തിരുവനന്തപുരം: ഇന്നത്തെ മാർക്‌സിസ്റ്റ് പാർട്ടിയെ കടുപ്പമേറിയ അച്ചടക്ക നിലവാരത്തിലേക്ക് കൊണ്ടുവന്നത് മുഖ്യമന്ത്രി പിണറായി വിജയനാണെന്ന് മുതിർന്ന കോൺഗ്രസ് നേതാവും നിയമസഭാ സ്പീക്കറുമായ തിരുവഞ്ചൂർ രാധാകൃഷ്ണൻ. പാർട്ടിക്കുള്ളിലെ കാര്യങ്ങളിൽ പിണറായി വിജയൻ സ്വീകരിച്ച ഉറച്ച നിലപാടുകളാണ് സിപിഎമ്മിനെ ഇന്നത്തെ അച്ചടക്കത്തിലേക്ക് എത്തിച്ചതെന്നാണ് തന്റെ ഉറച്ച വിശ്വാസമെന്നും അദ്ദേഹം പറഞ്ഞു.
വി.എസ്. അച്യുതാനന്ദനും പാർട്ടിക്കുള്ളിലെ കാര്യങ്ങളിൽ ഉറച്ച നിലപാടുകൾ സ്വീകരിച്ചിരുന്നെങ്കിലും അദ്ദേഹത്തിന്റെ പ്രവർത്തനശൈലി വ്യത്യസ്തമായിരുന്നുവെന്ന് തിരുവഞ്ചൂർ ചൂണ്ടിക്കാട്ടി. കെഎസ്‌വൈഎഫിൽ പ്രവർത്തിച്ചിരുന്ന കാലം മുതലുള്ള പിണറായിയുടെ രാഷ്ട്രീയ പ്രവർത്തനവും കണ്ണൂരിലെ സഖാക്കളും അദ്ദേഹത്തോടൊപ്പം ഉറച്ചുനിന്ന നേതാക്കളും കേരളത്തിലെ പാർട്ടിക്ക് കൂടുതൽ ശക്തി പകർന്നുവെന്നാണ് തന്റെ അഭിപ്രായമെന്നും അദ്ദേഹം വ്യക്തമാക്കി.
ഇ.എം.എസ്. നമ്പൂതിരിപ്പാട് ഉൾപ്പെടെയുള്ള മുൻ മുഖ്യമന്ത്രിമാരെ പരിചയമുണ്ടെങ്കിലും ഇ.കെ. നായനാർ മുഖ്യമന്ത്രിയായിരുന്ന കാലം മുതലാണ് അദ്ദേഹവുമായി കൂടുതൽ അടുപ്പമുണ്ടായതെന്ന് തിരുവഞ്ചൂർ പറഞ്ഞു. നായനാർ തികഞ്ഞ നിഷ്കളങ്കനായിരുന്നുവെന്നും പൊതുസദസ്സുകളിൽ ജനങ്ങൾക്കിടയിലേക്ക് ഇറങ്ങിച്ചെന്ന് അവരുടെ വിശേഷങ്ങൾ ചോദിച്ച് കുടുംബാംഗത്തെപ്പോലെ ഇടപഴകുന്ന അദ്ദേഹത്തിന്റെ രീതി ഏറെ ആകർഷിച്ചിരുന്നുവെന്നും അദ്ദേഹം ഓർത്തെടുത്തു.
ഏത് പൊതുപ്രവർത്തകനും അനുകരിക്കാൻ കഴിയുന്ന തരത്തിലുള്ളതായിരുന്നു നായനാരുടെ പ്രവർത്തനശൈലിയെന്നും തിരുവഞ്ചൂർ അഭിപ്രായപ്പെട്ടു. ജനങ്ങളുമായി നേരിട്ട് ഇടപഴകാനുള്ള അദ്ദേഹത്തിന്റെ കഴിവ് എടുത്തുപറയേണ്ടതാണെന്നും അദ്ദേഹം കൂട്ടിച്ചേർത്തു.
മാതൃഭൂമി ഡോട്ട് കോമിനുവേണ്ടി എം. വിജിൻ എംഎൽഎ നടത്തിയ പ്രത്യേക അഭിമുഖത്തിൽ വിവിധ മുഖ്യമന്ത്രിമാരുടെ രാഷ്ട്രീയശൈലികളെക്കുറിച്ച് സംസാരിക്കുകയായിരുന്നു തിരുവഞ്ചൂർ. പിണറായി വിജയന്റെയും ഇ.കെ. നായനാരുടെയും പ്രവർത്തനരീതികളെക്കുറിച്ചുള്ള തന്റെ നിരീക്ഷണങ്ങളും അദ്ദേഹം പങ്കുവച്ചു.
