ജക്കാര്‍ത്ത: ഏഷ്യന്‍ ഗെയിംസ് ജാവലിന്‍ ത്രോയില്‍ ഇന്ത്യയുടെ നീരജ് ചോപ്രയ്ക്ക് സ്വര്‍ണ്ണം. അത്‌ലറ്റക്‌സില്‍ ഇന്ന് ഇന്ത്യ മികച്ച കുതിപ്പ് തുടരുകയാണ്. ദേശീയ റെക്കോര്‍ഡ് തിരുത്തിയാണ് നീരജിന്റെ സുവര്‍ണനേട്ടം. 88.06 മീറ്റര്‍ ദൂരത്തേക്ക് ജാവലിന്‍ പായിച്ചാണ് നീരജ് മികച്ച നേട്ടം സ്വന്തമാക്കിയത്.
ജാവലിന്‍ ത്രോയില്‍ ആദ്യമായാണ് ഇന്ത്യ സ്വര്‍ണം നേടുന്നത്. നേരത്തെ കോമണ്‍വെല്‍ത്ത് ഗെയിംസിലും നീരജ് സ്വര്‍ണ്ണം നേടിയിരുന്നു. ഇത്തവണത്തെ ഏഷ്യന്‍ ഗെയിംസിലെ ഇന്ത്യയുടെ പതാകവാഹകനായിരുന്നു നീരജ് ചോപ്ര. ഡയമണ്ട് ലീഗ് മീറ്റില്‍ നേടിയ 87.43 മീറ്റര്‍ ദേശീയ റെക്കോര്‍ഡാണ് നീരജ് തിരുത്തിയത്.
വനിതകളുടെ ലോങ് ജംപില്‍ മലയാളി താരം നീന പിന്റോ വെള്ളിമെഡല്‍ നേടി.
