കൊല്ലം: ലോക്കപ്പ് പൂട്ടാൻ പൊലീസുകാർ മറന്നതോടെ കഞ്ചാവ് കേസ് പ്രതി കൊല്ലം റെയിൽവേ പൊലീസ് സ്റ്റേഷനിൽനിന്ന് ചാടിപ്പോയി. അഷ്ടമുടി കൽപ്പടിക്കൽ സ്വദേശി അബ്ദുൽ സലാമാണ് രക്ഷപ്പെട്ടത്. മോഷണം, കഞ്ചാവ് കടത്തൽ തുടങ്ങിയ കേസുകളിൽ പ്രതിയായ ഇയാൾക്കായി പൊലീസ് തിരച്ചിൽ തുടരുകയാണ്. കൊല്ലം റെയിൽവേ പൊലീസ് സ്റ്റേഷന്റെ ഔദ്യോഗിക വിവരങ്ങൾ കേരള പൊലീസിന്റെ സൈറ്റിലും ലഭ്യമാണ്.
ഈ മാസം ജില്ലയിൽ ലോക്കപ്പ് പൂട്ടാൻ മറന്നതിനെ തുടർന്ന് പ്രതി രക്ഷപ്പെടുന്ന രണ്ടാമത്തെ സംഭവമാണിത്. സെപ്റ്റംബർ മൂന്നിന് മോഷണക്കേസിൽ കരുതൽ കസ്റ്റഡിയിലെടുത്ത എഴുകോൺ പുത്തൻനട സ്വദേശി വൈജേഷ് (23) കുണ്ടറ പൊലീസ് സ്റ്റേഷനിലെ ലോക്കപ്പിൽനിന്ന് രക്ഷപ്പെട്ടിരുന്നു. ലോക്കപ്പ് തുറന്ന് പുറത്തിറങ്ങിയ വൈജേഷിനായി മൂന്ന് ദിവസം നീണ്ട തിരച്ചിലിനൊടുവിലാണ് പൊലീസ് പിടികൂടിയത്.
ആ സംഭവം നടന്ന് ആഴ്ചകൾ പിന്നിടുന്നതിനിടെയാണ് വീണ്ടും സമാനമായ സംഭവം റിപ്പോർട്ട് ചെയ്യുന്നത്. ലോക്കപ്പ് പൂട്ടുന്നതിൽ പൊലീസിന്റെ ഭാഗത്തുണ്ടായ വീഴ്ചയാണ് പ്രതി രക്ഷപ്പെടാൻ ഇടയാക്കിയതെന്നാണ് വിവരം.
Related Post
