പാലക്കാട്: വനിതാ പോലീസുദ്യോഗസ്ഥയുടെ വീട്ടിൽ നിർത്തിയിട്ടിരുന്ന ബൈക്ക് മോഷ്ടിച്ച കേസിലെ പ്രധാന പ്രതി അറസ്റ്റിൽ. പുതുക്കോട് മണപ്പാടം കണക്കന്നൂർ സ്വദേശി രാജി എന്ന ഷിജുവിനെയാണ് വടക്കഞ്ചേരി പോലീസ് പിടികൂടിയത്. കേസിലെ മറ്റൊരു പ്രതിയായ തമിഴ്നാട് സ്വദേശി മാതേഷിനെ നേരത്തേ അറസ്റ്റ് ചെയ്തിരുന്നു.
കഴിഞ്ഞ ജൂലൈ 18-നാണ് വടക്കഞ്ചേരി പോലീസ് സ്റ്റേഷനിലെ വനിതാ ഉദ്യോഗസ്ഥയുടെ മണപ്പാണത്തുള്ള വീട്ടിൽനിന്ന് രാത്രി ബൈക്ക് മോഷണം പോയത്. തുടർന്ന് നടത്തിയ അന്വേഷണത്തിൽ മൂന്ന് ദിവസത്തിനുള്ളിൽ തമിഴ്നാട്ടിൽനിന്ന് ബൈക്ക് കണ്ടെത്തി.
ബൈക്ക് കൈവശംവെച്ചിരുന്ന മാതേഷിനെ ചോദ്യം ചെയ്തപ്പോഴാണ് മണപ്പാടം സ്വദേശിയായ ഷിജുവാണ് ബൈക്ക് മോഷ്ടിച്ച് മാതേഷിന് കൈമാറിയതെന്ന് പോലീസിന് വിവരം ലഭിച്ചത്. തുടർന്ന് നടത്തിയ അന്വേഷണത്തിൽ കഴിഞ്ഞ ദിവസം മണപ്പാടത്തുനിന്ന് ഷിജുവിനെ പിടികൂടുകയായിരുന്നു.
ഇരുവരും മുമ്പ് നിരവധി കഞ്ചാവ് കേസുകളിലും വാഹനമോഷണക്കേസുകളിലും പ്രതികളായിരുന്നുവെന്ന് വടക്കഞ്ചേരി പോലീസ് അറിയിച്ചു.
