ധാക്ക: ബംഗ്ലാദേശിൽ മൈമെൻസിങ് ജില്ലയിലെ ബെഗുൻബാരി മേഖലയിൽ സ്ലൂയിസ് ഗേറ്റിന് സമീപം വെള്ളത്തിൽ ഒഴുകിനിന്ന ഡ്രമ്മിനുള്ളിൽ 50 കാരന്റെ മൃതദേഹം കണ്ടെത്തി. വ്യാപാരിയായ നിരഞ്ജൻ ചന്ദ്ര സൂത്രധാറാണ് കൊല്ലപ്പെട്ടത്. മൈമെൻസിങ്ങിലെ ആതർബാരി ബിൽഡിങ് പ്രദേശത്ത് പങ്കാളിത്ത ഉടമസ്ഥതയിലുള്ള ആഭരണക്കട നടത്തിയിരുന്നയാളാണ് നിരഞ്ജൻ. ഇയാളെ കൊലപ്പെടുത്തിയതാരാണെന്നും കൊലപാതകത്തിന് പിന്നിലെ കാരണം എന്താണെന്നും ഇതുവരെ കണ്ടെത്താനായിട്ടില്ല. വെള്ളിയാഴ്ച വരെ കേസിൽ ആരെയും അറസ്റ്റ് ചെയ്തിട്ടില്ലെന്ന് ബംഗ്ലാദേശിലെ പ്രമുഖ ബംഗാളി ദിനപത്രമായ ദ ഡെയ്ലി ഇറ്റെഫാഖ് റിപ്പോർട്ട് ചെയ്തു.
കൊത്വാലി മോഡൽ പോലീസ് സ്റ്റേഷൻ ഒ.സി മുഹമ്മദ് ഷിബിറുൽ ഇസ്ലാമിന്റെ നേതൃത്വത്തിലുള്ള പോലീസ് സംഘം മൃതദേഹം പരിശോധിച്ചതിൽ നിന്ന് തലയും നെഞ്ചും മൂർച്ചയേറിയ ആയുധം ഉപയോഗിച്ച് ആക്രമിച്ചതിന്റെ പാടുകൾ കണ്ടെത്തിയിട്ടുണ്ട്. നിരഞ്ജനെ കൊലപ്പെടുത്തിയ ശേഷം മൃതദേഹം ഒരു ഡ്രമ്മിനുള്ളിലാക്കി വെള്ളത്തിൽ ഉപേക്ഷിച്ചതാകാമെന്നാണ് പോലീസിന്റെ പ്രാഥമിക നിഗമനം.
അതേസമയം മൃതശരീരത്തിന്റെ പാന്റിന്റെ പോക്കറ്റിൽ നിന്ന് മൈമെൻസിങ് ഹിന്ദു കോഓപ്പറേറ്റീവ് ക്രെഡിറ്റ് യൂണിയൻ ലിമിറ്റഡ് നൽകിയ ടോക്കൺ കണ്ടെത്തിയതാണ് ആളെ തിരിച്ചറിയാൻ പോലീസിനെ നയിച്ചത്. ടോക്കൺ ലഭിച്ചതിനെ തുടർന്ന് പോലീസ് സ്ഥാപനവുമായി ബന്ധപ്പെടുകയായിരുന്നു. ടോക്കൺ പരിശോധിച്ച സ്ഥാപനത്തിലെ ജീവനക്കാർ മൃതദേഹം നിരഞ്ജൻ ചന്ദ്രയുടേതാണെന്ന് തിരിച്ചറിഞ്ഞു. പിന്നീട് ഭാര്യ സുമിത റാണി സൂത്രധാറും മകൻ ജോയ് സൂത്രധാറും മൃതദേഹം തിരിച്ചറിഞ്ഞു.
Related Post
കഴിഞ്ഞ ദിവസമാണു ബെഗുൻബാരി മേഖലയിലെ സ്ലൂയിസ് ഗേറ്റിന് സമീപം വെള്ളത്തിൽ ഒരു ഡ്രം ഒഴുകിനടക്കുന്നത് പ്രദേശവാസികളുടെ ശ്രദ്ധയിൽപ്പെട്ടത്. തുടർന്ന് ഇവർ വിവരം പോലീസിനെ അറിയിച്ചതിനെ തുടർന്ന് ബുധനാഴ്ച രാവിലെ പേലീസ് സ്ഥലത്തെത്തി ഡ്രം പുറത്തെടുത്ത് പരിശോധിക്കുകയായിരുന്നു.
മൃതശരീരത്തിൽ കണ്ടെത്തിയ പരെക്കുകളുടെ സ്വഭാവം കണക്കിലെടുത്ത് കൊലപാതകത്തിന് മൂർച്ചയേറിയ ആയുധം ഉപയോഗിച്ചിരിക്കാമെന്നാണ് പോലീസ് സംശയിക്കുന്നത്. എന്നാൽ കൊലപാതകത്തിന്റെ കൃത്യമായ കാരണം വ്യക്തമല്ല. സംഭവവുമായി ബന്ധപ്പെട്ട് അന്വേഷണം പുരോഗമിക്കുകയാണ്. അതേസമയം, നിരഞ്ജൻ ചന്ദ്ര സൂത്രധാറിന്റെ കൊലപാതകത്തിന് പിന്നിലെ യഥാർഥ കാരണം കണ്ടെത്താനും പ്രതികളെ പിടികൂടാനുമുള്ള അന്വേഷണം പൊലീസ് ശക്തമാക്കിയിട്ടുണ്ട്.
