തിരുവനന്തപുരം: സ്കൂൾ കുട്ടികളുടെ സുരക്ഷ ഉറപ്പാക്കുന്നതിന്റെ ഭാഗമായി സംസ്ഥാനത്തുടനീളം നടത്തിയ പ്രത്യേക വാഹന പരിശോധനയിൽ മദ്യപിച്ച് വാഹനമോടിച്ച 21 ഡ്രൈവർമാർ പിടിയിലായി. ഒക്ടോബർ 30ന് രാവിലെ അഞ്ചുമുതൽ എട്ടുവരെയായിരുന്നു പ്രത്യേക പരിശോധനാ നടപടി. സംസ്ഥാനത്താകെ 4,504 സ്കൂൾ ബസുകളാണ് പരിശോധിച്ചത്.
പാലക്കാട്, മലപ്പുറം ജില്ലകളിലാണ് ഏറ്റവും കൂടുതൽ കേസുകൾ രജിസ്റ്റർ ചെയ്തത്. ഇരു ജില്ലകളിലും അഞ്ചു വീതം കേസുകളെടുത്തു. കോട്ടയത്ത് മൂന്നും കണ്ണൂരിൽ രണ്ടും കേസുകൾ രജിസ്റ്റർ ചെയ്തു. തിരുവനന്തപുരം സിറ്റി, തിരുവനന്തപുരം റൂറൽ, കൊല്ലം സിറ്റി, ഇടുക്കി, കൊച്ചി സിറ്റി, തൃശൂർ സിറ്റി എന്നിവിടങ്ങളിൽ ഓരോ കേസ് വീതവും കണ്ടെത്തി.
മദ്യപിച്ച് വാഹനമോടിക്കുന്നത് റോഡപകടങ്ങൾക്കും മരണങ്ങൾക്കും പ്രധാന കാരണമാകുന്നുവെന്ന് ക്രമസമാധാന പരിപാലന വിഭാഗം എഡിജിപി പി. വിജയൻ പറഞ്ഞു. വാഹന പരിശോധന തുടർന്നുള്ള ദിവസങ്ങളിലും നടത്തുമെന്നും അദ്ദേഹം അറിയിച്ചു.
