“എന്റെ വാക്കുകൾ ഓർത്തുവെച്ചോളൂ, അടുത്ത മൂന്ന് തിരഞ്ഞെടുപ്പുകളിലും ഡൽഹിയിൽ നിങ്ങളുടെ അക്കൗണ്ട് തുറക്കാൻ പോകുന്നില്ല’’ പ്രധാനമന്ത്രിയാകാനാണ് ആഗ്രഹമെങ്കിൽ ജീവിതകാലം മുഴുവൻ ‘മോക്ക് പാർലമെന്റിൽ’ തുടർന്ന് ആശ തീർത്തോളു…ഇന്ന് ഈ ദിനം രാഹുൽ തിരഞ്ഞെടുത്തത് സിഖ് കലാപ ഇരകളുടെ മുറിവുകളിൽ ഉപ്പുതേക്കുന്നതിന് തുല്യം- അമിത് ഷാ

ന്യൂഡൽഹി: 1984ലെ സിഖ് വിരുദ്ധ കലാപത്തിന്റെ വാർഷികദിനമായ നവംബർ ഒന്നിന് ഡൽഹിയിലെ രാംലീല മൈതാനത്ത് ഇന്ത്യാ സഖ്യം റാലി സംഘടിപ്പിച്ചതിനെച്ചൊല്ലി കോൺഗ്രസിനും ലോക്‌സഭയിലെ പ്രതിപക്ഷ നേതാവ് രാഹുൽ ഗാന്ധിക്കുമെതിരെ രൂക്ഷ വിമർശനവുമായി കേന്ദ്ര ആഭ്യന്തരമന്ത്രി അമിത് ഷാ. കലാപത്തിന്റെ ഇരകളുടെ മുറിവുകളിൽ ഉപ്പുതേക്കാനാണ് രാഹുൽ ഗാന്ധി ഈ ദിവസം തന്നെ പ്രതിഷേധ റാലിക്കായി തിരഞ്ഞെടുത്തതെന്ന് അദ്ദേഹം ആരോപിച്ചു. ബിജെപി ദേശീയ അധ്യക്ഷൻ നിതിൻ നബിനും കോൺഗ്രസിനെതിരെ വിമർശനവുമായി രംഗത്തെത്തി.

ചണ്ഡീഗഢിൽ വിവിധ വികസന പദ്ധതികൾക്ക് തുടക്കം കുറിച്ചശേഷം സംസാരിക്കുകയായിരുന്നു അമിത് ഷാ. 1984ലെ കലാപത്തെക്കുറിച്ചും അന്നത്തെ പ്രധാനമന്ത്രി രാജീവ് ഗാന്ധിയുടെ പ്രസ്താവനയെക്കുറിച്ചും പരാമർശിച്ച അദ്ദേഹം, ചരിത്രപരമായ പ്രാധാന്യമുള്ള ദിവസം തന്നെ റാലി നടത്താൻ കോൺഗ്രസ് തീരുമാനിച്ചതിനെ ചോദ്യം ചെയ്തു.

ഇന്ദിരാഗാന്ധിയുടെ വധത്തെത്തുടർന്നുണ്ടായ സിഖ് വിരുദ്ധ കലാപകാലത്ത് രാജീവ് ഗാന്ധി നടത്തിയ പ്രസ്താവനയെ ഓർമിപ്പിച്ചായിരുന്നു അമിത് ഷായുടെ വിമർശനം. ‘‘1984ൽ ഒരു വലിയ മരം വീഴുമ്പോൾ ഭൂമി കുലുങ്ങുമെന്നായിരുന്നു രാജീവ് ഗാന്ധി പറഞ്ഞത്. ഇന്ന് അദ്ദേഹത്തിന്റെ മകൻ രാഹുൽ ഗാന്ധി അതേ ദിവസം തന്നെ ഡൽഹിയിൽ വലിയൊരു റാലി സംഘടിപ്പിച്ചിരിക്കുകയാണ്. കലാപത്തിന്റെ ഇരകളുടെ മുറിവുകളിൽ ഉപ്പുതേക്കുന്നതിന് തുല്യമാണിത്’’ എന്ന് അമിത് ഷാ പറഞ്ഞു.

