ന്യൂഡൽഹി: പ്രതിപക്ഷ നേതാവ് രാഹുൽ ഗാന്ധിയുടെ നേതൃത്വത്തിൽ ഇന്ത്യാ സഖ്യ നേതാക്കൾ സുപ്രീംകോടതിയിലേക്ക് മാർച്ച് നടത്തി, കോടതി വളപ്പിൽ പ്രതിഷേധിച്ച സംഭവത്തിൽ രൂക്ഷമായ വിമർശനങ്ങളുമായി സുപ്രീംകോടതി. ‘നീതിന്യായ വ്യവസ്ഥയെ ആർക്കും സമ്മർദത്തിലാക്കാനോ ഭീഷണിപ്പെടുത്താനോ കഴിയില്ല’ എന്ന് ചീഫ് ജസ്റ്റിസ് സൂര്യകാന്ത് വ്യക്തമാക്കി. വോട്ടർപട്ടികയിലെ പ്രത്യേക തീവ്രപരിഷ്‌കരണമായ (എസ്ഐആർ) നടപടികളുമായി ബന്ധപ്പെട്ട് തിരഞ്ഞെടുപ്പ് കമ്മിഷന്റെ പ്രവർത്തനങ്ങളെ ചോദ്യം ചെയ്ത് രാഹുൽ ഗാന്ധിയും ഇന്ത്യാ സഖ്യത്തിലെ മറ്റ് നേതാക്കളും സമർപ്പിച്ച ഹർജികൾ പരിഗണിക്കവെയാണ് കോടതിയുടെ നിരീക്ഷണം.
ഹർജികളിൽ തിരഞ്ഞെടുപ്പ് കമ്മിഷൻ, മുഖ്യ തിരഞ്ഞെടുപ്പ് കമ്മിഷണർ, മറ്റ് രണ്ട് തിരഞ്ഞെടുപ്പ് കമ്മിഷണർമാർ എന്നിവർക്ക് സുപ്രീംകോടതി നോട്ടീസ് അയച്ചു. എന്നാൽ ഹർജിയിൽ നോട്ടീസ് അയച്ചതുകൊണ്ട് രാഷ്ട്രീയ നേതാക്കളുടെ പെരുമാറ്റത്തെ കോടതി അംഗീകരിക്കുന്നുവെന്ന് അർഥമില്ലെന്നും ചീഫ് ജസ്റ്റിസ് വ്യക്തമാക്കി.
‘ഞങ്ങൾ നോട്ടീസ് അയയ്ക്കാം. എന്നാൽ അടുത്ത വാദം കേൾക്കുമ്പോൾ അദ്ദേഹത്തിന്റെ പെരുമാറ്റത്തെക്കുറിച്ച് അറിയാൻ ആഗ്രഹിക്കുന്നു,’ ചീഫ് ജസ്റ്റിസ് സൂര്യകാന്ത് പറഞ്ഞു. കോടതിയുടെ നടപടികളിൽ രാഷ്ട്രീയ പ്രതിഷേധം ഇടപെടുന്ന സാഹചര്യം അംഗീകരിക്കാനാകില്ലെന്ന നിലപാടും അദ്ദേഹം വ്യക്തമാക്കി. സുപ്രീംകോടതി വളപ്പിലെ പ്രതിഷേധവുമായി ബന്ധപ്പെട്ട വിഷയം സോളിസിറ്റർ ജനറൽ തുഷാർ മേത്തയും അഭിഭാഷകൻ ഗൗരവ് ഭാട്ടിയയും ഉന്നയിച്ചതിന് പിന്നാലെയായിരുന്നു കോടതിയുടെ നിരീക്ഷണങ്ങൾ. സുപ്രീംകോടതിയിൽ രാഷ്ട്രീയ മാർച്ചും പ്രതിഷേധവും നടക്കുന്നത് അംഗീകരിക്കാനാകില്ലെന്ന് ഗൗരവ് ഭാട്ടിയ ചൂണ്ടിക്കാട്ടി. സുപ്രീംകോടതിയിൽ സംഭവിച്ചത് ഒരിക്കലും സംഭവിക്കാൻ പാടില്ലാത്തതായിരുന്നുവെന്നും അദ്ദേഹം പറഞ്ഞു.
