തിരുവനന്തപുരം: ഭാര്യയോട് സംസാരിച്ചതിനു അയൽവാസിയെ വെട്ടിക്കൊലപ്പെടുത്താൻ ശ്രമിച്ചയാളെ കീഴ്പ്പെടുത്തി പൊലീസിലേൽപ്പിച്ച് നാട്ടുകാർ. തിരുവനന്തപുരം വെട്ടുകാട് ഇന്നലെ രാത്രിയാണ് സംഭവം നടന്നത്. ഭാര്യയോടു സംസാരിക്കുന്നതു കണ്ട് വെട്ടുകാട് സ്വദേശി ജോസ് അലോഷ്യസ് വെട്ടുകത്തി ഉപയോഗിച്ച് അയൽവാസി ഗോഡ്ഫ്രിയെ ആക്രമിക്കുകയായിരുന്നു. ജോസിന്റെ ഭാര്യയും ഗോഡ്ഫ്രിയും തമ്മിൽ സംസാരിച്ചതാണ് പെട്ടെന്നുണ്ടായ പ്രകോപനത്തിന് കാരണമെന്നാണു അറിയുന്നത്.
വെട്ടുകാട് പള്ളിയോട് ചേർന്നുള്ള കടലിനടുത്ത് നിൽക്കുകയായിരുന്ന ഗോഡ്ഫ്രിയെ വെട്ടിവീഴ്ത്താനായിരുന്നു ജോസിന്റെ ശ്രമം. ജോസ് വെട്ടുകത്തിയുമായി എത്തുന്നത് കണ്ട് ഗോഡ്ഫ്രി ഓടി രക്ഷപ്പെടാൻ ശ്രമിച്ചെങ്കിലും നിലത്തുവീണതോടെ കാൽ വെട്ടിയെടുക്കാൻ ശ്രമിക്കുകയായിരുന്നു. തടയാൻ ശ്രമിച്ച ഭാര്യയെയും ജോസ് ആക്രമിച്ചു. ഇതിനിടെ ബഹളം കേട്ട് ഓടിയെത്തിയ നാട്ടുകാർ മണൽ വാരിയെറിഞ്ഞ് ജോസിനെ തടയാൻ ശ്രമിച്ചു. കണ്ണിൽ മണൽ വീണതോടെ കാഴ്ച മറഞ്ഞ ജോസിനെ നാട്ടുകാർ കീഴ്പ്പെടുത്തി പൊലീസിനു കൈമാറുകയായിരുന്നു. ജോസിനെതിരെ പൊലീസ് വധശ്രമത്തിനു കേസെടുത്തു. കോടതിയിൽ ഹാജരാക്കിയ ജോസിനെ റിമാൻഡ് ചെയ്യുകയും ചെയ്തു.