അഹമ്മദാബാദ്: പ്രണയബന്ധത്തിന്റെ പേരിൽ യുവാവിനെ പുളിമരത്തിൽ കെട്ടിയിട്ട് ക്രൂരമായി മർദിച്ചുകൊലപ്പെടുത്തിയതായി പരാതി. ഗുജറാത്തിലെ മെഹ്സാന ജില്ലയിൽ ഖേരാലു താലൂക്കിലെ തങ്കണ ഗ്രാമത്തിലാണ് സംഭവം. സിദ്ധ്പുർ സ്വദേശിയായ രഞ്ജീത്‌ജി ചതൂർജി താക്കോർ (31) ആണ് കൊല്ലപ്പെട്ടത്. സംഭവത്തിൽ യുവതിയുടെ അമ്മയും സഹോദരനും ഭർതൃസഹോദരനും ഉൾപ്പെടെ നാലുപേർക്കെതിരെ പോലീസ് കേസെടുത്തു. യുവതിയുമായി കഴിഞ്ഞ രണ്ട് വർഷമായി പ്രണയബന്ധത്തിലായിരുന്ന രഞ്ജീത്‌ജി, അവരെ കാണാനെത്തിയപ്പോഴാണ് ആക്രമണത്തിനിരയായതെന്നാണ് പോലീസിന് ലഭിച്ച പരാതി.
സിദ്ധ്പുർ താലൂക്കിലെ വാഘറോൾ ഗ്രാമവാസിയാണ് രഞ്ജീത്‌ജി. ചോളമണ്ഡലം ഇൻവെസ്റ്റ്‌മെന്റ് ആൻഡ് ഫിനാൻസ് കമ്പനിയിൽ ക്രെഡിറ്റ് മാനേജരായി ജോലി ചെയ്തുവരികയായിരുന്നു. തങ്കണ ഗ്രാമത്തിലെ ജഗാജി രൺഛോഡ്ജി താക്കോറിന്റെ മകളുമായി ഇയാൾക്ക് അടുപ്പമുണ്ടായിരുന്നുവെന്നാണ് പൊലീസ് പറയുന്നത്. കഴിഞ്ഞ രണ്ട് വർഷമായി ഇരുവരും ബന്ധത്തിലായിരുന്നുവെന്നും ഇതാണ് കൊലപാതകത്തിന് കാരണമായതെന്നുമാണ് പ്രാഥമിക നിഗമനം.
ചൊവ്വാഴ്ച രാവിലെ പതിവുപോലെ മോട്ടോർ സൈക്കിളിൽ ജോലിക്കായി വീട്ടിൽനിന്ന് ഇറങ്ങിയതായിരുന്നു രഞ്ജീത്‌ജി. എന്നാൽ, പിന്നീട് ഇയാൾ തങ്കണ ഗ്രാമത്തിലെ യുവതിയെ കാണാൻ എത്തിയെന്നും യുവതിയുടെ കുടുംബാംഗങ്ങൾ പിടികൂടിയെന്നുമുള്ള വിവരം വീട്ടുകാർക്ക് ലഭിച്ചു. ഇതോടെ രഞ്ജീത്‌ജിയുടെ പിതാവ് ചതൂർജി ബദ്സംഗ്ജി താക്കോറും അമ്മാവനും മറ്റ് ബന്ധുക്കളും തങ്കണ ഗ്രാമത്തിലേക്ക് തിരിച്ചു.
ജഗാജി രൺഛോഡ്ജിയുടെ വീട്ടിലെത്തിയ കുടുംബാംഗങ്ങൾ കണ്ടത് പുളിമരത്തിന് താഴെ ഇരുമ്പുകട്ടിലിൽ കിടത്തിയ നിലയിലുള്ള രഞ്ജീത്‌ജിയുടെ മൃതദേഹമായിരുന്നു. ചാക്കുപോലുള്ള ഒരു പുതപ്പ് ഉപയോഗിച്ച് മൃതദേഹം മൂടിയിരുന്നു. ശരീരത്തിൽ നടത്തിയ പരിശോധനയിൽ പുറംഭാഗത്തും കഴുത്തിലും കാൽമുട്ടുകളിലുമടക്കം വിവിധ ഭാഗങ്ങളിൽ ഗുരുതരമായ പരിക്കുകളും കറുത്ത പാടുകളും കണ്ടെത്തി.
പുളിമരത്തിന്റെ തായ്ത്തടിയിൽ രഞ്ജീത്‌ജിയെ കയർ ഉപയോഗിച്ച് കെട്ടിയിട്ടശേഷം വടികളും വടിവാളിന് സമാനമായ അടിക്കോലുകളും ഉപയോഗിച്ച് ക്രൂരമായി മർദിച്ചെന്നാണ് പിതാവ് നൽകിയ പരാതിയിൽ പറയുന്നത്. യുവാവിന്റെ കൈകളും കാലുകളും കയറുകൊണ്ട് ബന്ധിച്ചശേഷമായിരുന്നു ആക്രമണമെന്നും പരാതിയിലുണ്ട്.
