പട്ടാമ്പി: നാട്ടിൽ നടക്കുന്ന മോഷണ വാർത്തകൾ കേട്ട്, കള്ളൻമാരെ പേടിച്ച് ഭാര്യ സ്വർണം ഒളിപ്പിച്ചുവച്ചത് ഭർത്താവിന്റെ പഴയ ഷൂവിനുള്ളിൽ. ഭാര്യയുടെ ഐഡിയയറിയാതെ പഴയ ഷൂ മാലിന്യത്തിനൊപ്പം സ്വർണവും ഹരിതകർമസേനയ്ക്കു കൈമാറി ഭർത്താവ് മണിക്കൂറുകൾ നീണ്ട തിരച്ചിലിനൊടുവിൽ, റോഡരികിൽ സൂക്ഷിച്ചിരുന്ന മാലിന്യച്ചാക്കിൽ നിന്നു ഹരിതകർമസേനാംഗങ്ങൾ തന്നെ ഷൂവും സ്വർണവും കണ്ടെത്തി.
പട്ടാമ്പി ഹാർമണി സ്ട്രീറ്റിൽ താമസിക്കുന്ന അധ്യാപകദമ്പതികളായ പള്ളിപ്പറമ്പിൽ ജോണിന്റെയും ബീനയുടെയും സ്വർണമാണു തിരികെക്കിട്ടിയത്. ആലപ്പുഴ സ്വദേശിയായ ജോൺ പെരുമുടിയൂർ ഗവ. ഓറിയന്റൽ സ്കൂളിലെയും ഭാര്യ ബീന ആലിക്കപറമ്പ് ഗവ. എൽപി സ്കൂളിലെയും അധ്യാപകരാണ്. വിവാഹമോതിരം, കുട്ടികളുടെ മോതിരങ്ങൾ, മാല, കമ്മലുകൾ എന്നിവ ഉൾപ്പെടെ രണ്ടരപ്പവനോളം വരുന്ന ആഭരണങ്ങളാണു ബീന ഭർത്താവിന്റെ പഴയ ഷൂവിനുള്ളിൽ ആരുമറിയാതെ സൂക്ഷിച്ചു വച്ചിരുന്നത്. വീട്ടിൽ ശുദ്ധികലശത്തിനിറങ്ങിയ ജോൺ ഷൂ ഹരിതകർമസേനയ്ക്കു കൈമാറുകയായിരുന്നു.
സ്കൂളുവിട്ട് വീട്ടിലെത്തിയപ്പോഴാണു സംഭവം ബീന അറിഞ്ഞത്. തുടർന്നു ഭർത്താവിനോടു വിവരം പറയുകയും വാർഡ് മെംബർ സുബ്രഹ്മണ്യനെയും ഹരിതകർമസേനയെയും അറിയിക്കുകയുമായിരുന്നു. ശേഖരിച്ച മാലിന്യങ്ങൾ ചാക്കുകളിലാക്കിയിരുന്നതിനാൽ വിശദമായ തിരച്ചിലിനൊടുവിൽ പിറ്റേന്നാണു ഷൂവും സ്വർണവും കണ്ടെത്തിയത്. ആലപ്പുഴ സ്വദേശിയായ ജോണും ബീനയും എട്ടു വർഷമായി പട്ടാമ്പി ഹാർമണി സ്ട്രീറ്റിലാണു താമസിക്കുന്നത്.
ഹരിതകർമസേനാംഗങ്ങൾ, വാർഡ് അംഗം കെ.സുബ്രഹ്മണ്യൻ, നഗരസഭാ ജീവനക്കാർ എന്നിവരുടെ സാന്നിധ്യത്തിൽ നഗരസഭാധ്യക്ഷൻ ടി.പി.ഷാജി ഇന്നലെ സ്വർണം ജോണിനു കൈമാറി. വൃത്തിയിലും ശുചിത്വത്തിലും മാത്രമല്ല, വിശ്വാസ്യതയിലും ഒന്നാമതാണെന്നു ഹരിതകർമസേനാംഗങ്ങൾ തെളിയിച്ചതായി നഗരസഭാധ്യക്ഷൻ പറഞ്ഞു.
