തിരുവനന്തപുരം: മൂന്നുപേരുടെ മരണത്തിനിടയാക്കിയ നെടുമ്പാശ്ശേരി അപകടവുമായി ബന്ധപ്പെട്ട പോലീസ് നടപടികളിൽ ഉയർന്ന വിവാദങ്ങൾക്ക് നിയമസഭയിൽ വിശദീകരണവുമായി ആഭ്യന്തര മന്ത്രി രമേശ് ചെന്നിത്തല. കേസിൽ ഒരു വിട്ടുവീഴ്ചയും ഉണ്ടാകില്ലെന്നും കുറ്റക്കാർക്ക് പരമാവധി ശിക്ഷ ഉറപ്പാക്കാൻ സർക്കാർ നടപടി സ്വീകരിക്കുമെന്നും അദ്ദേഹം വ്യക്തമാക്കി.
എഫ്‌ഐആറിൽ പ്രതിയുടെ പേര് ഉൾപ്പെടുത്താതിരുന്നത് സംബന്ധിച്ച് മുഖ്യമന്ത്രിയും തന്നോട് വിശദീകരണം തേടിയിരുന്നുവെന്ന് ചെന്നിത്തല പറഞ്ഞു. പ്രതിപക്ഷ നേതാവ് പിണറായി വിജയന്റെ ചോദ്യത്തിന് മറുപടി നൽകുകയായിരുന്നു അദ്ദേഹം.
അപകടത്തിൽ മരിച്ചവരുടെ സഹപ്രവർത്തകൻ നൽകിയ മൊഴിയുടെ അടിസ്ഥാനത്തിലാണ് എഫ്‌ഐആർ രജിസ്റ്റർ ചെയ്തത്. ആ ഘട്ടത്തിൽ പ്രതിയുടെ പേര് അറിയാത്തതിനാൽ വാഹനം ഓടിച്ചയാൾ എന്ന രീതിയിലാണ് എഫ്‌ഐആറിൽ രേഖപ്പെടുത്തിയതെന്നും പിന്നീട് ശേഖരിച്ച വിവരങ്ങളുടെ അടിസ്ഥാനത്തിൽ തയ്യാറാക്കിയ റിമാൻഡ് റിപ്പോർട്ടിൽ ഒന്നാം പ്രതിയുടെ പേരും വിവരങ്ങളും ഉൾപ്പെടുത്തിയിട്ടുണ്ടെന്നും മന്ത്രി വിശദീകരിച്ചു.
പ്രതി മദ്യപിച്ചിരുന്നതായി എഫ്‌ഐആറിൽ ആദ്യം രേഖപ്പെടുത്താത്തതിനെക്കുറിച്ചും അദ്ദേഹം വിശദീകരണം നൽകി. പരാതിക്കാരന്റെ മൊഴിയുടെ അടിസ്ഥാനത്തിലാണ് ആദ്യം കേസെടുത്തത്. തുടർന്ന് നടത്തിയ വൈദ്യപരിശോധനയിൽ മദ്യപിച്ചതായി സ്ഥിരീകരിച്ചതോടെയാണ് ഈ വിവരം കേസിൽ ഉൾപ്പെടുത്തിയതെന്നും ചെന്നിത്തല പറഞ്ഞു.
പ്രതിയെ ബോസ്റ്റൽ സ്കൂളിലേക്ക് മാറ്റിയതുമായി ബന്ധപ്പെട്ട വിവാദത്തിലും മന്ത്രി നിലപാട് വ്യക്തമാക്കി. നിലവിലെ ജയിൽ ചട്ടപ്രകാരം 18 മുതൽ 21 വയസ്സുവരെയുള്ള പ്രതികളെ ബോസ്റ്റൽ സ്കൂളിലേക്ക് അയക്കാമെന്നും ഇക്കാര്യത്തിൽ തീരുമാനമെടുത്തത് കോടതിയാണെന്നും അദ്ദേഹം പറഞ്ഞു. നിയമത്തിൽ മാറ്റം ആവശ്യമാണെങ്കിൽ അത് ഗൗരവമായി ചർച്ച ചെയ്യാമെന്നും കൂട്ടിച്ചേർത്തു.
അപകടത്തിന് പിന്നാലെ പ്രചരിച്ച അഭ്യൂഹങ്ങൾ ഒഴിവാക്കണമെന്നും കുറ്റക്കാർക്കെതിരെ നിയമാനുസൃതമായ നടപടികൾ സ്വീകരിക്കുമെന്നും മന്ത്രി ഉറപ്പുനൽകി. സംഭവത്തിന്റെ പേരിൽ നടന്ന വർഗീയ പ്രചാരണങ്ങളെ മനുഷ്യത്വരഹിതമെന്ന് വിശേഷിപ്പിച്ച അദ്ദേഹം, കേരളത്തിൽ മദ്യപിച്ച് വാഹനമോടിക്കുന്നത് തടയാൻ നടപടികൾ സ്വീകരിക്കുമെന്നും വ്യക്തമാക്കി.
