ചണ്ഡീഗഢ്: പഞ്ചാബിലെ ബട്ടിൻഡയിൽ കൈയിൽ സിറിഞ്ച് കുത്തിയ നിലയിൽ 32കാരനെ മരിച്ച നിലയിൽ കണ്ടെത്തി. ദസറ ഗ്രൗണ്ടിനും സമീപത്തെ ക്ഷേത്രത്തിനും അരികിലുള്ള ഒഴിഞ്ഞ പറമ്പിലാണ് തിങ്കളാഴ്ച വൈകുന്നേരം മൃതദേഹം കണ്ടെത്തിയത്. സംഭവത്തോടെ സംസ്ഥാനത്തെ ലഹരിമരുന്ന് ഉപയോഗവുമായി ബന്ധപ്പെട്ട പ്രശ്നങ്ങൾ വീണ്ടും ചർച്ചയാവുകയും ആം ആദ്മി പാർട്ടി സർക്കാരിനെതിരെ പ്രതിപക്ഷ നേതാക്കൾ വിമർശനവുമായി രംഗത്തെത്തുകയും ചെയ്തു.
ബട്ടിൻഡയിലെ പരസ് റാം നഗർ മേഖലയിലാണ് സംഭവം. തിങ്കളാഴ്ച രാത്രി എട്ടുമണിയോടെ വിവരം ലഭിച്ചതിനെത്തുടർന്ന് പോലീസും നൗജവാൻ വെൽഫെയർ സൊസൈറ്റിയിലെ സന്നദ്ധപ്രവർത്തകരും സ്ഥലത്തെത്തി. യുവാവിന്റെ നാഡിമിടിപ്പ് പരിശോധിച്ചെങ്കിലും മരണം സംഭവിച്ചതായി കണ്ടെത്തി. മൃതദേഹം തൊട്ടുനോക്കിയപ്പോൾ തണുത്ത നിലയിലായിരുന്നുവെന്നും രക്ഷാപ്രവർത്തകർ അറിയിച്ചു.
യുവാവിന്റെ വലതുകൈയിൽ സിറിഞ്ച് കുത്തിയ നിലയിൽ കണ്ടെത്തിയതാണ് ലഹരിമരുന്നിന്റെ അമിത ഉപയോഗം മൂലമാകാം മരണമെന്ന സംശയത്തിന് ഇടയാക്കിയത്. എന്നാൽ, മരണകാരണം പോലീസ് ഔദ്യോഗികമായി സ്ഥിരീകരിച്ചിട്ടില്ല. യുവാവിന്റെ ശരീരത്തിലേക്ക് ഏതെങ്കിലും ലഹരിവസ്തു കുത്തിവച്ചിരുന്നോ, അങ്ങനെയെങ്കിൽ അത് എന്താണെന്നോ വ്യക്തമായിട്ടില്ല.
മൃതശരീരം കണ്ടെത്തിയ സ്ഥലത്തിന് സമീപം ഒരു മോട്ടോർസൈക്കിളും പാർക്ക് ചെയ്ത നിലയിൽ കണ്ടെത്തി. പോലീസുകാർ യുവാവിന്റെ ശരീരവും വസ്ത്രങ്ങളും പരിശോധിച്ചെങ്കിലും തിരിച്ചറിയൽ കാർഡോ മറ്റ് രേഖകളോ ലഭിച്ചില്ല. സംഭവത്തിൽ പഞ്ചാബ് സർക്കാരിനെതിരെ ശിരോമണി അകാലിദൾ അധ്യക്ഷൻ സുഖ്ബീർ സിങ് ബാദൽ രൂക്ഷവിമർശനവുമായി രംഗത്തെത്തി. മുഖ്യമന്ത്രി ഭഗവന്ത് മന്നിനെയും സർക്കാരിനെയും കുറ്റപ്പെടുത്തിയ അദ്ദേഹം, ലഹരിമരുന്ന് ഉപയോഗം മറ്റൊരു പഞ്ചാബി കുടുംബത്തെക്കൂടി തകർത്തുവെന്ന് എക്സിൽ കുറിച്ചു.
