ന്യൂഡൽഹി: ബോളിവുഡ് ചിത്രം ‘രാമായണ’യുടെ പ്രദർശനം നിർത്തിവയ്ക്കണമെന്ന് ആവശ്യപ്പെട്ട് വിശ്വഹിന്ദു പരിഷത്ത് (വിഎച്ച്പി). യഥാർത്ഥ രാമായണത്തെ വളച്ചൊടിക്കാനുള്ള ഗൂഢാലോചനയാണ് സിനിമയിലൂടെ നടക്കുന്നതെന്ന് സംഘടന ആരോപിച്ചു. ചിത്രത്തിന്റെ പ്രദർശനം അടിയന്തരമായി തടയണമെന്നും അനുവദിച്ച സെൻസർ സർട്ടിഫിക്കറ്റ് റദ്ദാക്കണമെന്നും വിഎച്ച്പി ആവശ്യപ്പെട്ടു.
യാഥാർഥ്യങ്ങൾ മറച്ചുവെച്ചും ഇല്ലാത്ത കാര്യങ്ങൾ കൂട്ടിച്ചേർത്തും പ്രധാനപ്പെട്ട കഥാപാത്രങ്ങളെ ഒഴിവാക്കിയുമാണ് സിനിമ ഒരുക്കിയിരിക്കുന്നതെന്നാണ് സംഘടനയുടെ വിമർശനം. രാവണനെ മഹത്വവൽക്കരിക്കാനുള്ള ബോധപൂർവമായ ശ്രമം ചിത്രത്തിലുണ്ടെന്നും ശ്രീരാമന്റെ മഹത്വം വ്യക്തമാക്കുന്ന പ്രധാന ഭാഗങ്ങളിൽ പലതും സിനിമയിൽനിന്ന് ഒഴിവാക്കിയെന്നും വിഎച്ച്പി ആരോപിച്ചു. സിനിമയ്ക്കു പിന്നിൽ രാഷ്ട്രീയ പ്രേരിതമായ നീക്കങ്ങളുണ്ടെന്നും സംഘടന കുറ്റപ്പെടുത്തി.