കൊച്ചി: കൊല്‍ക്കത്തയെ തോല്‍പ്പിച്ചതിന്റെ ആവശേത്തില്‍ പുതിയ സീസണിലെ ആദ്യ ഹോംമാച്ചിന് കേരള ബ്ലാസ്റ്റേഴ്സ് നാളെയിറങ്ങുന്നു. കലൂര്‍ ജവഹര്‍ലാല്‍ നെഹ്റു സ്റ്റേഡിയത്തില്‍ നാളെ രാത്രി ഏഴരയ്ക്ക് മുംബൈ സിറ്റി എഫ്സിയെയാണ് മഞ്ഞപ്പട നേരിടുന്നത്. ഉദ്ഘാടന മത്സരത്തില്‍ കൊല്‍ക്കത്തയില്‍ ചെന്ന് എടികെയെ തകര്‍ത്തതിന്റെ ആത്മവിശ്വാസവുമായാണ് ഡേവിഡ് ജെയിംസിന്റെ കുട്ടികള്‍ കൊച്ചിയില്‍ ഗ്രൗണ്ടിലിറങ്ങുക.
പഴയ ആശാന്‍ സ്റ്റീവ് കോപ്പല്‍ പരിശീലിപ്പിച്ച എടികെയ്ക്കെതിരെ മറുപടിയില്ലാത്ത രണ്ട് ഗോളുകള്‍ക്കായിരുന്നു ആദ്യകളിയില്‍ ബ്ലാസ്റ്റേഴ്സിന്റെ വിജയം. ആദ്യ കളിയില്‍ ജംഷഡ്പൂര്‍ എഫ്സിയോട് തോറ്റാണ് മുംബെയ് സിറ്റി കൊച്ചിയിലെത്തുന്നത്. ഇരുടീമുകളും ഇതുവരെ കളിച്ച എട്ട് കളികളില്‍ രണ്ടെണ്ണത്തില്‍ വീതം ബ്ലാസ്റ്റേഴ്സും മുംബൈയും ജയിച്ചു. കഴിഞ്ഞ സീസണില്‍ കൊച്ചിയില്‍ 1-1ന് സമനില പാലിച്ചപ്പോള്‍ മുംബൈയില്‍ നടന്ന എവേ മത്സരത്തില്‍ ബ്ലാസ്റ്റേഴ്സ് 1-0ത്തിന്റെ വിജയം നേടി.
മുന്‍വര്‍ഷങ്ങളേക്കാള്‍ ബ്ലാസ്റ്റേഴ്സിന്റെ മധ്യമുന്നേറ്റ നിര മികച്ച ഒത്തിണക്കം കാട്ടിയത് ആരാധകരുടെ പ്രതീക്ഷയുടെ മാറ്റുകൂട്ടുന്നു. മുന്നേറ്റനിരയില്‍ സെര്‍ബിയന്‍-സ്ലൊവേനിയന്‍ താരങ്ങളായ സ്റ്റെജോനോവിച്ചും പോപ്ലാറ്റിനിക്കുമായിരിക്കും എതിരാളികളുടെ പ്രധാന ശ്രദ്ധാകേന്ദ്രം. കഴിഞ്ഞ കളിയില്‍ ഇരുവരും ഗോളടിച്ച് മികച്ച ഫോമിലാണ് കളം കീഴടക്കിയത്.
എങ്കിലും ലൈനപ്പില്‍ ചില മാറ്റങ്ങള്‍ക്ക് സാധ്യതയുണ്ടെന്നാണ് സൂചന. കൊച്ചിയിലാണ് കളിയെന്നതുകൊണ്ട് സി കെ വിനീതിനെ ആദ്യ ഇലവനില്‍ ഇറക്കിയേക്കും. ബ്ലാസ്റ്റേഴ്സ് ടീം ഇന്ന് രാവിലെ പനമ്പിള്ളി നഗര്‍ മൈതാനത്ത് പരിശീലനത്തിനിറങ്ങും. അതേസമയം, ഇന്ത്യന്‍താരവും മിഡ്ഫീല്‍ഡറുമായ ജേക്സണ്‍ സിംഗ് തൗനോജം ബ്ലാസ്റ്റേഴ്സുമായി കരാര്‍ ഒപ്പിട്ടു. ഫിഫ അണ്ടര്‍ 17 ലോകകപ്പില്‍ ഇന്ത്യയ്ക്ക് വേണ്ടി ഏക ഗോള്‍ നേടിയ താരമാണ്.
