മുംബൈ: കഴിഞ്ഞയാഴ്ച കോക്ക്റോച്ച് ജനതാ പാർട്ടി (സി.ജെ.പി) നടത്തിയ പ്രതിഷേധത്തിൽ പങ്കെടുത്തതിനെത്തുടർന്ന് നടൻ ഇമ്രാൻ ഖാനോട് ഇന്ത്യ വിടാൻ നിർദേശം. അമേരിക്കൻ പൗരത്വമുള്ളതും ഓവർസീസ് സിറ്റിസൺ ഓഫ് ഇന്ത്യ (ഒ.സി.ഐ) കാർഡ് കൈവശമുള്ളതിനാലുമാണ് ഇമ്രാൻ ഖാന് മുംബൈ പോലീസ് രാജ്യം വിടാനുള്ള നോട്ടീസ് നൽകിയത്. 2025ലെ ഇമിഗ്രേഷൻ ആൻഡ് ഫോറിനേഴ്സ് ആക്ടിലെ വ്യവസ്ഥകൾ പ്രകാരമാണ് നടപടി.
ഇന്ത്യയിൽ വിദേശികളുടെ പ്രവേശനം, താമസം, യാത്ര, രാജ്യം വിടൽ തുടങ്ങിയ കാര്യങ്ങൾ നിയന്ത്രിക്കാൻ കേന്ദ്ര സർക്കാരിന് അധികാരം നൽകുന്നതാണ് നിയമത്തിലെ ഏഴാം വകുപ്പ്. വിദേശികളുടെ സാന്നിധ്യവും സഞ്ചാരവും നിയന്ത്രിക്കുന്നതിനും ആവശ്യമായ നിർദേശങ്ങൾ പുറപ്പെടുവിക്കുന്നതിനും ഈ വകുപ്പ് സർക്കാരിനെ അധികാരപ്പെടുത്തുന്നു. വിദേശികളെ രാജ്യത്തുനിന്ന് പുറത്താക്കുന്നതുമായി ബന്ധപ്പെട്ടതാണ് നിയമത്തിലെ 29-ാം വകുപ്പ്. നിയമത്തിലെ വ്യവസ്ഥകളോ അതിന്റെ അടിസ്ഥാനത്തിൽ പുറപ്പെടുവിച്ച ചട്ടങ്ങളോ ഉത്തരവുകളോ ലംഘിച്ചാൽ, അല്ലെങ്കിൽ സുരക്ഷാ പരിശോധനയിൽ പ്രതികൂല റിപ്പോർട്ട് ലഭിച്ചാൽ, വിദേശിയെ ഇന്ത്യയിൽനിന്ന് പുറത്താക്കാൻ കേന്ദ്ര സർക്കാരിന് ഉത്തരവിടാമെന്ന് ഈ വകുപ്പ് വ്യക്തമാക്കുന്നു. അത്തരം ഉത്തരവുകൾ നടപ്പാക്കുന്നതിന് ആവശ്യമായ ന്യായമായ അധികാരങ്ങൾ സർക്കാർ ഉദ്യോഗസ്ഥർക്കും ഉണ്ടായിരിക്കും. അതേസമയം ഒക്ടോബർ 28 വരെയാണ് നടന് സമയം അനുവദിച്ചിരിക്കുന്നത്.
എന്താണ് ഒസിഐ കാർഡ്?
വിദേശ പൗരത്വമുള്ള ഇന്ത്യൻ വംശജർക്ക് ചില പ്രത്യേക ആനുകൂല്യങ്ങൾ നൽകുന്നതിനായി 2005ലാണ് ഓവർസീസ് സിറ്റിസൺ ഓഫ് ഇന്ത്യ (ഒ.സി.ഐ) പദ്ധതി ആരംഭിച്ചത്. എന്നാൽ ഒ.സി.ഐ കാർഡ് ഇന്ത്യൻ പൗരത്വം നൽകുന്നില്ലയെന്നതും വസ്തുതയാണ്. ഒ.സി.ഐ കാർഡ് ഉടമകൾ വിദേശ പൗരന്മാരായാണ് കണക്കാക്കപ്പെടുന്നത്.
