കാഞ്ഞങ്ങാട്: കാറപകടത്തിൽ രണ്ട് മക്കൾ മരിക്കുകയും കാറോടിച്ച മാതാവ് മാസങ്ങളോളം അബോധാവസ്ഥയിലാകുകയും ചെയ്ത സംഭവത്തിൽ 35 ലക്ഷം രൂപ കാറുടമയ്ക്ക് നഷ്ടപരിഹാരം നൽകാൻ വിധി. പടന്നയിലെ സാബിറയും ഭർത്താവ് അയ്യൂബും നൽകിയ ഹർജിയിൽ കാസർകോട് അഡീഷണൽ ട്രിബൂണൽ ജഡ്ജി ടി.എച്ച്. രജിതയുടേതാണ് ഉത്തരവ്.
അപകടത്തിൽ അശ്രദ്ധമായി കാർ ഓടിച്ചുവെന്ന് കാണിച്ച് സാബിറയ്ക്കെതിരെയായിരുന്നു പോലീസ് കേസെടുത്തതും അന്വേഷണ റിപ്പോർട്ട് സമർപ്പിച്ചതും. 21 രേഖകളുടെയും നാലു ദൃക്സാക്ഷികളുടെ മൊഴിയുടെയും അടിസ്ഥാനത്തിൽ പോലീസ് റിപ്പോർട്ട് തള്ളിയ കോടതി ചെലവ് സഹിതം നഷ്ടപരിഹാരം നൽകാൻ വിധിക്കുകയായിരുന്നു.
2015 ജനുവരി 24-നാണ് കേസിനാസ്പദമായ സംഭവം നടന്നത്. മക്കളായ മുഹമ്മദ് അഫ്രീദി(7)യേയും മുഹമ്മദ് അർഫാസി(2)നേയും കൂട്ടി തന്റെ മാരുതിക്കാറിൽ കാസർകോടുനിന്ന് പടന്നയിലേക്ക് വരികയായിരുന്നു സാബിറ. ഇതിനിടെ പെരിയ നവോദയ വിദ്യാലയത്തിനടുത്തുവെച്ച് എതിരേവന്ന കെ.എ.19 ഡി 5454 നമ്പർ ലോറിയുമായി കാർ കൂട്ടിയിടിച്ചു.
അപകടത്തിൽ അഫ്രീദിയും അർഫാസും മരിച്ചു. സാബിറ അബോധാവസ്ഥയിൽ മംഗളൂരു ആശുപ്രത്രിയിൽ ഒരുമാസത്തോളം ചികിത്സയിൽ കഴിയുകയും ചെയ്തു. ഇതിനിടെ ലോറി ഡ്രൈവർ കർണാടക ബണ്ട്വാളിലെ ഇദ്ദിനബ്ബയുടെ പരാതിയിന്മേൽ ബേക്കൽ പോലീസ് സാബിറയ്ക്കെതിരെ അശ്രദ്ധമായി വാഹനം ഓടിച്ചെന്ന് കാണിച്ച് കേസെടുക്കുകയായിരുന്നു. ആശുപത്രിയിൽനിന്നെത്തിയ സാബിറ ഹൊസ്ദുർഗ് ജൂഡീഷ്യൽ ഒന്നാം ക്ലാസ് മജിസ്ട്രേറ്റ് (രണ്ട്) കോടതിയിൽ ഹർജി നൽകുകയും കോടതി നിർദേശപ്രകാരം ബേക്കൽ പോലീസ് ലോറി ഡ്രൈവർക്കെതിരെ കേസെടുക്കുകയും ചെയ്തു. എന്നാൽ, പോലീസിന്റെ അന്തിമ റിപ്പോർട്ട് സാബിറയ്ക്കെതിരാവുകയായിരുന്നു.
ആദ്യം അന്വേഷിച്ച് തയ്യാറാക്കിയ വിവരങ്ങൾ മാത്രമാണ് കോടതി നിർദേശപ്രകാരം കേസെടുത്തിട്ടും രണ്ടാമത്തേതായി പോലീസ് നൽകിയത്. പോലീസ് റിപ്പോർട്ടും സാബിറയ്ക്കെതിരാണെന്ന് കാട്ടി എം.ഐ.സി.ടി. കോടതിയിൽ ലോറിയുടെ ഇൻഷുറൻസ് കമ്പനിയും വാദിച്ചു. എന്നാൽ, രേഖകളെല്ലാം വിശദമായി പരിശോധിച്ച്, സാക്ഷിമൊഴികൾ കേട്ട് എം.ഐ.സി.ടി. കേസ് കൈകാര്യംചെയ്ത അഡീഷണൽ ട്രിബൂണൽ ജഡജ് സാബിതയ്ക്കും ഭർത്താവിനുമനുകൂലമായി വിധിക്കുകയായിരുന്നു. ഹർജിക്കാർക്കുവേണ്ടി ഹൊസ്ദുർഗ് ബാറിലെ അഡ്വ. പി.കെ. ചന്ദ്രശേഖരൻ ഹാജരായി.