കോടതിയെ സമ്മർദത്തിലാക്കാനുള്ള ശ്രമമായിരുന്നു മാർച്ചും പ്രതിഷേധവുമെന്ന ഭാട്ടിയയുടെ വാദത്തോട് പ്രതികരിച്ച ചീഫ് ജസ്റ്റിസ്, ഇത്തരം ശ്രമങ്ങളെ ദുർബലമായ നീക്കങ്ങളെന്നാണ് വിശേഷിപ്പിച്ചത്. ‘നീതിന്യായ വ്യവസ്ഥയെ ആർക്കും സമ്മർദത്തിലാക്കാനാകില്ല. ഇതൊക്കെ ദുർബലമായ ശ്രമങ്ങളാണ്. ആരും അതിന് വലിയ പ്രാധാന്യം നൽകുന്നില്ല. കോടതിക്ക് പുറത്ത് പലരും പല പ്രസ്താവനകളും നടത്താറുണ്ട്. ഞങ്ങൾ ആനക്കൊമ്പുകൊണ്ടുള്ള ഗോപുരത്തിൽ ഇരിക്കുന്നവരല്ല. പുറത്തു നടക്കുന്ന കാര്യങ്ങളെക്കുറിച്ച് ഞങ്ങൾക്കും അറിയാം,’ ചീഫ് ജസ്റ്റിസ് നിരീക്ഷിച്ചു.
എസ്ഐആറുമായി ബന്ധപ്പെട്ട ക്രമക്കേടുകൾ ആരോപിച്ച് രാഹുൽ ഗാന്ധി, അഖിലേഷ് യാദവ് തുടങ്ങിയ നേതാക്കൾ സുപ്രീംകോടതിയിലേക്ക് നടത്തിയ മാർച്ചിനെ ചോദ്യം ചെയ്തുള്ള മറ്റൊരു ഹർജിയിലും കോടതി നോട്ടീസ് അയച്ചു. പ്രതിഷേധം നടന്ന സമയത്തെ സുപ്രീംകോടതി വളപ്പിലെ സിസിടിവി ദൃശ്യങ്ങൾ സംരക്ഷിച്ചുവയ്ക്കാനും കോടതി നിർദേശിച്ചു. അതേസമയം ഒക്ടോബർ 12 തിങ്കളാഴ്ചയാണ് രാഹുൽ ഗാന്ധിയുടെ നേതൃത്വത്തിൽ ഇന്ത്യാ സഖ്യ നേതാക്കൾ മാർച്ച് നടത്തിയത്. മധ്യ ഡൽഹിയിലെ ബരാഖംബ റോഡിൽനിന്ന് ആരംഭിച്ച മാർച്ച് സുപ്രീംകോടതിയിൽ അവസാനിക്കുകയായിരുന്നു. മാർച്ചിനെത്തുടർന്ന് കോടതി സമുച്ചയത്തിനുള്ളിൽ വലിയ ജനക്കൂട്ടം രൂപപ്പെട്ടിരുന്നു.
