ന്യൂഡൽഹി: ജന്തർ മന്തറിൽ നടന്ന പ്രതിഷേധത്തിനിടെ യുവതിയുടെ ചിത്രം നിർമിത ബുദ്ധി ഉപയോഗിച്ച് മോർഫ് ചെയ്ത് പ്രചരിപ്പിച്ചെന്ന പരാതിയിൽ ഇടപെട്ട് ഡൽഹി ഹൈക്കോടതി. കോക്രോച്ച് ജനത പാർട്ടി (സി.ജെ.പി) നേതാക്കളായ സൗരവ് ദാസ്, അഭിജീത് ദിപ്‌കെ, അശുതോഷ് റങ്ക, രത്‌ന സിങ് എന്നിവർക്ക് കോടതി നോട്ടീസ് അയച്ചു.
യുവതിയുടെ ചിത്രം എഐയും ഫേസ്-സ്വാപ്പ് സാങ്കേതികവിദ്യയും ഉപയോഗിച്ച് മോർഫ് ചെയ്ത് പ്രധാനമന്ത്രി നരേന്ദ്ര മോദിയുടെ ചിത്രത്തിനൊപ്പം ചേർത്തുവെന്നതാണ് പരാതി. ചിത്രം പ്രതിഷേധ വേദിയിലെ ബാനറുകളിലും പോസ്റ്ററുകളിലും പ്രദർശിപ്പിക്കുകയും പിന്നീട് സമൂഹമാധ്യമങ്ങളിലൂടെ പ്രചരിപ്പിക്കുകയും ചെയ്തതായും പരാതിയിൽ പറയുന്നു.
സംഭവത്തിൽ ഡൽഹി പൊലീസ് അജ്ഞാതർക്കെതിരെ എഫ്.ഐ.ആർ രജിസ്റ്റർ ചെയ്തിട്ടുണ്ട്. എന്നാൽ പരാതിയിൽ പേരെടുത്ത് പറഞ്ഞ സി.ജെ.പി നേതാക്കളെ എഫ്.ഐ.ആറിൽ പ്രതികളായി ഉൾപ്പെടുത്തിയിട്ടില്ല. നേതാക്കളുടെ വിശദീകരണം തേടിയാണ് ഹൈക്കോടതി നോട്ടീസ് നൽകിയത്. പരാതിയിലെ ആരോപണങ്ങൾ ഇതുവരെ കോടതിയിൽ തെളിയിക്കപ്പെട്ടിട്ടില്ല.
മോർഫ് ചെയ്ത ചിത്രങ്ങളും അതുമായി ബന്ധപ്പെട്ട ലിങ്കുകളും നീക്കം ചെയ്യുന്നതിനുള്ള നടപടികൾ സ്വീകരിക്കണമെന്നും ഹർജിയിൽ ആവശ്യപ്പെട്ടിട്ടുണ്ട്. സംഭവത്തിൽ യുവതിക്ക് പൊലീസ് സംരക്ഷണം നൽകണമെന്നും ഡൽഹി പൊലീസിനോട് കോടതി നിർദേശിച്ചു. സംഭവവുമായി ബന്ധപ്പെട്ട് രണ്ടാഴ്ചയ്ക്കകം സ്ഥിതി റിപ്പോർട്ട് സമർപ്പിക്കാനും പൊലീസിനോട് കോടതി ആവശ്യപ്പെട്ടിട്ടുണ്ട്.
