ശബരിമലയിലെ വിഷയത്തില്‍ എന്‍എസ്എസ് നിലപാട് തിരുത്തണമെന്ന് കോടിയേരി ബാലകൃഷ്ണന്‍

കോഴിക്കോട്: ശബരിമലയിലെ സ്ത്രീപ്രവേശ വിഷയത്തില്‍ എന്‍എസ്എസ് നിലപാട് തിരുത്തണമെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍. മന്നത്തു പത്മനാഭന്‍ മുന്നോട്ടുവച്ച ആശയങ്ങള്‍ക്ക് എതിരാണ് ഇപ്പോഴത്തെ നിലപാട്. നവോത്ഥാനമൂല്യങ്ങള്‍ എന്‍എസ്എസ് ഉയര്‍ത്തിപ്പിടിക്കണമെന്നും കോടിയേരി ആവശ്യപ്പെട്ടു. ആര്‍എസ്എസ് അനുകൂല നിലപാട് എന്‍എസ്എസ് സ്വീകരിക്കുമെന്നു കരുതുന്നില്ലെന്നും കോടിയേരി പറഞ്ഞു. നിയമവിരുദ്ധപ്രവര്‍ത്തനങ്ങള്‍ ആരു നടത്തിയാലും അവര്‍ക്കെതിരെ കേസ് എടുക്കും. അതു പൊലീസിന്റെ സ്വാഭാവിക നടപടിയാണ്. നാമജപം നടത്തിയെന്ന പേരില്‍ ആരെയും പൊലീസ് അറസ്റ്റ് ചെയ്തിട്ടില്ല. ആക്രമണം അഴിച്ചുവിട്ടവരെയാണ് അറസ്റ്റ് ചെയ്തത്. നാമജപം നടത്തിയവരെ ബുദ്ധിമുട്ടിക്കില്ല. പക്ഷേ അക്രമം നടത്തിയവരെ നാമജപം നടത്തിയതിന്റെ പേരില്‍ മാത്രം നിയമനടപടികളില്‍നിന്ന് ഒഴിവാക്കാനാവില്ലെന്നും കോടിയേരി ബാലകൃഷ്ണന്‍ പറഞ്ഞു.