ഹേഗ്: മ്യാൻമറിലെ ന്യൂനപക്ഷ വിഭാഗമായ റോഹിംഗ്യൻ മുസ്ലിംകൾക്കെതിരെ ഭരണകൂടം വംശഹത്യ നടത്തിയതായി അന്താരാഷ്ട്ര നീതിന്യായ കോടതി കണ്ടെത്തിയെന്ന് റിപ്പോർട്ട്. ഒരു രാജ്യത്തെ വംശഹത്യാക്കുറ്റത്തിൽ അന്താരാഷ്ട്ര കോടതി കുറ്റക്കാരനായി കണ്ടെത്തുന്നത് ചരിത്രത്തിലാദ്യമാണെന്ന അവകാശവാദവും വാർത്തയിലുണ്ട്. 15 ജഡ്ജിമാരടങ്ങിയ ബെഞ്ചാണ് നിർണായക വിധി പുറപ്പെടുവിച്ചത്. റോഹിംഗ്യൻ ജനതയെ ഉന്മൂലനം ചെയ്യുകയെന്ന ലക്ഷ്യത്തോടെയാണ് മ്യാൻമർ സൈന്യം പ്രവർത്തിച്ചതെന്ന് കോടതി നിരീക്ഷിച്ചു. 2017-ലെ സൈനിക നടപടികളിൽ 10,000 റോഹിംഗ്യർ കൊല്ലപ്പെട്ടതായും ഏഴുലക്ഷത്തിലധികം പേർക്ക് പലായനം ചെയ്യേണ്ടിവന്നതായും കോടതി വിലയിരുത്തി.
റോഹിംഗ്യർ ബംഗ്ലാദേശിൽനിന്നുള്ള കുടിയേറ്റക്കാരാണെന്ന മ്യാൻമറിന്റെ വാദം കോടതി തള്ളി. സ്വന്തമായ ഭാഷയും സംസ്കാരവുമുള്ള റോഹിംഗ്യൻ ജനത സംരക്ഷിക്കപ്പെടേണ്ട വിഭാഗമാണെന്നും കോടതി വ്യക്തമാക്കി. ബുൾഡോസറുകൾ ഉപയോഗിച്ച് വീടുകൾ തകർത്തും മൃതദേഹങ്ങൾ കത്തിച്ചും അതിക്രമങ്ങളുടെ തെളിവുകൾ വ്യാപകമായി നശിപ്പിച്ചതായും ചൂണ്ടിക്കാട്ടി.
അതിക്രമങ്ങൾക്ക് ഇരയായ റോഹിംഗ്യർക്ക് മ്യാൻമർ നഷ്ടപരിഹാരം നൽകണമെന്നും ഇത്തരം സംഭവങ്ങൾ ആവർത്തിക്കില്ലെന്ന് ഉറപ്പുനൽകണമെന്നും കോടതി നിർദേശിച്ചു. 2017-ൽ റോഹിംഗ്യർക്കെതിരായ സൈനിക നടപടികൾ നടക്കുമ്പോൾ ആങ് സാൻ സൂചിയായിരുന്നു മ്യാൻമറിന്റെ ഭരണത്തലവൻ.