കീവ്: റഷ്യ- യുക്രൈൻ യുദ്ധത്തിന്റെ ഭീകരത വീണ്ടും ലോകത്തിന്റെ ശ്രദ്ധയിൽ. ഇത്തവണ യുക്രൈൻ ടെന്നിസ് താരം ഡയാന യാസ്ത്രെംസ്കയ്ക്കാണ് റഷ്യൻ ആക്രമണത്തിന്റെ ദുരിതം നേരിടേണ്ടിവന്നത്. ശനിയാഴ്ച യുക്രൈനിലെ ഒഡേസയിൽ റഷ്യ നടത്തിയ മിസൈൽ, ഡ്രോൺ ആക്രമണത്തിൽ വ്യാപക നാശനഷ്ടങ്ങളുണ്ടായി. ആക്രമണത്തിനിടെ യാസ്ത്രെംസ്കയുടെ കുടുംബവീടും തകർന്നു. റഷ്യ വിക്ഷേപിച്ച കലിബർ ക്രൂസ് മിസൈൽ നേരിട്ട് പതിച്ചാണ് ഒഡേസയിലെ അവരുടെ അപ്പാർട്ട്മെന്റ് തകർന്നതെന്ന് താരം വ്യക്തമാക്കി.
ആക്രമണത്തിന് പിന്നാലെയുള്ള നാശനഷ്ടങ്ങളുടെ ചിത്രങ്ങൾ യാസ്ത്രെംസ്ക സമൂഹമാധ്യമങ്ങളിൽ പങ്കുവച്ചു. വീടിന്റെ ഭൂരിഭാഗവും തകർന്ന നിലയിലുള്ള ദൃശ്യങ്ങളാണ് ചിത്രങ്ങളിലുള്ളത്. എന്നാൽ ആകെ നശിച്ച വീടിനുള്ളിൽ നിന്ന് ഒരു വസ്തു മാത്രം കേടുപാടുകളില്ലാതെ അവശേഷിച്ചു. ഫ്രഞ്ച് ഓപ്പണിന്റെ മറ്റൊരു പേരായ റോളണ്ട് ഗാരോസിന്റെ ടവലായിരുന്നു അത്.
“ഇന്ന് രാത്രി. ഇതാണ് ‘റഷ്യൻ ലോകം’ എങ്ങനെയാണെന്ന് കാണിക്കുന്നത്. കലിബർ ക്രൂസ് മിസൈൽ നേരിട്ട് പതിച്ചു. ഒരു റഷ്യൻ മിസൈൽ ഒഡേസയിലെ ഞങ്ങളുടെ അപ്പാർട്ട്മെന്റ് തകർത്തു. അതിജീവിച്ചത് റോളണ്ട് ഗാരോസ് ടവൽ മാത്രം,” 2024 ഓസ്ട്രേലിയൻ ഓപ്പൺ സെമിഫൈനലിസ്റ്റായ യാസ്ത്രെംസ്ക ഇൻസ്റ്റഗ്രാമിൽ കുറിച്ചു.
Related Post
റഷ്യൻ ആക്രമണത്തിൽ തകർന്നത് തന്റെ വീടാണെങ്കിലും ലോക ടെന്നിസിന്റെ ഒരു ഭാഗം അതിനിടയിലും അതിജീവിച്ചുവെന്നായിരുന്നു താരത്തിന്റെ പ്രതികരണം. സംഭവത്തിൽ വിമർശനവുമായി വനിതാ ടെന്നിസ് അസോസിയേഷനായ ഡബ്ല്യുടിഎയോടും അന്താരാഷ്ട്ര ടെന്നിസ് ഫെഡറേഷനായ ഐടിഎഫിനോടും യാസ്ത്രെംസ്ക പിന്തുണ ആവശ്യപ്പെട്ടു.
“ഒരു റഷ്യൻ മിസൈലിനെ അതിജീവിച്ചത് ലോക ടെന്നിസിന്റെ ഒരു ഭാഗമാണ്. ഞങ്ങളുടെ വീട് അതിജീവിച്ചില്ല. ഈ ചിത്രങ്ങൾ ഞങ്ങളുടെ കണ്ണുകളിലൂടെ നോക്കൂ. നിങ്ങളുടെ ‘നിഷ്പക്ഷത’യുടെ യഥാർഥ അർഥം ഇതാണ് — യുക്രൈൻ ഭാഗത്തുനിന്നുള്ള കാഴ്ച,” എന്നായിരുന്നു ഡബ്ല്യുടിഎയെയും ഐടിഎഫിനെയും ടാഗ് ചെയ്ത് യാസ്ത്രെംസ്കയുടെ പ്രതികരണം.
റഷ്യൻ ആക്രമണത്തിന്റെ ഇരയാകുന്നത് യാസ്ത്രെംസ്കയ്ക്ക് ഇതാദ്യമല്ല. 2024 ഡിസംബർ 31-നും റഷ്യൻ ആക്രമണത്തിൽ തന്റെ കുടുംബത്തിന് നേരിട്ട ദുരിതത്തെക്കുറിച്ച് താരം വെളിപ്പെടുത്തിയിരുന്നു. അന്ന് തന്റെ മുത്തശ്ശി താമസിച്ചിരുന്ന കെട്ടിടത്തിനും കേടുപാടുകൾ സംഭവിച്ചതായി യാസ്ത്രെംസ്ക അറിയിച്ചിരുന്നു.
യുക്രൈനിലെ റഷ്യൻ അധിനിവേശത്തിന്റെ പശ്ചാത്തലത്തിൽ രാജ്യത്തെ നിരവധി കായികതാരങ്ങൾ നേരിട്ട ദുരിതങ്ങളുടെ മറ്റൊരു ഉദാഹരണമായിരിക്കുകയാണ് യാസ്ത്രെംസ്കയുടെ അനുഭവം. 2026 ഓഗസ്റ്റിലാണ് താരം അവസാനമായി കോർട്ടിലിറങ്ങിയത്. 2026 യുഎസ് ഓപ്പണിന്റെ ആദ്യ റൗണ്ടിൽ ഇറ്റലിയുടെ ലുക്രേസിയ സ്റ്റെഫാനിനിയോട് തോൽക്കുകയായിരുന്നു യാസ്ത്രെംസ്ക.
View this post on Instagram