ഹരിയാനയിലെ റോഹ്തക്കിൽ നടന്ന ‘ലോക്തന്ത്ര ബചാവോ, അരാജകത ഹടാവോ പദയാത്ര’യിൽ സംസാരിക്കവെയാണ് ബിജെപി ദേശീയ അധ്യക്ഷൻ നിതിൻ നബിനും കോൺഗ്രസിനെതിരെ രംഗത്തെത്തിയത്. 1984ലെ സിഖ് വിരുദ്ധ കലാപത്തിൽ സിഖ് സമൂഹത്തിനെതിരെ നടന്ന അതിക്രമങ്ങൾക്ക് കോൺഗ്രസ് മാപ്പുപറയുകയും പ്രായശ്ചിത്തം ചെയ്യുകയും ചെയ്യേണ്ടതായിരുന്നുവെന്ന് അദ്ദേഹം പറഞ്ഞു. എന്നാൽ, അതിന് പകരം പാർട്ടി പ്രതിഷേധവുമായി രംഗത്തെത്തിയിരിക്കുകയാണെന്ന് നബിൻ വിമർശിച്ചു.

തിരഞ്ഞെടുപ്പുകളിൽ വിജയിക്കാത്തതിലുള്ള നിരാശയും നിരാശാബോധവുമാണ് കോൺഗ്രസിനെ ഭരണഘടനാ സ്ഥാപനങ്ങളെ കുറ്റപ്പെടുത്താൻ പ്രേരിപ്പിക്കുന്നതെന്നും അദ്ദേഹം ആരോപിച്ചു. രാഹുൽ ഗാന്ധിയെ കേന്ദ്രീകരിച്ചുള്ള ‘രാജവാഴ്ച’ അവസാനിപ്പിച്ചശേഷം സ്വന്തം പാർട്ടിക്കുള്ളിൽ ജനാധിപത്യം സ്ഥാപിക്കാൻ കോൺഗ്രസ് നേതാക്കൾ തയ്യാറാകണമെന്നും നബിൻ പരിഹസിച്ചു

രാംലീല മൈതാനത്തെ റാലിയുടെ തീയതി സംബന്ധിച്ച് ബിജെപി നേരത്തേ തന്നെ കോൺഗ്രസിനോട് എതിർപ്പ് അറിയിച്ചിരുന്നുവെന്ന് അമിത് ഷാ പറഞ്ഞു. നവംബർ ഒന്നിന്റെ ചരിത്രപ്രാധാന്യം രാഹുൽ ഗാന്ധിക്ക് അറിയില്ലായിരിക്കാമെന്നാണ് ആദ്യം കരുതിയതെന്നും 1984ലെ കലാപം നടക്കുമ്പോൾ അദ്ദേഹത്തിന് പ്രായം കുറവായിരുന്നുവെന്നും ചരിത്രത്തിൽ താൽപര്യം കുറവാണെന്നും അമിത് ഷാ പരിഹസിച്ചു. എന്നാൽ, തീയതി മാറ്റണമെന്ന് ആവശ്യപ്പെട്ടിട്ടും കോൺഗ്രസ് അതിന് തയ്യാറായില്ലെന്ന് അദ്ദേഹം ആരോപിച്ചു.