“ലഹരിമരുന്നിന് മുന്നിൽ പഞ്ചാബിന്റെ മറ്റൊരു മകൻ കൂടി നഷ്ടപ്പെട്ടു, മറ്റൊരു കുടുംബം കൂടി തകർന്നു! ബട്ടിൻഡയിലെ പരസ് റാം നഗറിൽ 32കാരനായ രമേശിനെ കൈയിൽ സിറിഞ്ച് കുത്തിയ നിലയിൽ മരിച്ചുകിടക്കുന്നതായി കണ്ടെത്തിയെന്ന വാർത്ത ഏറെ വേദനിപ്പിക്കുന്നതാണ്. ഭഗവന്ത് മന്നിന്റെ ഭരണത്തിൻകീഴിലെ വൃത്തികെട്ട യാഥാർഥ്യമാണിത്. ഇവിടെ തൊഴിലവസരങ്ങളേക്കാൾ എളുപ്പത്തിൽ ലഹരിമരുന്നുകൾ ലഭിക്കുന്നു,” എന്നായിരുന്നു സുഖ്ബീർ സിങ് ബാദലിന്റെ പ്രതികരണം.
തു‌ടർന്നു കുറ്റക്കാർക്കെതിരെ ഉടൻ നടപടിയെടുക്കണമെന്നും ലഹരിമരുന്ന് വിൽപ്പനക്കാരെയും മാഫിയാ സംഘങ്ങളെയും സംസ്ഥാനത്തുനിന്ന് തുടച്ചുനീക്കണമെന്നും അദ്ദേഹം ആവശ്യപ്പെട്ടു. പഞ്ചാബിലെ അമ്മമാർ മക്കളെ നഷ്ടപ്പെട്ട് കരയുമ്പോൾ മുഖ്യമന്ത്രി സ്വയംപ്രചാരണത്തിലും കൊള്ളയിലും ആഡംബരജീവിതത്തിലും മുഴുകിയിരിക്കുകയാണെന്നും ബാദൽ ആരോപിച്ചു. സർക്കാരിന്റെ ദുർഭരണം പഞ്ചാബിന് ശാപമായി മാറിയെന്നും അദ്ദേഹം വിമർശിച്ചു.
ബട്ടിൻഡയിൽ നിന്നുള്ള ലോക്‌സഭാംഗം ഹർസിമ്രത് കൗർ ബാദലും സംഭവത്തിൽ പ്രതികരിച്ചു. മരിച്ചയാളെ പരസ് റാം നഗർ സ്വദേശിയായ 32കാരൻ രമേശ് എന്നാണു തിരിച്ചറിഞ്ഞതെന്ന് അവർ പ്രസ്താവനയിൽ പറഞ്ഞു. കൈയിൽ സിറിഞ്ച് കുത്തിയ നിലയിലായിരുന്നു മൃതദേഹം കണ്ടെത്തിയതെന്നും അവർ വ്യക്തമാക്കി.
“ബട്ടിൻഡയിലെ പരസ് റാം നഗർ സ്വദേശിയായ 32കാരൻ രമേശിനെ കൈയിൽ സിറിഞ്ച് കുത്തിയ നിലയിൽ മരിച്ചുകിടക്കുന്നതായി കണ്ടെത്തിയിരിക്കുന്നു. രമേശിന്റെ അമ്മ അനുഭവിക്കുന്ന വേദനയെക്കുറിച്ച് ചിന്തിച്ചുനോക്കൂ. ഭാര്യയുടെ തകർന്നുപോയ സ്വപ്നങ്ങളെക്കുറിച്ചും ഓർക്കൂ. ഒരു സാധാരണ പഞ്ചാബി കുടുംബം എന്നെന്നേക്കുമായി തകർന്നിരിക്കുന്നു,” ഹർസിമ്രത് കൗർ ബാദൽ പറഞ്ഞു. ഇത്തരം ഓരോ സിറിഞ്ചും പഞ്ചാബിനെ രക്തം ചിന്തിക്കുന്ന കഠാരയ്ക്ക് തുല്യമാണെന്നും അവർ ആരോപിച്ചു. ലഹരിമരുന്ന് ഉപയോഗം മൂലം ഇനിയും എത്ര ജീവനുകൾ നഷ്ടപ്പെട്ടാലാണ് ആം ആദ്മി പാർട്ടി സർക്കാർ ഉണരുകയെന്നും അവർ ചോദിച്ചു.
