നതിനിടെ മലിവാൾ പറഞ്ഞു.
‘ഡൽഹിയുടെ മുക്കം മൂലയും മാലിന്യം കൊണ്ടു നിറഞ്ഞു. റോഡുകൾ പൊട്ടിത്തകർന്നു. കാനകൾ നിറഞ്ഞൊഴുകി ദുർഗന്ധം പരത്തുന്നു. കേജ്‌രിവാൾ ജനങ്ങളിൽ നിന്നകന്നു. ജനങ്ങൾക്കിടയിൽ എന്താണ് നടക്കുന്നതെന്നോ അവർ നേരിടുന്ന പ്രശ്നങ്ങളെന്താണെന്നോ കേജ്‌രിവാൾ അറിയുന്നില്ല. കേജ്രിവാളിന്റെ ഗുണ്ടകളെയോ പോലീസിനെയോ എനിക്കു ഭയമില്ല’. ‘ എന്റെ പ്രതിഷേധം പാർട്ടിക്കെതിരെയല്ല, ഡൽഹിയുടെ ഇപ്പോഴത്തെ അവസ്ഥ വളരെ മോശമാണ്. അതിനെതിരെയാണ് ഞാൻ പ്രതിഷേധിക്കുന്നത്. എംപി കൂട്ടിച്ചേർത്തു.
പ്രതിഷേധം അതിരുകടക്കുന്നു എന്നു കണ്ടതോടെ പോലീസ് ഇടപെട്ടു. ആദ്യം മലിവാളിനെ സ്ഥലത്തുനിന്നു നീക്കി. പിന്നാലെ അണികളെയും അകറ്റി. പൊതുസ്ഥലത്ത് മാലിന്യം നിക്ഷേപിച്ചതിനും ഗതാഗതം തടസപ്പെടുത്തിയതിനും മലിവാളിനെതിരെ പോലീസ് കേസെടുത്തു. തുടർന്ന് പോലീസ് കസ്റ്റഡിയിലെടുത്ത സ്വാതിയെ വിട്ടയച്ചു. ഒട്ടേറെ വനിതകളും മലിവാളിനെ അനുഗമിച്ചു.
