അബുദാബി: പശ്ചിമേഷ്യൻ രാജ്യങ്ങളിൽ കഴിയുന്ന അമേരിക്കൻ പൗരന്മാർ അതീവ ജാഗ്രത പാലിക്കണമെന്ന് യുഎസിന്റെ മുന്നറിയിപ്പ്. യമനിലെ ഇറാൻ പിന്തുണയുള്ള ഹൂതികളുടെ ആക്രമണ ഭീഷണിയും മേഖലയിലെ യുഎസ് സർക്കാർ ഉദ്യോഗസ്ഥരെ ലക്ഷ്യമിട്ടുള്ള ഇറാന്റെ നീക്കങ്ങളും കണക്കിലെടുത്ത് ആക്രമണസാധ്യത വർധിച്ചിട്ടുണ്ടെന്നാണ് യുഎസ് അധികൃതരുടെ വിലയിരുത്തൽ.
നവംബർ ഏഴിന് യുഎഇയിലെ യുഎസ് മിഷൻ പുറപ്പെടുവിച്ച പ്രത്യേക സുരക്ഷാ മുന്നറിയിപ്പിലാണ് ഇക്കാര്യം വ്യക്തമാക്കിയത്. യാത്രാ തടസ്സങ്ങൾ, വിമാന സർവീസുകൾ റദ്ദാക്കൽ, വ്യോമാതിർത്തി അടച്ചിടൽ എന്നിവയ്ക്ക് സാധ്യതയുള്ളതിനാൽ പൗരന്മാർ മുൻകരുതലെടുക്കണമെന്നും ഏത് സാഹചര്യവും നേരിടാൻ സജ്ജരായിരിക്കണമെന്നും നിർദേശിച്ചിട്ടുണ്ട്. ഇറാൻ പിന്തുണയുള്ള ഹൂതികളുടെ ആക്രമണ ഭീഷണിയും മേഖലയിലെ യുഎസ് ഉദ്യോഗസ്ഥരെ ലക്ഷ്യമിട്ടുള്ള ഇറാന്റെ നീക്കങ്ങളും വർധിക്കുന്ന സാഹചര്യത്തിൽ മിഡിൽ ഈസ്റ്റിലുള്ള അമേരിക്കൻ പൗരന്മാർ അതീവ ജാഗ്രത പുലർത്തണമെന്നാണ് യുഎസ് മിഷന്റെ അറിയിപ്പ്.
നേരത്തെ സൗദി അറേബ്യയിലെ സിവിൽ വിമാനത്താവളങ്ങൾക്കും പ്രധാന അടിസ്ഥാന സൗകര്യങ്ങൾക്കും നേരെ ഹൂതികൾ നടത്തിയ ആക്രമണങ്ങളിൽ ആളപായമുണ്ടായതായും വ്യാപകമായ യാത്രാ തടസ്സങ്ങൾ സൃഷ്ടിക്കപ്പെട്ടതായും വാഷിങ്ടൺ ചൂണ്ടിക്കാട്ടിയിരുന്നു. മേഖലയിലെ സംഘർഷം പെട്ടെന്ന് രൂക്ഷമാകാൻ സാധ്യതയുണ്ടെന്നും ഇറാന്റെയും സഖ്യകക്ഷികളുടെയും നീക്കങ്ങൾ വിദേശത്തുള്ള അമേരിക്കൻ സ്ഥാപനങ്ങളെയും വ്യാപാര സ്ഥാപനങ്ങളെയും ബാധിച്ചേക്കാമെന്നും യുഎസ് അധികൃതർ മുന്നറിയിപ്പ് നൽകി.
