കൊച്ചി: അഡിഷനൽ ജഡ്ജിയുടെ മകനായ പതിനേഴുകാരൻ അമിതവേഗത്തിലോടിച്ച കാറിടിച്ചു തട്ടുകടയുടമ മരിച്ച സംഭവത്തിൽ ജഡ്ജിയുടെ ഫ്ലാറ്റിൽ പോലീസ് പരിശോധന നടത്തി. ഇവിടെ നിന്നും ആഡംബര ബൈക്ക് പോലീസ് കസ്റ്റഡിയിലെടുത്തു. പതിനേഴുകാരൻ കാറിനു പുറമേ ബൈക്കും ഉപയോഗിച്ചിരുന്നതായി പോലീസ് പറയുന്നു. ഇതിനെ സാധൂകരിക്കുന്ന കൗമാരക്കാരൻ ബൈക്കിൽ പോകുന്ന സിസിടിവി ദൃശ്യങ്ങൾ ശേഖരിച്ചു.
അതേസമയം അന്വേഷണത്തിൽ വീഴ്ച വരുത്തിയതിനു 4 പോലീസ് ഉദ്യോഗസ്ഥരെ സർക്കാർ ഇന്നലെ സസ്പെൻഡ് ചെയ്തിരുന്നു. ചേരാനല്ലൂർ സിഐ കെ.എസ്. ശ്യാംകുമാർ, എസ്ഐ വി.എസ്. വിശ്വജിത്ത്, ഗ്രേഡ് എഎസ്ഐ കെ.ടി. മനോജ്, സീനിയർ സിപിഒ അരുൺ ജോഷി എന്നിവർക്കെതിരെയാണു നടപടിയുണ്ടായത്. അപകടമുണ്ടാക്കിയ പ്ലസ് വൺ വിദ്യാർഥിക്കു ജാമ്യം ലഭിക്കാനാകുന്ന വകുപ്പുകൾ ഉൾപ്പെടുത്തി ആദ്യം കേസെടുത്തതു ഗുരുതര വീഴ്ചയാണെന്ന് എഡിജിപി പി. വിജയൻ നൽകിയ റിപ്പോർട്ടിൽ പറയുന്നു.
ഇതിനിടെ അഡിഷനൽ ജഡ്ജിക്ക് സസ്പെൻഷനു മുന്നോടിയായി ഇന്ന് കാരണം കാണിക്കൽ നോട്ടിസ് നൽകും. പതിനേഴുകാരന് 25 വയസുവരെ ലൈസൻസ് നൽകില്ലെന്നും കാറിന്റെ രജിസ്ട്രേഷൻ സസ്പെൻഡ് ചെയ്യാൻ നടപടി തുടങ്ങിയെന്നും മോട്ടർ വാഹന വകുപ്പ് അറിയിച്ചു. ജഡ്ജിയെ സസ്പെൻഡ് ചെയ്യണമെന്നു കാട്ടി പോർട്ട്‌ഫോളിയോ ജഡ്ജ് ജസ്റ്റിസ് പി.വി. കുഞ്ഞിക്കൃഷ്ണൻ കഴിഞ്ഞ ദിവസം ചീഫ് ജസ്റ്റിസിനു കത്തു നൽകിയിരുന്നെങ്കിലും ഇന്നലെ തുടർനടപടികളുണ്ടായില്ല. കേസ് നടപടികളുമായി മുന്നോട്ടുപോകാമെന്നു ഹൈക്കോടതി പോലീസിനെ അറിയിച്ചു.
