ഫുജൈറ: വാഹനാപകടത്തിൽ ഇരട്ടക്കുട്ടികളെയും കൊച്ചുമകനെയും നഷ്ടപ്പെട്ട പ്രവാസി മലയാളി സിദ്ദീഖ് തുപ്പിലിക്കാട്ട് മൊയ്തീന്റെ കുടുംബത്തെ സന്ദർശിച്ച് ഫുജൈറ കിരീടാവകാശി ശൈഖ് മുഹമ്മദ് ബിൻ ഹമദ് അൽ ഷർഖി. കുടുംബാംഗങ്ങളെ നേരിൽക്കണ്ട് അദ്ദേഹം അനുശോചനം അറിയിച്ചു. അപകടത്തിൽ പ്രിയപ്പെട്ടവരെ നഷ്ടപ്പെട്ട കുടുംബത്തിന്റെ ദുഃഖത്തിൽ പങ്കുചേരുന്നതായും അറിയിച്ചു.
വ്യാഴാഴ്ച ഫുജൈറയിലെ ശൈഖ് ഖലീഫ ബിൻ സായിദ് റോഡിലുണ്ടായ വൻ വാഹനാപകടത്തിൽ 14 പേരാണ് മരിച്ചത്. അടുത്തകാലത്ത് യുഎഇയിലുണ്ടായ ഏറ്റവും വലിയ വാഹനാപകടങ്ങളിലൊന്നാണിത്. മരിച്ചവരുടെ തിരിച്ചറിയൽ നടപടികൾ പൂർത്തിയായതായി യുഎഇ ആഭ്യന്തര മന്ത്രാലയം ശനിയാഴ്ച പുറത്തിറക്കിയ പ്രസ്താവനയിൽ സ്ഥിരീകരിച്ചു. മരിച്ചവരിൽ പത്തുപേർ യുഎഇ സ്വദേശികളും നാലുപേർ ഇന്ത്യക്കാരുമാണ്.
ആദ്യ അപകടത്തിൽപ്പെട്ടവരുടെ രക്ഷാപ്രവർത്തനത്തിനായി റോഡിൽ നിർത്തിയിട്ടിരുന്ന വാഹനങ്ങളിലേക്ക് പിന്നാലെയെത്തിയ വാഹനങ്ങൾ ഇടിച്ചുകയറിയാണ് രണ്ടാമത്തെ അപകടമുണ്ടായത്. മലപ്പുറം സ്വദേശികളായ മുഹമ്മദ് അസ്മിൽ, മിസ്ന ജുബിൻ, മുഹമ്മദ് ഫായിസ് എന്നിവരാണ് ആദ്യ അപകടത്തിൽ മരിച്ചത്. യുഎഇ സന്ദർശനത്തിനെത്തിയ ഗുജറാത്ത് കുടുംബം മടക്കയാത്രയ്ക്കായി ഫുജൈറ വിമാനത്താവളത്തിലേക്ക് പോകുന്നതിനിടെയാണ് രണ്ടാമത്തെ അപകടമുണ്ടായത്. ഗുജറാത്ത് സ്വദേശിയായ 13 വയസ്സുകാരനും അപകടത്തിൽ മരിച്ചു.
അപകടത്തിൽ 30 പേർക്ക് പരിക്കേറ്റു. പരിക്കേറ്റവരിൽ ഏഴുപേർ ഇന്ത്യക്കാരാണ്. എട്ടുപേർ യുഎഇ സ്വദേശികളും ആറുപേർ ഒമാൻ സ്വദേശികളുമാണ്. മൂന്ന് ഈജിപ്ത് സ്വദേശികൾ, രണ്ടുപേർ വീതം ജോർദാൻ, പാകിസ്ഥാൻ, ബ്രസീൽ സ്വദേശികൾ എന്നിവർക്കും പരിക്കേറ്റിട്ടുണ്ട്.
