തിരുവനന്തപുരം: പാർട്ടിയുടെ പ്രവർത്തനശൈലിയിൽ സമഗ്രമായ മാറ്റങ്ങൾ വരുത്തുന്നതിനായി വിപുലമായ സർവേയുമായി സിപിഎം കേന്ദ്ര കമ്മിറ്റി. കേന്ദ്ര കമ്മിറ്റി അംഗങ്ങൾക്കിടയിലാണ് സർവേ ആരംഭിച്ചിരിക്കുന്നത്. നേതാക്കളുടെ അഭിപ്രായങ്ങളും വിലയിരുത്തലുകളും തേടുന്നതിനായി 83 ചോദ്യങ്ങൾ ഉൾപ്പെടുത്തിയ ചോദ്യാവലിയാണ് കേന്ദ്ര കമ്മിറ്റി തയ്യാറാക്കിയിരിക്കുന്നത്.
പാർട്ടിയുടെ പ്രവർത്തനശൈലിയിൽ ഉണ്ടായ പ്രത്യയശാസ്ത്രപരമായ വ്യതിചലനങ്ങൾ, തീരുമാനങ്ങളിലെ വീഴ്ചകൾ, പാർലമെന്ററി വ്യാമോഹം തുടങ്ങിയ വിഷയങ്ങൾ സമഗ്രമായി വിലയിരുത്തുകയാണ് സർവേയുടെ ലക്ഷ്യം. വ്യക്തികേന്ദ്രീകൃതമായ പ്രവർത്തനശൈലി ഒഴിവാക്കി സംഘടനാ സംവിധാനത്തെ കൂടുതൽ ശക്തിപ്പെടുത്തുന്നതിനുള്ള നിർദേശങ്ങളും ഇതിലൂടെ തേടുന്നുണ്ട്.
സംഘടനാ ദൗർബല്യങ്ങളെക്കുറിച്ചുള്ള ആത്മപരിശോധനയ്ക്കൊപ്പം കൂട്ടായ നേതൃത്വവും ചർച്ചകളും ഉറപ്പാക്കേണ്ടതിന്റെ ആവശ്യകതയും സർവേയിൽ പ്രധാനമായി പരിഗണിക്കുന്നുണ്ട്. താഴെത്തട്ടിലെ സംഘടനാ സംവിധാനത്തിൽ മാത്രമല്ല, മേൽഘടകങ്ങളിലും ആവശ്യമായ തിരുത്തലുകൾ വരുത്താനാണ് പാർട്ടി ലക്ഷ്യമിടുന്നത്.
സർവേയിലൂടെ ലഭിക്കുന്ന അഭിപ്രായങ്ങളും വിലയിരുത്തലുകളും അടിസ്ഥാനമാക്കി പാർട്ടിയുടെ പ്രവർത്തനശൈലിയിൽ ആവശ്യമായ മാറ്റങ്ങൾ നിർദേശിക്കുന്ന പുതിയ രൂപരേഖ കേന്ദ്ര കമ്മിറ്റി തയ്യാറാക്കുമെന്നാണ് വിവരം. വ്യക്തികേന്ദ്രീകൃതമായ പ്രവർത്തനത്തിന് പകരം കൂട്ടായ നേതൃത്വത്തിനും സംഘടനാ ചർച്ചകൾക്കും പ്രാധാന്യം നൽകുന്ന കർശന മാർഗനിർദേശങ്ങൾ ഇതിൽ ഉൾപ്പെടുമെന്നാണ് സൂചന. പുതിയ മാർഗരേഖയുടെ അടിസ്ഥാനത്തിലായിരിക്കും തുടർന്നുള്ള പാർട്ടി പ്രവർത്തനങ്ങൾ ക്രമീകരിക്കുക.
