പത്തനംതിട്ട: നാടോടി സ്ത്രീകൾ തമ്മിലുണ്ടായ വഴിക്കിനിടെ പുറത്തുവന്നത് ആരുമറിയാതെ അമ്മയും ആൺസുഹൃത്തും ചേർന്ന് നടത്തിയ കൊലപാതകം. മൂന്ന് വർഷം മുമ്പാണ് പത്തനംതിട്ടയിലെ പുളികീഴിൽ മൂന്ന് വയസുള്ള കുഞ്ഞിന്റെ മൃതദേഹം കണ്ടെത്തിത്. കുഞ്ഞിനെ തന്റെ സുഹൃത്ത് ശ്വാസം മുട്ടിച്ച് കൊന്നതെന്ന് അമ്മ മൊഴി നൽകി. മൂന്ന് വർഷങ്ങൾക്ക് ശേഷമാണ് കുഞ്ഞിന്റെ അമ്മയായ നാടോടി സ്ത്രീയെ പോലീസ് കണ്ടെത്തുന്നത്.
കഴിഞ്ഞയാഴ്ച പാലക്കാട് വെച്ച് നാടോടികളായ സ്ത്രീകൾ തമ്മിലുണ്ടായ വഴക്കിനിടയിൽ കുട്ടി മരിച്ചുപോയ വിവരം കുട്ടിയുടെ അമ്മയുടെ വാക്കുകളിലൂടെ പുറത്തുവരികയായിരുന്നു. വിവരമറിഞ്ഞ ഒരു ആക്ടിവിസ്റ്റ് പ്രശ്നത്തിൽ ഇടപെടുകയും തുടർന്ന് മീനാക്ഷിപുരം പോലീസ് അമ്മയെ കസ്റ്റഡിയിലെടുത്ത് ചോദ്യം ചെയ്യുകയുമായിരുന്നു. ഇതോടെയാണ് കൊലപാതകത്തിന്റെ ചുരുളഴിഞ്ഞത്.
ചെങ്ങന്നൂരിൽ വെച്ച് അമ്മയും സുഹൃത്തുമായുള്ള ബന്ധത്തിനിടയിൽ കുഞ്ഞ് കരഞ്ഞതിനെ തുടർന്ന് പ്രകോപിതനായ ആൺസുഹൃത്ത് കുട്ടിയെ ശ്വാസം മുട്ടിച്ച് കൊലപ്പെടുത്തുകയായിരുന്നു. തുടർന്ന് ആൺസുഹൃത്തിന്റെ സഹായത്തോടെ മൃതദേഹം പുളിക്കീഴിലെത്തിച്ച് ചതുപ്പിൽ കുഴിച്ചിട്ടുവെന്നാണ് അമ്മയുടെ മൊഴി. ഇതോടെ പ്രതികളായ ആൺസുഹൃത്തിനെയും സഹോദരനെയും കണ്ടെത്താൻ പോലീസ് അന്വേഷണം ഊർജിതമാക്കി.
