ഓണ്‍ലൈന്‍ ക്ലാസ് അറ്റന്‍ഡ് ചെയ്യാന്‍ സ്മാര്‍ട്ട്‌ഫോണില്ലാതെ വിഷമിച്ച മിടുക്കിക്ക് ഐ ഫോണ്‍ വാങ്ങി നല്‍കി ബോളിവുഡ് താരം താപ്‌സി പന്നു. പിയുസി പരീക്ഷയില്‍ 94 ശതമാനം മാര്‍ക്കോടെ ജയിച്ച ബംഗളുരു സ്വദേശിയായ പെണ്‍കുട്ടിയാണ് തുടര്‍ പഠനത്തിന് ഫോണില്ലാതെ ബുദ്ധിമുട്ടിയത്. ഫോണ്‍ വാങ്ങുന്നതിന് പെണ്‍കുട്ടിയുടെ പിതാവ് സഹായം തേടിയിരുന്നു. എന്‍ഡിടിവി ചെയ്ത വാര്‍ത്ത കണ്ട താരം ഉടന്‍ തന്നെ ഫോണ്‍ നല്‍കാമെന്ന് അറിയിക്കുകയായിരുന്നു. നിരവധിപ്പേര്‍ പെണ്‍കുട്ടിയുടേയും സഹോദരിമാരുടെയും പഠനച്ചിലവ് ഏറ്റെടുക്കാന്‍ താല്‍പര്യം അറിയിച്ചെത്തിയിട്ടുണ്ട്.
‘കൂടുതല്‍ പെണ്‍കുട്ടികള്‍ക്ക് വിദ്യാഭ്യാസം ലഭിക്കേണ്ടതുണ്ട്. ഓരോ കുട്ടിയും വിദ്യാഭ്യാസം നേടേണ്ടതുണ്ട്, കൂടുതല്‍ ഡോക്ടര്‍മാരെ നമുക്ക് ആവശ്യമാണ്. രാജ്യത്തിന്റെ നല്ല നാളെ ഉറപ്പ് വരുത്തുന്നതിനായി എന്റെ ചെറിയ പ്രയത്‌നമാണിത് എന്ന് പറഞ്ഞായിരുന്നു താരം ഫോണ്‍ സമ്മാനിച്ചത്.
താപ്‌സി അയച്ച ഫോണ്‍ പെണ്‍കുട്ടിക്ക് ലഭിച്ചു. സ്വപ്നത്തില്‍ പോലും ഐ ഫോണ്‍ പ്രതീക്ഷിച്ചിരുന്നില്ലെന്നും നീറ്റ് എഴുതി മികച്ച വിജയം നേടാന്‍ താന്‍ പരമാവധി ശ്രമിക്കുമെന്നും നന്ദിയെന്നും പെണ്‍കുട്ടി ദേശീയമാധ്യമങ്ങളോട് പ്രതികരിച്ചു. കോവിഡ് പ്രതിസന്ധിയെ തുടര്‍ന്ന് രാജ്യമെങ്ങും വിദ്യാഭ്യാസം ഓണ്‍ലൈനിലേക്ക് മാറിയിട്ടുണ്ട്. ഇതോടെയാണ് സ്മാര്‍ട്ട്‌ഫോണ്‍ ഇല്ലാത്ത വലിയൊരു വിഭാഗം വിദ്യാര്‍ഥികള്‍ പ്രതിസന്ധിയിലായത്