സിഖ് സമൂഹത്തിന്റെ വികാരങ്ങൾ പരിഗണിച്ച് നവംബർ ഒന്ന്, രണ്ട്, മൂന്ന് തീയതികളിൽ റാലി നടത്തരുതെന്ന് ബിജെപി പരസ്യമായി ആവശ്യപ്പെട്ടിരുന്നതായും അമിത് ഷാ പറഞ്ഞു. 1984ലെ കലാപത്തിൽ ആയിരക്കണക്കിന് സിഖുകാരെ ജീവനോടെ ചുട്ടുകൊന്നുവെന്നും നിരവധി പേർക്ക് വീടുകൾ ഉപേക്ഷിച്ച് പോകേണ്ടിവന്നുവെന്നും അദ്ദേഹം ആരോപിച്ചു. കുട്ടികൾക്ക് മാതാപിതാക്കളെ നഷ്ടപ്പെടുകയും സ്ത്രീകൾ വിധവകളാകുകയും വീടുകൾ കത്തിക്കപ്പെടുകയും ചെയ്തുവെന്നും അദ്ദേഹം കൂട്ടിച്ചേർത്തു.

രാജ്യവും പഞ്ചാബും ആ അക്രമസംഭവങ്ങൾ ഒരിക്കലും മറക്കില്ലെന്നും അമിത് ഷാ പറഞ്ഞു. കോൺഗ്രസിന്റെ ചരിത്രപരമായ ഉത്തരവാദിത്വം ചൂണ്ടിക്കാട്ടിയായിരുന്നു അദ്ദേഹത്തിന്റെ വിമർശനം. രാഹുൽ ഗാന്ധി മുന്നോട്ടുവയ്ക്കുന്ന ‘മൊഹബത്ത് കി ദുകാൻ’ (സ്നേഹത്തിന്റെ കട) എന്ന മുദ്രാവാക്യത്തെയും അമിത് ഷാ പരിഹസിച്ചു. സിഖ് കൂട്ടക്കൊലയുടെ കറുത്ത ദിനത്തിൽ തന്നെ വലിയ റാലി നടത്താൻ കോൺഗ്രസ് ആഗ്രഹിക്കുന്നുവെങ്കിൽ, രാഹുൽജിയുടെ ‘സ്നേഹത്തിന്റെ കടയിൽ’ നിന്ന് സ്നേഹമല്ലാതെ വെറുപ്പ് മാത്രമേ ലഭിക്കൂവെന്നും അദ്ദേഹം പറഞ്ഞു.

2014ൽ നരേന്ദ്ര മോദി സർക്കാർ അധികാരത്തിലെത്തിയശേഷം 1984ലെ കലാപവുമായി ബന്ധപ്പെട്ട കേസുകൾ വീണ്ടും തുറന്നതായും അമിത് ഷാ അവകാശപ്പെട്ടു. ഒരു രാഷ്ട്രീയ പാർട്ടി പ്രേരിപ്പിച്ച ഇത്തരം കലാപം ഇന്ത്യയിൽ മുമ്പ് ഉണ്ടായിട്ടില്ലെന്നും ഇനി ഉണ്ടാകില്ലെന്നും അദ്ദേഹം ആരോപിച്ചു. കലാപവുമായി ബന്ധപ്പെട്ട കേസുകളിൽ നടപടികൾ സ്വീകരിച്ചതിനെ കേന്ദ്രസർക്കാരിന്റെ നേട്ടമായും അദ്ദേഹം അവതരിപ്പിച്ചു.

അതുപോലെ ഡൽഹിയിലെ വ്യാപാരികളുടെ ആശങ്കകൾ അവഗണിച്ചുവെന്ന ആരോപണവും അമിത് ഷാ കോൺഗ്രസിനെതിരെ ഉന്നയിച്ചു. ദീപാവലി ആഘോഷങ്ങളോടനുബന്ധിച്ചുള്ള തിരക്കേറിയ വ്യാപാരസമയത്താണ് റാലി സംഘടിപ്പിച്ചതെന്നും ഇത് കച്ചവടത്തെ ബാധിക്കുമെന്ന് വ്യാപാരികൾ ആശങ്ക അറിയിച്ചിരുന്നുവെന്നും അദ്ദേഹം പറഞ്ഞു.

