കൊല്ലം: ഭർതൃവീട്ടിലെ കിടപ്പുമുറിയിൽ യുവതി ജീവനൊടുക്കിയ സംഭവത്തിൽ, കണ്ടെടുത്ത കുറിപ്പിലെ വിവരങ്ങൾ പുറത്ത്. കൊല്ലം മാടൻനട സ്വദേശി അഫ്സലിന്റെ ഭാര്യ സായ(26)യേയാണ് ശനിയാഴ്ച രാത്രി കിടപ്പുമുറിയുടെ ജനലിൽ തൂങ്ങിയ നിലയിൽ കണ്ടെത്തിയത്. ഭർത്താവിനോട് സ്നേഹം മാത്രമേ ഉള്ളൂ എന്നും തന്റെ സ്വർണം വിറ്റ് കാറിന്റെ ഇഎംഐ അടയ്ക്കണമെന്നുമാണ് ആത്മഹത്യക്കുറിപ്പിലുള്ളത്. സംഭവത്തിൽ ദുരൂഹതയില്ലെന്ന് പൊലീസ് പറഞ്ഞു. ആത്മഹത്യയിലേക്ക് നയിച്ച കാരണം സംബന്ധിച്ച് വ്യക്തതയില്ല.
സ്വർണം പണയംവെച്ച് വായ്പയെടുത്തതിനെക്കുറിച്ചും വാഹനത്തിന്റെ വായ്പ തിരിച്ചടയ്ക്കാനുള്ളതിനേക്കുറിച്ചുമാണ് ആത്മഹത്യക്കുറിപ്പിലുള്ളത്. വായ്പ തിരിച്ചടച്ചശേഷം ബാക്കി തുക വീട്ടുകാർക്ക് നൽകണമെന്നും കുറിപ്പിൽ ആവശ്യപ്പെട്ടിട്ടുണ്ട്. വാഹനത്തിന്റെ വായ്പ തിരിച്ചടയ്ക്കുന്നതുമായി ബന്ധപ്പെട്ട് ദമ്പതികൾക്കിടയിൽ തർക്കങ്ങളുണ്ടായിരുന്നതായി പ്രാഥമിക അന്വേഷണത്തിൽ വിവരം ലഭിച്ചിട്ടുണ്ട്.
കുട്ടികളില്ലാത്തതിലുള്ള മാനസിക വിഷമവും സായയ്ക്കുണ്ടായിരുന്നതായി ബന്ധുക്കൾ പോലീസിന് മൊഴിനൽകിയിട്ടുണ്ട്. ദമ്പതികൾക്കിടയിൽ മറ്റ് കുടുംബപ്രശ്‌നങ്ങളുണ്ടായിരുന്നോ എന്നതടക്കമുള്ള കാര്യങ്ങളിൽ വ്യക്തതയായിട്ടില്ല. കുറിപ്പിൽ ആരെയും കുറ്റപ്പെടുത്തുന്ന പരാമർശങ്ങളില്ല. ബന്ധുക്കളുടെയും സമീപവാസികളുടെയും മൊഴി രേഖപ്പെടുത്തിയ പോലീസ്, കൂടുതൽ പേരുടെ മൊഴിയെടുത്ത് വിശദമായ അന്വേഷണം നടത്തും.
പത്തനാപുരം സ്വദേശിയായ സായയുടെ കുടുംബം ഇപ്പോൾ എറണാകുളത്താണ് താമസം. നാലുവർഷം മുൻപാണ് അഫ്‌സലുമായി സായയുടെ വിവാഹം നടന്നത്. അസ്വാഭാവിക മരണത്തിന് ഇരവിപുരം പോലീസ് കേസെടുത്തിട്ടുണ്ട്.
