ന്യൂഡൽഹി: മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിനെതിരെ ഇന്ത്യ സഖ്യം ഇന്നു നടത്താനിരുന്ന പ്രതീകാത്മക ഇംപീച്ച്‌മെന്റ് നടപടികൾ തലസ്ഥാനത്തെ മഴയെ തുടർന്ന് ശനിയാഴ്ചത്തേക്ക് മാറ്റി. മുതിർന്ന നേതാക്കൾക്ക് മഴയത്ത് ഇരിക്കേണ്ടിവരുന്നത് ഒഴിവാക്കാനാണ് പരിപാടി മാറ്റിവച്ചതെന്ന് ലോക്‌സഭയിലെ പ്രതിപക്ഷ നേതാവ് രാഹുൽ ഗാന്ധി അറിയിച്ചു. കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ ഔദ്യോഗിക വസതിയിൽ ശനിയാഴ്ച ഉച്ചകഴിഞ്ഞ് മൂന്നിനാണ് പരിപാടി നടക്കുക.
മുൻ ലോക്‌സഭാ സ്പീക്കർ മീരാ കുമാറിന്റെ അധ്യക്ഷതയിൽ മൂന്ന് മണിക്കൂർ നീളുന്ന പ്രതീകാത്മക ഇംപീച്ച്‌മെന്റ് നടപടികളായിരുന്നു ഇന്ത്യ സഖ്യം ആസൂത്രണം ചെയ്തിരുന്നത്. ഗ്യാനേഷ് കുമാറിനെതിരെ ഖാർഗെ പ്രമേയം അവതരിപ്പിക്കുമെന്നും ലോക്‌സഭയിലെ പ്രതിപക്ഷ നേതാവ് രാഹുൽ ഗാന്ധി സമാപന പ്രസംഗം നടത്തുമെന്നുമായിരുന്നു നേരത്തെയുള്ള തീരുമാനം.
മുഖ്യ തിരഞ്ഞെടുപ്പ് കമ്മിഷണറുടെ പക്ഷപാതപരമായ പെരുമാറ്റത്തിലും വോട്ടർപട്ടിക പരിഷ്‌കരണ നടപടികളിലുമുള്ള അതൃപ്തി പ്രകടിപ്പിച്ച് പ്രതിപക്ഷം നടത്തുന്ന പ്രതിഷേധത്തിന്റെ ഭാഗമായാണ് പരിപാടി സംഘടിപ്പിക്കുന്നത്.ഗ്യാനേഷ് കുമാർ രാജിവയ്ക്കണമെന്നാണ് പ്രതിപക്ഷത്തിന്റെ പ്രധാന ആവശ്യം. വോട്ടർപട്ടികയുടെ പ്രത്യേക തീവ്ര പരിഷ്‌കരണമായ എസ്‌ഐആർ (SIR) നടപടിയിലൂടെ അർഹരായ നിരവധി വോട്ടർമാരുടെ പേരുകൾ വ്യാപകമായി നീക്കം ചെയ്തെന്ന ആരോപണവും പ്രതിപക്ഷം ഉയർത്തുന്നുണ്ട്.
സഖ്യകക്ഷി നേതാക്കൾക്കൊപ്പം നടത്തിയ വാർത്താസമ്മേളനത്തിലാണ് രാഹുൽ ഗാന്ധി പരിപാടി മാറ്റിവച്ച വിവരം അറിയിച്ചത്. മുതിർന്ന നേതാക്കൾ മഴയത്ത് ഇരിക്കുന്നത് ബുദ്ധിമുട്ടുണ്ടാക്കുമെന്നതിനാൽ പരിപാടി ശനിയാഴ്ച നടത്താൻ തീരുമാനിക്കുകയായിരുന്നുവെന്ന് അദ്ദേഹം പറഞ്ഞു.”മുതിർന്ന നേതാക്കൾക്ക് മഴയത്ത് ഇരിക്കുന്നത് അസൗകര്യമാകുമെന്ന് ഞങ്ങൾക്ക് തോന്നി. അതിനാൽ ഇതേ പരിപാടി നാളെ നടത്താൻ തീരുമാനിച്ചു,” രാഹുൽ ഗാന്ധി വ്യക്തമാക്കി.
