ഹോളിവുഡ്: സ്പൈഡര്‍മാന്‍ ചിത്രങ്ങളിലൂടെ പ്രശസ്തനായ ടോം ഹോളണ്ട് ക്രിസ്റ്റഫർ നോളന്‍റെ ഏറ്റവും പുതിയ ചിത്രത്തില്‍ അഭിനയിക്കുന്നു. യൂണിവേഴ്‌സൽ പിക്‌ചേഴ്‌സ് വിതരണം ചെയ്യുന്ന പ്രൊജക്റ്റിന്‍റെ കൂടുതല്‍ വിവരങ്ങള്‍ ലഭ്യമല്ല. നോളൻ തിരക്കഥയെഴുതി സംവിധാനം ചെയ്യുന്ന പ്രൊജക്ട് 2026 ജൂലൈയിൽ റിലീസ് ചെയ്യും എന്നാണ് വിവരം. മറ്റൊരു പ്രശസ്ത താരമായ മാറ്റ് ഡാമണും ചിത്രത്തില്‍ പ്രധാന വേഷത്തില്‍ എത്തുന്നുണ്ട്.
നോളന് ആദ്യമായി മികച്ച സംവിധാനത്തിലുള്ള ഓസ്‌ക്കാർ അവാർഡ് ലഭിച്ചതും യൂണിവേഴ്‌സൽ പിക്‌ചേഴ്‌സുമായി സഹകരിച്ച് അദ്ദേഹം അവസാനം ചെയ്ത സിനിമയായി ഒപ്പെൻഹെയ്‌മർനായിരുന്നു. ലോകമെമ്പാടും 976 മില്യൺ ഡോളർ സമ്പാദിച്ച ചിത്രം വന്‍ വിജയമാണ് നേടിയത്.
2020ന്‍റെ അവസാനത്തിൽ ദീർഘകാലം നോളന് സഹകരിച്ച വാർണർ ബ്രദേഴ്‌സുമായി വേർപിരിഞ്ഞതിന് ശേഷമാണ് യൂണിവേഴ്സലിനൊപ്പം സഹകരിക്കാന്‍ ആരംഭിച്ചത്. ഓപന്‍ഹെയ്മര്‍ ആയിരുന്നു ആദ്യത്തെ ഇവരുടെ ചിത്രം. പിന്നാലെയാണ് പുതിയ പ്രൊജക്ട് വരുന്നത്.
എന്താണ് കഥയുടെ വിശദാംശങ്ങൾ എന്ന് ഇതുവരെ വെളിവായിട്ടില്ല. എന്നാല്‍ ഒരു പിരീയിഡ് ഡ്രാമയാണ് ചിത്രം എന്ന് ചില ഹോളിവുഡ് മാധ്യമങ്ങള്‍ സൂചന നല്‍കുന്നത്. സിൻകോപ്പി ബാനറിനു വേണ്ടി പ്രൊഡക്ഷൻ പാർട്ണറും ഭാര്യയുമായ എമ്മ തോമസിനൊപ്പം ക്രിസ്റ്റഫര്‍ നോളന് തന്നെയാണ് ചിത്രം നിര്‍മ്മിക്കുന്നത്.
