അടിമാലി: മദ്യപാനത്തിനിടെ സഹോദരങ്ങൾ തമ്മിലുണ്ടായ വാക്കേറ്റത്തിനൊടുവിൽ ജ്യേഷ്ഠൻ അനുജനെ കുത്തിക്കൊലപ്പെടുത്തി. വെള്ളത്തൂവൽ പഞ്ചായത്തിലെ തെക്കേ ശല്യംപാറ പൈതപ്ലായ്ക്കൽ അനിൽ (42) ആണ് മരിച്ചത്. സംഭവവുമായി ബന്ധപ്പെട്ട് ജേഷ്ഠൻ പ്രസാദ് (46) നെ വെള്ളത്തുവൽ പോലീസ് അറസ്റ്റ് ചെയ്തു. തിങ്കളാഴ്ച വൈകിട്ട് ആറരയോടെ ആയിരുന്നു സംഭവം. വെള്ളത്തൂവൽ ഗവൺമെൻറ് ഹൈസ്കൂളിന് സമീപം താമസിക്കുന്ന ജ്യേഷ്ഠൻ പ്രസാദ് വൈകിട്ടോടെയാണ് നെല്ലിയാമ്പറയിലെ തറവാട്ട് വീട്ടിലെത്തിയത്. പ്രസാദ് അമ്മയെ കാണുവാനാണ് ഇവിടെ എത്തിയതെന്നാണ് പോലീസ് പറയുന്നത്.
മോഷണക്കേസിൽപ്പെട്ട് ജയിലിലായിരുന്ന പ്രസാദ് കഴിഞ്ഞ ദിവസമാണ് ജാമ്യത്തിലിറങ്ങിയത്. പ്രസാദ് മദ്യപിച്ചാണ് വീട്ടിലെത്തിയത്. വീട്ടിലെത്തിയതിനു ശേഷം അനിയനോടൊപ്പം വീണ്ടും മദ്യപിച്ചു. ഇതിനിടെ വാക്കേറ്റം ഉണ്ടായി. പ്രകോപിതനായ പ്രസാദ് അനിലിനെ വീട്ടിൽ വച്ച് കുത്തി.സംഭവം നടക്കുമ്പോൾ തറവാട്ടുവീട്ടിൽ അമ്മയും ഉണ്ടായിരുന്നു. മക്കൾ തമ്മിൽ വാക്ക് തർക്കം ഉണ്ടായതോടെ ഭയപ്പെട്ട അമ്മ മുറിയിൽ കയറി വാതിൽ അടച്ചു.
ഇതിനിടെ വീട്ടിലുണ്ടായിരുന്ന കത്തിയെടുത്ത് പ്രസാദ് അനിലിനെ ക്രൂരമായി കുത്തിപ്പരിക്കേൽപ്പിച്ചു. കൃത്യം നടത്തിയശേഷം ചോരയിൽ കുളിച്ചുകിടക്കുന്ന സഹോദരനെ അവഗണിച്ച് പ്രസാദ് വീട്ടിനുള്ളിലിരുന്ന് ടിവി കാണുകയായിരുന്നു. ഇയാൾ സ്ഥിരമായി കഞ്ചാവ് ഉപയോഗിക്കുന്ന ആളാണെന്ന് നാട്ടുകാർ പറയുന്നു
ഈ സമയം അനിലിന്റെ ഭാര്യയും കുട്ടിയും ആശുപത്രിയിൽ പോയിരിക്കുകയായിരുന്നു. ഭാര്യ തിരിച്ചെത്തിയപ്പോൾ ഭർത്താവ് അനിൽ കുത്തേറ്റ് വീടിനുള്ളിൽ കിടക്കുന്നതാണ് കണ്ടത്.ഉടനെ നാട്ടുകാരെ വിവരം അറിയിച്ചു. ഉടൻ തന്നെ അയൽവാസികളും മറ്റു ബന്ധുക്കളും ചേർന്ന് അനിലിനെ അടിമാലി താലൂക്ക് ആശുപത്രിയിൽ എത്തിച്ചു. എന്നാൽ ആശുപത്രി എത്തുന്നതിനു മുൻപേ അനിൽ മരിച്ചു. മൃതദേഹം അടിമാലി താലൂക്ക് ആശുപത്രി മോർച്ചറിയിൽ സൂക്ഷിച്ചിരിക്കുന്നു.