അതുപോലെ ഞായറാഴ്ച രാംലീല മൈതാനിയിൽ നടക്കാനിരിക്കുന്ന പ്രതിപക്ഷ റാലിക്ക് മുന്നോടിയായി വോട്ട് മോഷണത്തിനെതിരായ പോരാട്ടത്തിൽ പ്രതിപക്ഷം ഒന്നിച്ചുനിൽക്കുകയാണെന്നും അദ്ദേഹം പറഞ്ഞു. പ്രധാനമന്ത്രി നരേന്ദ്ര മോദി, കേന്ദ്ര ആഭ്യന്തരമന്ത്രി അമിത് ഷാ, മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാർ എന്നിവർ ചേർന്ന് ഇന്ത്യൻ ജനാധിപത്യത്തെ തകർക്കുകയാണെന്നാരോപിച്ച രാഹുൽ ഗാന്ധി, അതിനെതിരായ പ്രതിഷേധത്തിൽ പങ്കെടുക്കാൻ രാഷ്ട്രീയ പാർട്ടികളോടും സിവിൽ സമൂഹ സംഘടനകളോടും പൊതുജനങ്ങളോടും ആഹ്വാനം ചെയ്തു. ഞായറാഴ്ചത്തെ റാലിയിൽ വൻതോതിൽ ആളുകൾ പങ്കെടുക്കണമെന്നും അദ്ദേഹം അഭ്യർഥിച്ചു.
റാലിയിൽ പങ്കെടുക്കാൻ ഡൽഹിയിലേക്ക് വരുന്നവരെ തടയാൻ അമിത് ഷാ ശ്രമിക്കുന്നുവെന്നും രാഹുൽ ഗാന്ധി ആരോപിച്ചു. ഉത്തർപ്രദേശ്, ബിഹാർ, മധ്യപ്രദേശ്, രാജസ്ഥാൻ, ഹരിയാന, തെലങ്കാന, പഞ്ചാബ് തുടങ്ങിയ സംസ്ഥാനങ്ങളിൽനിന്ന് എത്തുന്ന പാർട്ടി പ്രവർത്തകരെയും സാധാരണക്കാരെയും തടയുന്നതായാണ് ആരോപണം. “ഇനി രാംലീല മൈതാനിയിൽ എന്താണ് സംഭവിക്കുന്നതെന്ന് നിങ്ങൾ കാണുക. എത്രപേർ എത്തുന്നുവെന്നും എത്രപേരെ തടയാൻ അവർക്ക് കഴിയുന്നുവെന്നും നോക്കുക. അപ്പോൾ ഈ രാജ്യത്ത് എന്താണ് നടക്കുന്നതെന്ന് നിങ്ങൾക്ക് മനസ്സിലാകും,” രാഹുൽ ഗാന്ധി പറഞ്ഞു.
ലക്ഷക്കണക്കിന് വോട്ടർമാർക്ക് വോട്ടവകാശം നഷ്ടപ്പെടുന്നുവെന്ന ആരോപണത്തെച്ചൊല്ലി രാജ്യത്ത് വ്യാപകമായ രോഷവും വൈകാരികമായ വേദനയുമുണ്ടെന്നും അദ്ദേഹം അവകാശപ്പെട്ടു. വ്യവസായികളായ ഗൗതം അദാനിക്കും മുകേഷ് അംബാനിക്കും പ്രധാനമന്ത്രി നരേന്ദ്ര മോദിക്കും അമിത് ഷായ്ക്കും ആർഎസ്എസ് മേധാവി മോഹൻ ഭാഗവതിനും രാഷ്ട്രീയ നേട്ടമുണ്ടാക്കുന്നതിനായി വോട്ടുകൾ മോഷ്ടിക്കപ്പെടുകയാണെന്നും രാഹുൽ ആരോപിച്ചു. പ്രതിപക്ഷത്തിന്റെ വിവിധ പ്രതിഷേധങ്ങൾ വ്യത്യസ്തമായ സമരങ്ങളല്ലെന്നും ഒറ്റ പോരാട്ടത്തിന്റെ ഭാഗമാണെന്നും അദ്ദേഹം ആവർത്തിച്ചു.
