തിരുവനന്തപുരം: കെ.എസ്.ആർ.ടി.സിയുടെ മിന്നൽ, സ്വിഫ്റ്റ് ബസുകളിൽ ഡ്രൈവർക്കും യാത്രക്കാർക്കും സീറ്റ് ബെൽറ്റ് നിർബന്ധമാക്കണമെന്ന് ആവശ്യപ്പെട്ട് അബിൻ വർക്കി എം.എൽ.എ കെ.എസ്.ആർ.ടി.സി മാനേജിങ് ഡയറക്ടർക്ക് കത്ത് നൽകി.
ലിമിറ്റഡ് സ്റ്റോപ്പുകളോടെ സംസ്ഥാന, ദേശീയപാതകളിലൂടെ ഉയർന്ന വേഗത്തിൽ സർവീസ് നടത്തുന്ന മിന്നൽ ബസുകൾ ചുരുങ്ങിയ കാലയളവിൽ ജനപ്രീതി നേടിയിട്ടുണ്ട്. രാത്രികാലങ്ങളിലെ അതിവേഗ യാത്രയും ദേശീയപാതകളിലെ ഗതാഗത സാഹചര്യങ്ങളും കണക്കിലെടുക്കുമ്പോൾ യാത്രക്കാരുടെയും ഡ്രൈവർമാരുടെയും സുരക്ഷയ്ക്ക് കൂടുതൽ പ്രാധാന്യം നൽകേണ്ടതുണ്ടെന്ന് എം.എൽ.എ കത്തിൽ ചൂണ്ടിക്കാട്ടി.
ഉയർന്ന വേഗതയിൽ പെട്ടെന്നുള്ള ബ്രേക്കിങ് ഉണ്ടാകുന്നതും അപകടങ്ങൾ സംഭവിക്കുന്നതും യാത്രക്കാർക്ക് ഗുരുതര പരിക്കുകൾക്ക് കാരണമാകാൻ സാധ്യതയുണ്ട്. അതിനാൽ എല്ലാ മിന്നൽ ബസുകളിലും ഡ്രൈവർ സീറ്റിലും യാത്രക്കാരുടെ എല്ലാ സീറ്റുകളിലും മികച്ച നിലവാരമുള്ള സീറ്റ് ബെൽറ്റുകൾ ഉറപ്പാക്കണമെന്നാണ് പ്രധാന ആവശ്യം.
യാത്രയിലുടനീളം ഡ്രൈവർമാരും യാത്രക്കാരും സീറ്റ് ബെൽറ്റ് ധരിക്കുന്നുണ്ടെന്ന് ഉറപ്പാക്കാൻ ആവശ്യമായ നടപടികൾ സ്വീകരിക്കണമെന്നും എം.എൽ.എ ആവശ്യപ്പെട്ടു. കത്ത് അടിയന്തര പ്രാധാന്യത്തോടെ പരിഗണിക്കുമെന്ന് കെ.എസ്.ആർ.ടി.സി എം.ഡി ഉറപ്പുനൽകിയതായി അബിൻ വർക്കി അറിയിച്ചു.