ഇതിനുമുമ്പ് എസ്ഐആർ നടപടികളെയും തിരഞ്ഞെടുപ്പ് കമ്മിഷന്റെ പ്രവർത്തനങ്ങളെയും കുറിച്ച് ചർച്ച ചെയ്യാൻ കൂടിക്കാഴ്ച അനുവദിക്കണമെന്ന രാഹുൽ ഗാന്ധിയുടെ ആവശ്യം ചീഫ് ജസ്റ്റിസ് സൂര്യകാന്ത് നിരസിച്ചിരുന്നു. ഈ വിഷയങ്ങൾ സുപ്രീംകോടതിയുടെ പരിഗണനയിലായതിനാൽ പ്രത്യേക കൂടിക്കാഴ്ച ആവശ്യമില്ലെന്നായിരുന്നു അദ്ദേഹത്തിന്റെ നിലപാട്. സർക്കാരിന്റെ ഭരണപരമായ പ്രവർത്തനങ്ങളിൽ കോടതി നേരിട്ട് ഇടപെടാനാകില്ലെന്നും എന്നാൽ ആവശ്യമായ പരിഹാരങ്ങൾ തേടി നേതാക്കൾക്ക് കോടതിയുടെ നീതിന്യായ അധികാരപരിധിയിൽ ഹർജി സമർപ്പിക്കാമെന്നും ചീഫ് ജസ്റ്റിസ് വ്യക്തമാക്കിയിരുന്നു.
തിരഞ്ഞെടുപ്പ് കമ്മിഷന്റെ പ്രവർത്തനങ്ങളെ ചോദ്യം ചെയ്തുള്ള ഹർജിയിൽ കോൺഗ്രസ് അധ്യക്ഷൻ മല്ലികാർജുൻ ഖാർഗെ, തൃണമൂൽ കോൺഗ്രസ് എംപി സൗഗത റോയ്, സമാജ്‌വാദി പാർട്ടി നേതാവ് അഖിലേഷ് യാദവ്, ആർജെഡി നേതാവ് തേജസ്വി പ്രസാദ് യാദവ്, എൻസിപി (എസ്പി) നേതാവ് സുപ്രിയ സുലെ, ശിവസേന (യുബിടി) നേതാവ് സഞ്ജയ് റാവത്ത്, സിപിഐ നേതാവ് ഡി. രാജ, ജാർഖണ്ഡ് മുക്തി മോർച്ച നേതാവ് മഹുവ മാജി, സിപിഎം നേതാവ് എം.എ. ബേബി, ഇന്ത്യൻ യൂണിയൻ മുസ്‌ലിം ലീഗ് നേതാവ് ഇ.ടി. മുഹമ്മദ് ബഷീർ എന്നിവരും പങ്കെടുത്തിരുന്നു.
എസ്ഐആറുമായി ബന്ധപ്പെട്ട എല്ലാ രേഖകളും ഹാജരാക്കാൻ തിരഞ്ഞെടുപ്പ് കമ്മിഷന് നിർദേശം നൽകുക, എസ്ഐആർ സംബന്ധിച്ച തീരുമാനങ്ങളുടെ ഭരണഘടനാ സാധുത പരിശോധിക്കുക, ഉത്തരവാദികളായ ഉദ്യോഗസ്ഥർക്കെതിരെ നടപടിയെടുക്കുക, ഹർജിക്കാരുടെ പരാതികൾക്ക് പരിഹാരം കാണുക, സ്വതന്ത്ര സമിതിയെ നിയോഗിച്ച് നടപടികൾ ഓഡിറ്റ് ചെയ്യുക തുടങ്ങിയ പത്ത് ആവശ്യങ്ങളാണ് ഇന്ത്യാ സഖ്യം ഹർജിയിൽ ഉന്നയിച്ചിരിക്കുന്നത്. എസ്ഐആർ നടപടികളുമായി ബന്ധപ്പെട്ട് തിരഞ്ഞെടുപ്പ് കമ്മിഷനെതിരെ പ്രതിപക്ഷം ഉന്നയിക്കുന്ന ആരോപണങ്ങൾ സുപ്രീംകോടതിയുടെ പരിഗണനയിലിരിക്കെയാണ് കോടതി വളപ്പിലെ പ്രതിഷേധത്തെച്ചൊല്ലിയുള്ള തർക്കവും ശക്തമാകുന്നത്.
