ന്യൂഡൽഹി: കോൺഗ്രസിൽ രാഹുൽ ഗാന്ധിയുടെയും പ്രിയങ്ക ഗാന്ധിയുടെയും നേതൃത്വത്തിൽ രണ്ട് വിരുദ്ധ ചേരികൾ രൂപപ്പെട്ടിട്ടുണ്ടെന്നും ആഭ്യന്തര ഭിന്നത രൂക്ഷമാണെന്നും ആരോപിച്ച് ബിജെപി. പ്രിയങ്കയുടെ രാഷ്ട്രീയ വളർച്ചയിൽ ആശങ്കയുള്ളതിനാൽ, ഇന്ത്യാ മുന്നണി അടുത്തിടെ സംഘടിപ്പിച്ച പ്രതിഷേധ പരിപാടികളിൽ സംസാരിക്കാൻ രാഹുൽ ഗാന്ധി സഹോദരിയെ ബോധപൂർവം അനുവദിച്ചില്ലെന്നാണ് ബിജെപി വക്താക്കളായ സംബിത് പാത്രയും പ്രദീപ് ഭണ്ഡാരിയും ആരോപിച്ചത്.
പ്രതിഷേധ പരിപാടികൾ ഗാന്ധി കുടുംബത്തിനുള്ളിലെ മത്സരവും ഭയവും പുറത്തുകൊണ്ടുവന്നതായി സംബിത് പാത്ര പറഞ്ഞു. രണ്ട് പരിപാടികളിലും സംസാരിക്കാൻ അവസരം ലഭിക്കാത്തതിൽ പ്രിയങ്ക അസ്വസ്ഥയായിരുന്നുവെന്നും എംപിമാർ പോലുമല്ലാത്ത നിരവധി പേർക്ക് സംസാരിക്കാൻ അവസരം നൽകിയിട്ടും പ്രിയങ്കയെ ഒഴിവാക്കിയെന്നും അദ്ദേഹം ആരോപിച്ചു.
പ്രിയങ്ക ഉയർന്നുവന്നാൽ താൻ രാഷ്ട്രീയമായി പാർശ്വവത്കരിക്കപ്പെടുമെന്ന് രാഹുൽ ഭയപ്പെടുന്നുണ്ടോ എന്ന ചോദ്യവും പാത്ര ഉന്നയിച്ചു. ഗാന്ധി കുടുംബത്തിനുള്ളിൽ പ്രിയങ്കയുടെ അവസരങ്ങളും വോട്ടുകളും നഷ്ടപ്പെടുകയാണോ എന്ന പരിഹാസവും അദ്ദേഹം നടത്തി.
കോൺഗ്രസിൽ ‘രാഹുൽ ക്യാമ്പ്’, ‘പ്രിയങ്ക ക്യാമ്പ്’ എന്നിങ്ങനെ രണ്ട് വിഭാഗങ്ങൾ രൂപപ്പെട്ടിട്ടുണ്ടെന്നാണ് ബിജെപി വക്താവ് പ്രദീപ് ഭണ്ഡാരിയുടെ ആരോപണം. പാർട്ടിയുടെ മുൻ ജനറൽ സെക്രട്ടറിയെന്ന നിലയിൽ മുതിർന്ന പദവിയുണ്ടായിരുന്നിട്ടും രാംലീല മൈതാനത്തെ റാലിയിൽ സംസാരിക്കാൻ പ്രിയങ്കയ്ക്ക് അവസരം നൽകിയില്ലെന്ന് അദ്ദേഹം പറഞ്ഞു.
മോക്ക് പാർലമെന്റ് നടപടികളിലും പ്രിയങ്കയെ രണ്ടാം നിരയിൽ ഇരുത്തുകയും സംസാരിക്കാൻ സമയം അനുവദിക്കാതിരിക്കുകയും ചെയ്തതായി ഭണ്ഡാരി ആരോപിച്ചു. കോൺഗ്രസിലെ ആഭ്യന്തര അധികാരമത്സരത്തിന്റെ തെളിവുകളായാണ് ഈ സംഭവങ്ങളെ ബിജെപി നേതാക്കൾ ഉയർത്തിക്കാട്ടുന്നത്.