“ഇത് പല പ്രതിഷേധങ്ങളല്ല. ഇതൊരു പ്രതിഷേധമാണ്. പ്രതിപക്ഷം മുഴുവൻ ഇവിടെ ഒന്നിച്ചുനിൽക്കുകയാണ്. പ്രതിഷേധിക്കാൻ ആഗ്രഹിക്കുന്ന ഏതൊരാൾക്കും ഇവിടെ വരാം,” രാഹുൽ ഗാന്ധി പറഞ്ഞു. ഭരണഘടനയെയും ഇന്ത്യ എന്ന ആശയത്തെയും വോട്ടവകാശത്തെയും സംരക്ഷിക്കാനാണ് പ്രതിപക്ഷം ഒന്നിച്ചുനിൽക്കുന്നതെന്നും അദ്ദേഹം കൂട്ടിച്ചേർത്തു. എല്ലാ ഇന്ത്യക്കാരുടെയും അഭിപ്രായം പ്രകടിപ്പിക്കുന്നതിനുള്ള മാർഗമാണ് വോട്ടെന്നും അതിനെ സംരക്ഷിക്കേണ്ടത് എല്ലാവരുടെയും ഉത്തരവാദിത്വമാണെന്നും രാഹുൽ വ്യക്തമാക്കി.
സമാജ്‌വാദി പാർട്ടി എംപി ധർമേന്ദ്ര യാദവും പരിപാടി മാറ്റിവയ്ക്കാനുള്ള തീരുമാനത്തിൽ എല്ലാ പാർട്ടികളും യോജിച്ചതായി അറിയിച്ചു. വോട്ട് മോഷണത്തിനെതിരായ പോരാട്ടത്തിൽ തന്റെ പാർട്ടി രാഹുൽ ഗാന്ധിക്കൊപ്പം ഉറച്ചുനിൽക്കുമെന്നും അദ്ദേഹം പറഞ്ഞു. ഞായറാഴ്ച നടക്കുന്ന റാലിയിൽ പാർട്ടി അധ്യക്ഷൻ അഖിലേഷ് യാദവ് പങ്കെടുക്കുമെന്നും ധർമേന്ദ്ര യാദവ് സ്ഥിരീകരിച്ചു.
തൃണമൂൽ കോൺഗ്രസ് നേതാവ് ഡെറക് ഒബ്രിയാനും പ്രതിപക്ഷ ഐക്യം ആവർത്തിച്ചു. പശ്ചിമ ബംഗാൾ മുഖ്യമന്ത്രി മമത ബാനർജിയെയും തൃണമൂൽ കോൺഗ്രസിനെയും പ്രതിനിധീകരിച്ചാണ് അദ്ദേഹം വാർത്താസമ്മേളനത്തിൽ പങ്കെടുത്തത്. സിപിഎം, സിപിഐ, ശിവസേന, ജാർഖണ്ഡ് മുക്തി മോർച്ച (ജെഎംഎം), രാഷ്ട്രീയ ജനതാദൾ (ആർജെഡി), ഇന്ത്യൻ യൂണിയൻ മുസ്‌ലിം ലീഗ് (ഐയുഎംഎൽ), ആർഎസ്പി തുടങ്ങിയ പാർട്ടികളുടെ നേതാക്കളുടെ സാന്നിധ്യവും അദ്ദേഹം ചൂണ്ടിക്കാട്ടി.
