ന്യൂഡൽഹി: ട്രെയിൻ യാത്രയ്ക്കിടെ സഹയാത്രക്കാർക്ക് ബുദ്ധിമുട്ടുണ്ടാക്കുന്ന തരത്തിൽ മൊബൈൽ ഫോണിൽ ഉച്ചത്തിൽ പാട്ടുവെക്കുകയോ വീഡിയോ കാണുകയോ ചെയ്യുന്നതിനെതിരെ കർശന നടപടിയുമായി ദക്ഷിണ റെയിൽവേ. ഹെഡ്‌ഫോൺ ഉപയോഗിക്കാതെ സ്പീക്കറിലൂടെ പാട്ടും വീഡിയോയും കേൾക്കുന്നതും ഉച്ചത്തിൽ സംസാരിക്കുന്നതും ശല്യമായി കണക്കാക്കും. ആദ്യ നിയമലംഘനത്തിന് 1,000 രൂപ പിഴ ചുമത്താം. മുന്നറിയിപ്പ് നൽകിയിട്ടും ശല്യം ആവർത്തിച്ചാൽ ആറുമാസം വരെ തടവോ 5,000 രൂപ വരെ പിഴയോ രണ്ടും കൂടിയോ ലഭിക്കാം.
യാത്രക്കാർ മൊബൈൽ ഫോണിൽ ഉച്ചത്തിൽ പാട്ടും വീഡിയോയും കേൾക്കുന്നതും സ്പീക്കർ മോഡിൽ സംസാരിക്കുന്നതും കാരണം സഹയാത്രക്കാർക്ക് ബുദ്ധിമുട്ടുണ്ടാകുന്നതായി പരാതികൾ ഉയർന്നിരുന്നു. ഈ സാഹചര്യത്തിലാണ് നടപടി കർശനമാക്കിയത്. ട്രെയിനുകളിലും റെയിൽവേ സ്റ്റേഷനുകളിലും പൊതുജന അറിയിപ്പുകളിലൂടെയും നോട്ടീസുകളിലൂടെയും യാത്രക്കാരെ ബോധവൽക്കരിക്കാൻ ദക്ഷിണ റെയിൽവേ നിർദേശം നൽകിയിട്ടുണ്ട്. മലയാളം ഉൾപ്പെടെയുള്ള പ്രാദേശിക ഭാഷകൾക്കു പുറമേ ഹിന്ദിയിലും ഇംഗ്ലീഷിലും അറിയിപ്പുകൾ നൽകും.
റെയിൽവേ നിയമത്തിലെ 145-ാം വകുപ്പിന്റെ അടിസ്ഥാനത്തിലാണ് നടപടികൾ. ശല്യം സൃഷ്ടിക്കുന്നവരെ റെയിൽവേ പരിസരത്തുനിന്ന് നീക്കുന്നതിനും നിയമപ്രകാരമുള്ള പിഴ ചുമത്തുന്നതിനും വ്യവസ്ഥയുണ്ട്. ടിക്കറ്റ് പരിശോധകർ ഉൾപ്പെടെയുള്ള അധികാരപ്പെട്ട റെയിൽവേ ഉദ്യോഗസ്ഥർക്ക് നിയമലംഘകർക്കെതിരെ നടപടിയെടുക്കാം. യാത്രയ്ക്കിടെ മൊബൈൽ ഫോണിൽ പാട്ടോ വീഡിയോയോ കേൾക്കുമ്പോൾ ഇയർഫോൺ ഉപയോഗിക്കണമെന്നും മറ്റുള്ളവർക്ക് ബുദ്ധിമുട്ടുണ്ടാക്കുന്ന തരത്തിൽ സംസാരിക്കുന്നത് ഒഴിവാക്കണമെന്നും റെയിൽവേ നിർദേശിക്കുന്നു.