സംഭവസമയത്ത് വീട്ടിലുണ്ടായിരുന്ന ഒരു സ്ത്രീ നൽകിയ വിവരമനുസരിച്ച്, രാത്രിയിൽ യുവതിയെ കാണാനായി രഞ്ജീത്‌ജി എത്തിയിരുന്നു. ഇതറിഞ്ഞതോടെ ഇയാളെ പിടികൂടുകയായിരുന്നുവെന്നാണ് പിതാവിന്റെ മൊഴി. തുടർന്ന് യുവതിയുടെ അമ്മ ഹൻസാബെൻ ജഗാജി താക്കോർ, മകൻ ഹിതേഷ്‌ജി ജഗാജി താക്കോർ, ഭർതൃസഹോദരൻ ഭേമാജി രൺഛോഡ്ജി താക്കോർ എന്നിവർ ചേർന്ന് രഞ്ജീത്‌ജിയുടെ കൈകളും കാലുകളും കെട്ടിയിട്ടശേഷം വടികൾ ഉപയോഗിച്ച് മർദിച്ചെന്നാണ് ആരോപണം.
മർദനം തുടരുന്നതിനിടെ സാക്രി ഗ്രാമവാസിയായ രമാജി കേശാജി താക്കോറിനെയും സ്ഥലത്തേക്ക് വിളിച്ചുവരുത്തിയതായി പരാതിയിൽ പറയുന്നു. ഇയാളും സംഘത്തോടൊപ്പം ചേർന്ന് വടികൾ ഉപയോഗിച്ച് രഞ്ജീത്‌ജിയെ മർദിച്ചെന്നാണ് ആരോപണം. ക്രൂരമായ മർദനത്തെത്തുടർന്ന് യുവാവ് ബോധരഹിതനാവുകയും പിന്നീട് പരിക്കുകൾ കാരണം മരിക്കുകയുമായിരുന്നുവെന്നാണ് പരാതിയിലെ വിശദീകരണം.
രഞ്ജീത്‌ജി മരിച്ചതോടെ മൃതദേഹം പുളിമരത്തിന് താഴെയുണ്ടായിരുന്ന ഇരുമ്പുകട്ടിലിലേക്ക് മാറ്റി കിടത്തിയെന്നാണ് പരാതിയിൽ പറയുന്നത്. സംഭവത്തിനുശേഷം ചിലർ യുവതിയെയും കൂട്ടി പ്രദേശത്തുനിന്ന് പോയതായും പിതാവിന്റെ പരാതിയിലുണ്ട്.
സംഭവത്തെക്കുറിച്ച് വിവരം ലഭിച്ചതോടെ പ്രാദേശിക പോലീസ് സ്ഥലത്തെത്തി. തുടർന്ന് ഇൻക്വസ്റ്റ് നടപടികൾ പൂർത്തിയാക്കി പോസ്റ്റ്മോർട്ടത്തിനായി അയച്ചു. മരണത്തിന്റെ യഥാർഥ കാരണം സ്ഥിരീകരിക്കുന്നതിനും ശരീരത്തിലേറ്റ പരിക്കുകളുടെ സ്വഭാവം കണ്ടെത്തുന്നതിനുമുള്ള നടപടികളും സ്വീകരിച്ചു.
പിതാവ് നൽകിയ ഔദ്യോഗിക പരാതിയുടെ അടിസ്ഥാനത്തിൽ ഖേരാലു പൊലീസ് നാലുപേർക്കെതിരെ കേസെടുത്തു. തങ്കണ ഗ്രാമവാസികളായ ഹൻസാബെൻ ജഗാജി താക്കോർ, ഹിതേഷ്‌ജി ജഗാജി താക്കോർ, ഭേമാജി രൺഛോഡ്ജി താക്കോർ എന്നിവരും സാക്രി ഗ്രാമവാസിയായ രമാജി കേശാജി താക്കോറുമാണ് കേസിലെ പ്രതികൾ.
പ്രണയബന്ധവുമായി ബന്ധപ്പെട്ട തർക്കമാണ് കൊലപാതകത്തിന് പിന്നിലെന്നാണ് പൊലീസിന് ലഭിച്ച പ്രാഥമിക വിവരം. എന്നാൽ സംഭവത്തിന്റെ കൃത്യമായ സാഹചര്യങ്ങളും ആക്രമണത്തിൽ ഓരോരുത്തർക്കുമുള്ള പങ്കും വിശദമായി അന്വേഷിച്ചുവരികയാണ്. യുവാവിനെ വീട്ടിൽനിന്ന് കാണാതായതുമുതൽ തങ്കണ ഗ്രാമത്തിലെത്തിയതും പിന്നീട് കൊല്ലപ്പെട്ടതും വരെയുള്ള സംഭവങ്ങളുടെ ക്രമം പോലീസ് പരിശോധിക്കുന്നുണ്ട്.
സംഭവത്തിൽ യുവതിയുടെ മൊഴിയും അന്വേഷണത്തിൽ നിർണായകമായേക്കും. പ്രതികൾക്കെതിരായ ആരോപണങ്ങൾ സ്ഥിരീകരിക്കുന്നതിനായി സാക്ഷിമൊഴികളും മറ്റ് തെളിവുകളും പൊലീസ് ശേഖരിച്ചുവരികയാണ്. സംഭവത്തിൽ വിശദമായ അന്വേഷണം പുരോഗമിക്കുകയാണ്.
