തിരുവനന്തപുരം: വിഴിഞ്ഞത്തും പരിസരപ്രദേശങ്ങളിലും മോഷണം നടത്തി മുങ്ങിനടന്നിരുന്ന പ്രതി വാഴക്കുല മോഷണക്കേസിൽ പിടിയിലായി. വിഴിഞ്ഞം ടൗൺഷിപ്പ് കോളനിയിൽ താമസിക്കുന്ന ഷാജഹാൻ (38) ആണ് അറസ്റ്റിലായത്.
ജവഹർനഗറിലെ തണൽ ട്രസ്റ്റിന്റെ കീഴിൽ വെങ്ങാനൂർ വില്ലേജിലെ ആഴാകുളത്തുള്ള കൃഷിഫാമിൽനിന്നാണ് വാഴക്കുലകൾ മോഷണം പോയത്. 12 കിലോ വീതം തൂക്കമുള്ള എട്ട് കപ്പ വാഴക്കുലകളാണ് മോഷണം പോയതെന്ന് വിഴിഞ്ഞം പൊലീസ് അറിയിച്ചു.
ട്രസ്റ്റ് ഭാരവാഹികൾ നൽകിയ പരാതിയുടെ അടിസ്ഥാനത്തിൽ നടത്തിയ അന്വേഷണത്തിലാണ് പ്രതിയെ തിരിച്ചറിഞ്ഞത്. പ്രദേശത്തുനിന്ന് ബൈക്ക് മോഷ്ടിച്ച കേസിലും ഷാജഹാനെ പൊലീസ് തിരയുകയായിരുന്നുവെന്ന് ഉദ്യോഗസ്ഥർ പറഞ്ഞു.
ഇതുകൂടാതെ നിരവധി മോഷണക്കേസുകളിലും ഇയാൾ ഉൾപ്പെട്ടിട്ടുണ്ടെന്ന് വിഴിഞ്ഞം പൊലീസ് വ്യക്തമാക്കി.
