കൊച്ചി: സ്ത്രീത്വത്തെ അപമാനിക്കുന്നെന്ന നടിയുടെ പരാതിയിൽ രാഹുൽ ഈശ്വറിനെതിരെ പൊലീസ് കേസെടുത്തു. നടി വ്യാഴാഴ്ച നൽകിയ പുതിയ പരാതിയിലാണ് ബിഎൻഎസ് 79, ഐടി ആക്ട് 67 പ്രകാരം എറണാകുളം സെൻട്രൽ പൊലീസ് കേസെടുത്തത്. മൂന്നു വർഷം വരെ തടവ് ലഭിക്കാവുന്ന വകുപ്പാണിത്. നേരത്തെ നടി നൽകിയ പരാതിയിൽ പൊലീസ് കേസെടുത്തിരുന്നില്ല.
വ്യവസായി ബോബി ചെമ്മണ്ണൂരിനെതിരെ നൽകിയ പരാതിക്കു പിന്നാലെ രാഹുൽ ഈശ്വർ നടിക്കെതിരെ മോശം പരാമർശങ്ങൾ നടത്തിയെന്നായിരുന്നു പരാതി. നടി ആദ്യ പരാതി നൽകിയതിനെ തുടർന്ന് രാഹുൽ ഈശ്വർ മുൻകൂർ ജാമ്യം തേടി ഹൈക്കോടതിയെ സമീപിച്ചിരുന്നു. രാഹുൽ ഈശ്വറിനെതിരെ കേസെടുത്തിട്ടില്ലെന്നും പ്രാഥമിക പരിശോധനകൾ പൂർത്തിയാക്കി വരികയാണെന്നും പൊലീസ് അറിയിച്ചിരുന്നു.
തുടര്‍ന്ന് രാഹുൽ ഈശ്വറിനെതിരെ കേസ് റജിസ്റ്റർ ചെയ്ത് അറസ്റ്റ് അടക്കമുള്ള കാര്യങ്ങളിലേക്ക് കടക്കുകയാണെങ്കിൽ മുൻകൂർ നോട്ടിസ് നല്‍കണമെന്ന് ഹൈക്കോടതി നിർദേശിച്ചിരുന്നു. ജാമ്യമില്ലാ വകുപ്പുകൾ ഉൾപ്പെടുത്തി കേസ് റജിസ്റ്റര്‍ ചെയ്ത് അറസ്റ്റ് അടക്കമുള്ള കാര്യങ്ങളിലേക്ക് കടക്കുകയാണെങ്കിൽ അതിന് 2 ആഴ്ച മുൻപ് നോട്ടിസ് നൽകണം എന്നായിരുന്നു കോടതിയുടെ നിർദേശം.
ഇതോടെയാണ് നടി രാഹുൽ ഈശ്വറിനെതിരെ വീണ്ടും പരാതി നൽകിയത്. തനിക്കെതിരെ നിരന്തരം അധിക്ഷേപ പരാമർശങ്ങള്‍ നടത്തുന്നു എന്ന നടിയുടെ പരാതിയിൽ വ്യവസായി ബോബി ചെമ്മണ്ണൂര്‍ അറസ്റ്റിലാവുകയും റിമാൻഡിലാവുകയും ചെയ്തിരുന്നു. ഈ സമയത്താണ് നടിയുടെ വസ്ത്രധാരണ രീതിയെക്കുറിച്ചുള്ള രാഹുൽ ഈശ്വറിന്റെ പ്രസ്താവനകളും വിവാദമായത്.
Case Against Rahul Easwar: Rahu lEaswar faces a case for insulting an actress’s dignity. The Ernakulam police registered the case under the IT Act based on a new complaint filed by the actress after he made derogatory remarks. Ernakulam News Kerala News Kerala Police Kerala High Court