റാലിയുടെ തീയതി മാറ്റണമെന്ന് ആവശ്യപ്പെട്ട് ഡൽഹിയിലെ വ്യാപാരികൾ നിരവധി തവണ കത്തുകളയയ്ക്കുകയും വാർത്താസമ്മേളനങ്ങൾ നടത്തുകയും ചെയ്തതായി അമിത് ഷാ പറഞ്ഞു. ദീപാവലിക്ക് ശേഷം റാലി നടത്തണമെന്നായിരുന്നു അവരുടെ ആവശ്യം. മൂന്നോ നാലോ തവണ വ്യാപാരികൾ ഇക്കാര്യം ഉന്നയിച്ചിട്ടും കോൺഗ്രസ് നിലപാട് മാറ്റിയില്ലെന്നും സിഖ് കൂട്ടക്കൊലയുമായി ബന്ധപ്പെട്ട ദിവസം തന്നെ റാലി നടത്താൻ നിർബന്ധം പിടിച്ചെന്നും അദ്ദേഹം ആരോപിച്ചു.

അതുപോലെ ഡൽഹിയിലെ തിരഞ്ഞെടുപ്പുകളിലും കോൺഗ്രസിന് തിരിച്ചടിയുണ്ടാകുമെന്ന് അമിത് ഷാ മുന്നറിയിപ്പ് നൽകി. കഴിഞ്ഞ മൂന്ന് തിരഞ്ഞെടുപ്പുകളിലും ഡൽഹിയിൽ അക്കൗണ്ട് തുറക്കാൻ കോൺഗ്രസിന് കഴിഞ്ഞിട്ടില്ലെന്ന് ചൂണ്ടിക്കാട്ടിയ അദ്ദേഹം, അടുത്ത മൂന്ന് തിരഞ്ഞെടുപ്പുകളിലും പാർട്ടിക്ക് വിജയിക്കാനാകില്ലെന്ന് പ്രവചിച്ചു.

‘‘കഴിഞ്ഞ മൂന്ന് തിരഞ്ഞെടുപ്പുകളിലും ഡൽഹിയിൽ നിങ്ങളുടെ അക്കൗണ്ട് തുറക്കാനായില്ല. എന്റെ വാക്കുകൾ ഓർത്തുവെച്ചോളൂ, അടുത്ത മൂന്ന് തിരഞ്ഞെടുപ്പുകളിലും അവിടെ നിങ്ങളുടെ അക്കൗണ്ട് തുറക്കാൻ പോകുന്നില്ല’’ എന്നായിരുന്നു അമിത് ഷായുടെ വെല്ലുവിളി.

മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ പ്രതിപക്ഷം ശനിയാഴ്ച നടത്തിയ പ്രതീകാത്മക ‘പൊതു ഇംപീച്ച്‌മെന്റ്’ നടപടിയെയും അദ്ദേഹം പരിഹസിച്ചു. പ്രധാനമന്ത്രിയാകാനാണ് ആഗ്രഹമെങ്കിൽ ജീവിതകാലം മുഴുവൻ ‘മോക്ക് പാർലമെന്റിൽ’ തുടരാമെന്നും പ്രധാനമന്ത്രി പദത്തിലേക്കുള്ള അവസരം ഒരിക്കലും ലഭിക്കില്ലെന്നും അമിത് ഷാ പറഞ്ഞു.

പ്രതിപക്ഷം തെറ്റായ വിവരങ്ങൾ പ്രചരിപ്പിക്കുകയും അരാജകത്വം സൃഷ്ടിക്കുകയും പാർലമെന്റിന്റെ പ്രവർത്തനങ്ങൾ തടസ്സപ്പെടുത്തുകയും ചെയ്യുകയാണെന്നും അദ്ദേഹം ആരോപിച്ചു. ജനാധിപത്യത്തെ സംരക്ഷിക്കുകയെന്ന പേരിൽ നടത്തുന്ന പ്രതിഷേധങ്ങൾ രാജ്യത്ത് അസ്ഥിരത സൃഷ്ടിക്കാനുള്ള നീക്കമാണെന്ന ബിജെപിയുടെ നിലപാടും അമിത് ഷാ ആവർത്തിച്ചു.