ഗുജറാത്ത്: വാവ്-തരാഡ് ജില്ലയിൽ സ്യൂഗാമിൽ രണ്ടര വയസുകാരനായ മകന്റെ ദേഹത്ത് പെട്രോളൊഴിച്ച് തീകൊളുത്തി കൊലപ്പെടുത്തിയ കേസിൽ പിതാവ് അറസ്റ്റിൽ. കുട്ടി മരിച്ചതിന് പിന്നാലെ കുറ്റകൃത്യത്തിന്റെ തെളിവുകൾ നശിപ്പിക്കാനായി മൃതദേഹം പ്രാദേശിക ശ്മശാനത്തിൽ രഹസ്യമായി കുഴിച്ചിട്ടു. സംഭവവുമായി ബന്ധപ്പെട്ട് പിതാവായ അശോക് റാവലിനെ പോലീസ് അറസ്റ്റ് ചെയ്തു.
ഇയാൾക്കെതിരെ കൊലപാതകം, തെളിവുകൾ നശിപ്പിക്കൽ തുടങ്ങിയ കുറ്റങ്ങൾ ചുമത്തിയാണ് കേസെടുത്തിരിക്കുന്നത്. ഗുരുതരമായി പൊള്ളലേറ്റ നിലയിൽ കുട്ടി കട്ടിലിൽ ഇരിക്കുന്നതിന്റെ ദൃശ്യങ്ങൾ പുറത്തുവന്നതും സംഭവത്തിന്റെ ഭീകരത വർധിപ്പിച്ചിട്ടുണ്ട്. ഭാര്യ സ്വന്തം വീട്ടിലേക്ക് മടങ്ങിയതിനെത്തുടർന്ന് മകനെ നോക്കേണ്ട ഉത്തരവാദിത്തം അശോക് റാവലിന് മാത്രമായി. രണ്ടര വയസുകാരനായ നവ്ഘനെ ഒറ്റയ്ക്ക് വളർത്തുന്നതിലെ ബുദ്ധിമുട്ടുകൾ നേരിടേണ്ടിവന്നതോടെ പിതാവ് അസ്വസ്ഥനായിരുന്നെന്ന് പോലീസ് പറയുന്നു.
ഒക്ടോബർ 13ന് ഉച്ചയ്ക്ക് ഒന്നിനും രണ്ടിനുമിടയിലാണ് സംഭവം നടന്നതെന്നാണ് വിവരം. ഈ സമയത്ത് അശോക് മകന്റെ ദേഹത്ത് പെട്രോളൊഴിച്ച് തീകൊളുത്തിയെന്നാണ് പരാതി. പിന്നീട് ഗുരുതരമായി പൊള്ളലേറ്റ കുട്ടിയെ പിതാവ് ആശുപത്രിയിലെത്തിച്ചെങ്കിലും കുട്ടി മരിച്ചു.
കുട്ടിയുടെ മരണത്തിനു പിന്നാലെ കുറ്റകൃത്യം പുറത്തറിയാതിരിക്കാനുള്ള ശ്രമം നടന്നതായും പരാതിയിലുണ്ട്. അശോകും കുടുംബത്തിലെ ചില അംഗങ്ങളും ചേർന്ന് കുട്ടിയുടെ മൃതദേഹം ഒരു പൊതുശ്മശാനത്തിൽ രഹസ്യമായി കുഴിച്ചിട്ടെന്നാണ് ആരോപണം. സംഭവത്തിന്റെ യഥാർഥ വിവരങ്ങൾ മറച്ചുവയ്ക്കാനായിരുന്നു ഈ നീക്കമെന്നാണ് പോലീസിന്റെ സംശയം.
അശോകിന്റെ അമ്മാവനായ ബാബുഭായ് റാവൽ സംഭവത്തെക്കുറിച്ച് അറിഞ്ഞതോടെയാണ് ക്രൂരമായ കൊലപാതകമെന്ന സംശയം പുറത്തുവന്നത്. സ്വന്തം അനന്തരവന്റെ നടപടിയിൽ ഞെട്ടിയ ബാബുഭായ് സ്യൂഗാം പോലീസ് സ്റ്റേഷനിലെത്തി പരാതി നൽകുകയായിരുന്നു.
പരാതിയുടെ അടിസ്ഥാനത്തിൽ പൊലീസ് സംഘം ശ്മശാനത്തിലെത്തി കുഴിച്ചിട്ടിരുന്ന കുട്ടിയുടെ മൃതദേഹം പുറത്തെടുത്തു. തുടർന്ന് വിശദമായ പോസ്റ്റ്‌മോർട്ടം പരിശോധനയ്ക്കായി മൃതദേഹം അയച്ചു. കുട്ടിയുടെ മരണത്തിലേക്ക് നയിച്ച സാഹചര്യങ്ങളും സംഭവത്തിൽ മറ്റാർക്കെങ്കിലും പങ്കുണ്ടോയെന്ന കാര്യവും പോലീസ് അന്വേഷിച്ചുവരികയാണ്. ഇയാൾ നിലവിൽ പോലീസ് കസ്റ്റഡിയിലാണ്. സംഭവത്തിന്റെ എല്ലാ വശങ്ങളും പരിശോധിച്ചുവരികയാണെന്ന് അന്വേഷണവുമായി ബന്ധപ്പെട്ട വൃത്തങ്ങൾ അറിയിച്ചു.