നിലവിലുള്ള നിയമങ്ങൾക്കും വ്യവസ്ഥകൾക്കും വിധേയമായി ഇന്ത്യയിലേക്ക് ഒന്നിലധികം തവണ പ്രവേശിക്കാവുന്ന ആജീവനാന്ത വിസ ഉൾപ്പെടെയുള്ള ആനുകൂല്യങ്ങൾ ഒ.സി.ഐ കാർഡ് ഉടമകൾക്ക് ലഭിക്കും. വിദ്യാഭ്യാസം, സ്വത്തുമായി ബന്ധപ്പെട്ട ചില കാര്യങ്ങൾ, നിശ്ചിത തൊഴിൽ മേഖലകൾ എന്നിവയിലും പ്രത്യേക ആനുകൂല്യങ്ങളുണ്ട്. എന്നാൽ ഈ ആനുകൂല്യങ്ങൾ ഇന്ത്യൻ പൗരത്വത്തിന് തുല്യമല്ല.
അതേസമയം ഒക്ടോബർ 10ന് മുംബൈയിലെ ആഗസ്റ്റ് ക്രാന്തി മൈതാനത്ത് നടന്ന പ്രതിഷേധത്തിലാണ് ഇമ്രാൻ ഖാൻ പങ്കെടുത്തത്. മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിനെതിരെ കോക്ക്റോച്ച് ജനതാ പാർട്ടി സംഘടിപ്പിച്ച പ്രതിഷേധത്തിൽ ഇമ്രാനൊപ്പം പങ്കാളിയും നടിയുമായ ലേഖ വാഷിങ്ടണും ബന്ധുവായ സെയ്ൻ മേരി ഖാനും പങ്കെടുത്തിരുന്നു. പ്രതിഷേധത്തിനിടെ മൂന്നുപേരെയും പോലീസ് കസ്റ്റഡിയിലെടുത്തെങ്കിലും പിന്നീട് വിട്ടയച്ചു.
തുടർന്ന് പോലീസ് വാനിനുള്ളിൽനിന്നുള്ള സ്വന്തം ചിത്രം ഇമ്രാൻ ഖാൻ സമൂഹമാധ്യമങ്ങളിൽ പങ്കുവച്ചിരുന്നു. “പ്രത്യക്ഷത്തിൽ ഞാൻ ഒരു ഡ്രൈവിന് പോകുകയാണ്” എന്നായിരുന്നു ചിത്രത്തോടൊപ്പമുള്ള അദ്ദേഹത്തിന്റെ പരിഹാസരൂപത്തിലുള്ള കുറിപ്പ്. പ്രതിഷേധത്തിൽ പങ്കെടുത്തതിന്റെ പേരിൽ ഇമ്രാൻ ഖാനെതിരെ നടപടി സ്വീകരിക്കണമെന്ന് ബിജെപി നേതാവ് കിരിത് സോമയ്യ നേരത്തെ ആവശ്യപ്പെട്ടിരുന്നു. ഇതിന് പിന്നാലെയാണ് നടനോട് ഇന്ത്യ വിടാൻ നിർദേശിച്ചുകൊണ്ടുള്ള നോട്ടീസ് ലഭിച്ചിരിക്കുന്നത്. പ്രതിഷേധത്തിൽ പങ്കെടുത്തതും തുടർന്നുണ്ടായ നടപടികളും തമ്മിലുള്ള ബന്ധം വാർത്തയിൽ പ്രധാനമായി ഉയർന്നുവരുന്നുണ്ടെങ്കിലും, നോട്ടീസിൽ ചൂണ്ടിക്കാട്ടിയിരിക്കുന്ന കൃത്യമായ കാരണങ്ങൾ സംബന്ധിച്ച കൂടുതൽ വിശദാംശങ്ങൾ ലഭ്യമല്ല.
