കൊല്ലം; ഓച്ചിറയിൽ നഴ്സിങ് വിദ്യാർഥിയെ വീടിനുള്ളിൽ തൂങ്ങിമരിച്ച നിലയിൽ കണ്ടെത്തി. കരുനാഗപ്പള്ളി ആലുംകടവ് സ്വദേശി അഹമ്മദ് നജാദ് ആണ് മരിച്ചത്. ഇന്ന് പുലർച്ചെയാണ് വിദ്യാർഥിയെ ജീവനൊടുക്കിയ നിലയിൽ കണ്ടെത്തിയത്. സ്വകാര്യ നഴ്സിങ് കോളജിലെ രണ്ടാം വർഷ ബിഎസ്‌സി വിദ്യാർഥിയാണ് നജാദ്.
അതേസമയം അധ്യാപകരുടെ മാനസിക പീഡനത്തെത്തുടർന്നാണ് അഹമ്മദ് നജാദ് ജീവനൊടുക്കിയതെന്ന് ബന്ധുക്കൾ ആരോപിച്ചു. കഴിഞ്ഞ പരീക്ഷയിൽ അഹമ്മദ് നജാദിനു മാർക്ക് കുറ‍ഞ്ഞതിൽ അധ്യാപകർ മാനസികമായി പീഡിപ്പിച്ചെന്നും തുടർന്നുള്ള പരീക്ഷകൾ എഴുതാൻ അനുവദിച്ചില്ലെന്നു വിദ്യാർഥി പറഞ്ഞിരുന്നതായും ബന്ധുക്കൾ പറയുന്നു. ഇതിൽ മനം നൊന്താണ് അഹമ്മദ് നജാദ് ജീവനൊടുക്കിയതെന്നാണ് കുടുംബത്തിന്റെ ആരോപണം.
ഇതിനിടെ സംഭവത്തിൽ അന്വേഷണം ആവശ്യപ്പെട്ട് എസ്എഫ്ഐ കോളേജിലെത്തി പ്രതിഷേധിച്ചു. എസ്എഫ്ഐ നേതാക്കളും കോളേജ് അധികൃതരുമായി ചർച്ച നടത്തി. പിന്നാലെ, ആരോപണം ഉന്നയിക്കപ്പെട്ട 4 അധ്യാപകരെ സസ്പെൻഡ് ചെയ്യാൻ തീരുമാനിച്ചതായി കോളേജ് അറിയിച്ചു.
