ചേർത്തല: സുഹൃത്തുക്കൾ സഞ്ചരിച്ച ബൈക്കിനു പിന്നിൽ കാർ ഇടിച്ചതിനെത്തുടർന്ന് റോഡിലേക്കു തെറിച്ചുവീണ് ബൈക്ക് യാത്രികനായ യുവാവിന് ദാരുണാന്ത്യം. ഇടിച്ച കാർ നിർത്താതെ പോയതോടെ രക്തം വാർന്ന് യുവാക്കൾ 15 മിനിറ്റോളം റോഡിൽ കിടന്നു. ചേർത്തല തണ്ണീർമുക്കം പഞ്ചായത്തിൽ പണ്ടാരപ്പാട്ടത്തിൽ പ്രകാശിന്റെയും മിനിയുടെയും മകൻ ശിവപ്രകാശ് (29) ആണു മരിച്ചത്. ഒപ്പമുണ്ടായിരുന്ന സുഹൃത്ത് തണ്ണീർമുക്കം ഇലഞ്ഞാൽകുളങ്ങര സ്വദേശി വിഷ്ണു മുരളിക്ക് (27) ഗുരുതര പരുക്കേറ്റു. ഇയാളെ ആശുപത്രിയിൽ പ്രവേശിപ്പിച്ചു.
ഇന്നലെ ഉച്ചയ്ക്ക് 2ന് ചേർത്തല വാരനാട്–ചെങ്ങണ്ട റോഡിൽ ചെങ്ങണ്ട വളവിലായിരുന്നു അപകടം. സുഹൃത്തിന്റെ വിവാഹത്തിൽ പങ്കെടുത്ത് മടങ്ങുകയായിരുന്നു ഇരുവരും. ഈ സമയം ശിവപ്രസാദ് ആയിരുന്നു ബൈക്ക് ഓടിച്ചത്. ഇരുവരും റോഡിലേക്കു തെറിച്ചുവീണതിനെത്തുടർന്ന് കാർ നിർത്താതെപോയെന്നും ഇവർ പരുക്കേറ്റ് ഏറെ നേരം റോഡിൽ കിടന്നെന്നും പോലീസ് പറഞ്ഞു.
ഇതുവഴി പോയ മറ്റു യാത്രക്കാർ പരുക്കേറ്റ യുവാക്കളെ ചേർത്തല താലൂക്ക് ആശുപത്രിയിലെത്തിച്ചെങ്കിലും ശിവപ്രകാശിന്റെ ജീവൻ രക്ഷിക്കാൻ കഴിഞ്ഞില്ല. കാർ കണ്ടെത്താനായി പോലീസ് അന്വേഷണം തുടങ്ങി. ശിവപ്രകാശിന്റെ മൃതദേഹം ആലപ്പുഴ മെഡിക്കൽ കോളജ് ആശുപത്രിയിലേക്കു മാറ്റി. ശിവപ്രകാശ് കോട്ടയത്ത് കാർ ഷോറൂമിലെ ജീവനക്കാരനാണ്. സഹോദരൻ ശ്യാം.
