ന്യൂഡൽഹി: ജന്തർ മന്തറിൽ പ്രതിഷേധത്തിന് അനുമതി നൽകാത്തതിനെ തുടർന്ന് അവിടേക്ക് നുഴഞ്ഞുകയറി സിജെപി പ്രവർത്തകരുടെ മിന്നൽ പ്രതിഷേധം. ജന്തർ മന്തറിൽ ഒരുതരത്തിലുമുള്ള പ്രതിഷേധത്തിന് അനുമതി നൽകിയിരുന്നില്ല. ഇതിനിടെ കഴിഞ്ഞദിവസം സമരം നടത്താനുള്ള സ്ഥലങ്ങളുടെ പട്ടികയിൽ നിന്ന് ജന്തർ മന്തറിനെ ഡൽഹി പോലീസ് ഒഴിവാക്കുകയും ചെയ്തിരുന്നു. ഈ സാഹചര്യത്തിലാണ് പ്രതിഷേധം. സിജെപിയുടെ ഔദ്യോഗിക യൂട്യൂബ് ചാനലിലൂടെ തത്സമയം ഇതിന്റെ ദൃശ്യങ്ങൾ പുറത്തുവിട്ടതോടെയാണ് പ്രതിഷേധവിവരം പോലീസ് അറിഞ്ഞത്.
പ്രതിഷേധക്കാർ എത്താതിരിക്കാൽ ഒരാളേക്കാൾ പൊക്കമുള്ള ബാരിക്കേഡുകൾ സ്ഥാപിച്ചാണ് ഇവിടേക്കുള്ള പ്രവേശനം ഡൽഹി പോലീസ് തടഞ്ഞിരുന്നത്. എന്നാൽ ജന്തർ മന്തറിന് പിറകുവശത്തെ ഗേറ്റിന് സമീപം എൻഡിഎ സഖ്യകക്ഷിയാ ജെഡിയുവിന് അനുവദിച്ച ഓഫീസിന്റെ മുറ്റത്തുകൂടി ജന്തർ മന്തറിലേക്ക് കയറാൻ കഴിയുന്ന വഴിയുണ്ട്. ഇതിലൂടെയാണ് സിജെപി നേതാക്കളായ അശുതോള റങ്ക, സൗരവ് ദാസ്, അജിങ്ക്യ ഷിൻഡെ എന്നിവരുടെ നേതൃത്വത്തിലാണ് ഡൽഹി പോലീസിനെ ഞെട്ടിച്ച മിന്നൽ പ്രതിഷേധം നടത്തിയത്. ത്രിവർണ പതാകയുമായാണ് ഇവർ ജന്തർമന്തറിലേക്ക് കയറിയത്. ഇവരെ അപ്പോൾ തന്നെ പോലീസ് കസ്റ്റഡിയിലെടുത്തു.
അതേസമയം ജന്തർ മന്തറിനെ സമര വേദികളിൽ നിന്ന് ഒഴിവാക്കിയതിനെതിരെ സിജെപി രംഗത്ത് വന്നിരുന്നു. സിജെപിയുടെ ആദ്യത്തെ സമരം നടന്നത് ജന്തർ മന്തറിലായിരുന്നു. ജന്തർ മന്തറിൽ സമരത്തിനുള്ള തീയതി അനുവദിക്കണമെന്ന് ആവശ്യപ്പെട്ട് തിങ്കളാഴ്ചയാണ് സിജെപി പോലീസിന് അപേക്ഷ നൽകിയത്. 24 മണിക്കൂറിനുള്ളിൽ തീരുമാനമുണ്ടായില്ലെങ്കിൽ സ്വന്തം നിലയ്ക്ക് പ്രതിഷേധം ആരംഭിക്കുമെന്ന് മുന്നറിയിപ്പും നൽകിയിരുന്നു. എന്നാൽ ഒരു മണിക്കൂറിനുള്ളിൽ ജന്തർ‌മന്തർ സമരവേദിയല്ലെന്നുള്ള വിജ്ഞാപനം പോലീസ് ഇറക്കുകയായിരുന്നു. സിജെപി അനുവദിച്ച 24 മണിക്കൂർ സമയം അവസാനിക്കാനിരിക്കെയാണ് ജന്തർമന്തറിലേക്ക് പ്രവർത്തകർ അപ്രതീക്ഷിതമായ എൻട്രി നടത്തിയത്.
