മധുര: നാഗർകോവിൽ ജങ്ഷൻ റെയിൽവേ സ്റ്റേഷനിൽ അറ്റകുറ്റപ്പണികൾക്കായി യാർഡിൽ നിർത്തിയിട്ടിരുന്ന ട്രെയിൻ കോച്ചിനുള്ളിൽ സ്ത്രീയെ ബലാത്സംഗം ചെയ്ത് മർദിച്ചുകൊലപ്പെടുത്തിയ സംഭവത്തിൽ 31കാരൻ അറസ്റ്റിൽ. കന്യാകുമാരി സ്വദേശിയായ അയ്യപ്പൻ എന്നയാളെയാണ് റെയിൽവേ പൊലീസ് വെള്ളിയാഴ്ച അറസ്റ്റ് ചെയ്തത്. കുറ്റകൃത്യം നടന്ന് നാലു ദിവസത്തോളം സംഭവം പുറത്തറിയാതെ പോകുകയായിരുന്നു.
ഏകദേശം 50 വയസ് പ്രായം തോന്നിക്കുന്ന തിരിച്ചറിയാത്ത സ്ത്രീയുടെ അഴുകിയ മൃതദേഹം നവംബർ 18ന് രാവിലെ എട്ടോടെയാണ് ട്രെയിനിന്റെ പിൻഭാഗത്തുള്ള ഭിന്നശേഷിക്കാർക്കായി മാറ്റിവച്ച കോച്ചിൽ സീറ്റിനടിയിൽ കണ്ടെത്തിയത്. 16366-ാം നമ്പർ ട്രെയിനിന്റെ ഈ കോച്ച് റെയിൽവേ യാർഡിലെ 13-ാം നമ്പർ ട്രാക്കിൽ നിർത്തിയിട്ടിരിക്കുകയായിരുന്നു.
നാഗർകോവിൽ ഈസ്റ്റ് വില്ലേജ് അഡ്മിനിസ്ട്രേറ്റീവ് ഓഫീസറുടെ പരാതിയുടെ അടിസ്ഥാനത്തിൽ റെയിൽവേ പൊലീസ് ആദ്യം അസ്വാഭാവിക മരണത്തിന് കേസെടുത്തു. പോസ്റ്റ്മോർട്ടം പരിശോധനയിൽ കൊലപാതകമാണെന്ന് വ്യക്തമായതോടെ കേസിൽ കൊലപാതകക്കുറ്റവും ഉൾപ്പെടുത്തി.
റെയിൽവേ പൊലീസ് ഇൻസ്പെക്ടർ കാതറിൻ സുജാതയുടെ നേതൃത്വത്തിലുള്ള പ്രത്യേക അന്വേഷണസംഘം സ്റ്റേഷനിലെ സിസിടിവി ദൃശ്യങ്ങൾ പരിശോധിച്ചപ്പോഴാണ് നിർണായക വിവരം ലഭിച്ചത്. നവംബർ 14ന് രാവിലെ എട്ടോടെ നാലും അഞ്ചും പ്ലാറ്റ്ഫോമുകൾക്ക് സമീപം നിർത്തിയിട്ടിരുന്ന ട്രെയിൻ കോച്ചിൽനിന്ന് വെള്ള ഷർട്ടും മുണ്ടും ധരിച്ച ഒരാൾ ഇറങ്ങിപ്പോകുന്നതിന്റെ ദൃശ്യങ്ങൾ പൊലീസിന് ലഭിച്ചു.
തുടർന്നുള്ള അന്വേഷണത്തിലാണ് അന്നേ ദിവസം പുലർച്ചെ 12.30ഓടെയാണ് കൊലപാതകം നടന്നതെന്ന് കണ്ടെത്തിയത്. പ്രതി കോച്ചിൽനിന്ന് പുറത്തുപോകുന്നതായി സിസിടിവിയിൽ പതിഞ്ഞ സമയത്തിന് ഏകദേശം ഏഴര മണിക്കൂർ മുമ്പായിരുന്നു സംഭവം. പ്ലാറ്റ്ഫോം അഞ്ചിന് സമീപം നടന്നുപോകുകയായിരുന്ന സ്ത്രീയെ പ്രതി കാണുകയും കൈയിൽ പിടിച്ച് ബലമായി വലിച്ചിഴച്ച് ആളൊഴിഞ്ഞ ഭിന്നശേഷിക്കാർക്കായുള്ള കോച്ചിനുള്ളിലേക്ക് കൊണ്ടുപോകുകയുമായിരുന്നുവെന്ന് പൊലീസ് അറിയിച്ചു.
തുടർന്ന് സ്ത്രീയെ ബലാത്സംഗം ചെയ്ത പ്രതി ശരീരത്തിന്റെ വിവിധ ഭാഗങ്ങളിൽ ആവർത്തിച്ച് ഇടിക്കുകയും ചവിട്ടുകയും ചെയ്തു. മർദനത്തിനിടെ നിലത്തിട്ട് ചവിട്ടിയതായും പൊലീസ് പറയുന്നു. ക്രൂരമായ ആക്രമണത്തിൽ ഗുരുതരമായി പരിക്കേറ്റ സ്ത്രീ മരണപ്പെടുകയായിരുന്നു.
കന്യാകുമാരി ജില്ലയിലെ ചെമ്പകരാമൻപുതൂരിൽ ജോൺസന്റെ മകനായ അയ്യപ്പനാണ് അറസ്റ്റിലായത്. കഴിഞ്ഞ നാലു മാസമായി ഇയാൾ വിവിധ സ്ഥലങ്ങളിൽ അലഞ്ഞുതിരിഞ്ഞ് നടക്കുകയായിരുന്നുവെന്നാണ് പൊലീസിന്റെ കണ്ടെത്തൽ. അറസ്റ്റ് ചെയ്ത ശേഷം വിശദമായി ചോദ്യം ചെയ്ത പ്രതിയെ കോടതിയിൽ ഹാജരാക്കി റിമാൻഡ് ചെയ്തു.
അതേസമയം, കൊല്ലപ്പെട്ട സ്ത്രീ ആരാണെന്ന് കണ്ടെത്താനുള്ള ശ്രമങ്ങൾ പൊലീസ് തുടരുകയാണ്. തിരിച്ചറിയൽ രേഖകളോ മറ്റ് വിവരങ്ങളോ ലഭിക്കാത്ത സാഹചര്യത്തിൽ മൃതദേഹത്തിന്റെ വ്യക്തിത്വം സ്ഥിരീകരിക്കാനുള്ള അന്വേഷണം പുരോഗമിക്കുകയാണ്.