കൊച്ചി: നിയമം ദുർബലമല്ലെന്നും എത്ര ഉന്നത പദവിയിലിരിക്കുന്നവരായാലും വിവേചനമില്ലാതെ നിയമം നടപ്പാക്കപ്പെടുമെന്നും ഹൈക്കോടതി. അനധികൃത സ്വത്ത് സമ്പാദനക്കേസിൽ കോട്ടയം വിജിലൻസ് കോടതി വിധിച്ച നാലുവർഷത്തെ തടവുശിക്ഷ ചോദ്യം ചെയ്ത് മുൻ ഡിജിപി ടോമിൻ ജെ. തച്ചങ്കരി നൽകിയ അപ്പീൽ പരിഗണിക്കവെയാണ് ജസ്റ്റിസ് എ. ബദറുദ്ദീൻ വാക്കാൽ ഇക്കാര്യം വ്യക്തമാക്കിയത്.
കോട്ടയം വിജിലൻസ് കോടതി വിധിച്ച നാലുവർഷത്തെ തടവും 30.84 ലക്ഷം രൂപ പിഴയും മരവിപ്പിച്ച് അപ്പീൽ തീർപ്പാകുന്നതുവരെ ജാമ്യം അനുവദിക്കണമെന്നാണ് തച്ചങ്കരിയുടെ ആവശ്യം. ഹർജിയിൽ വിശദമായ മറുപടി സത്യവാങ്മൂലം സമർപ്പിക്കാൻ സംസ്ഥാന വിജിലൻസ് സമയം ആവശ്യപ്പെട്ടു. തുടർന്ന് സെപ്റ്റംബർ 24നകം മറുപടി നൽകാൻ സർക്കാരിന് കോടതി സമയം അനുവദിച്ചു.
സാധാരണ കേസല്ലാത്തതിനാൽ തച്ചങ്കരിയുടെ ഹർജിയിൽ തടസവാദം ഉന്നയിക്കാൻ അവസരം വേണമെന്നായിരുന്നു വിജിലൻസിന്റെ നിലപാട്. എന്നാൽ ക്രിമിനൽ നടപടിക്രമത്തിലെ വകുപ്പ് 389 പ്രകാരം പത്ത് വർഷത്തിൽ താഴെ ശിക്ഷ ലഭിച്ച കേസുകളിൽ പ്രോസിക്യൂഷന് രേഖാമൂലം മറുപടി സത്യവാങ്മൂലം സമർപ്പിക്കാൻ പ്രത്യേക അവകാശമില്ലെന്ന് തച്ചങ്കരിയുടെ അഭിഭാഷകൻ വാദിച്ചു. ഇത്രയും പഴക്കമുള്ള കേസിൽ ഇത്തരത്തിൽ സമയം ആവശ്യപ്പെടുന്നത് ആദ്യമായാണെന്നും സമയം നീട്ടി നൽകരുതെന്നും അഭിഭാഷകൻ ആവശ്യപ്പെട്ടു.
Related Post
നിയമത്തിൽ രേഖാമൂലമുള്ള തടസവാദം സമർപ്പിക്കുന്നതിന് വിലക്കില്ലെന്നും അസാധാരണ സാഹചര്യങ്ങളിൽ പ്രോസിക്യൂഷന് മറുപടി നൽകാൻ കോടതിക്ക് വിവേചനാധികാരം ഉപയോഗിച്ച് സമയം അനുവദിക്കാമെന്നും ജസ്റ്റിസ് ബദറുദ്ദീൻ വ്യക്തമാക്കി. “എല്ലാ ഡിജിപിമാർക്കും ചീഫ് സെക്രട്ടറിമാർക്കും എന്തിന് മുഖ്യമന്ത്രിമാർക്കും പ്രധാനമന്ത്രിമാർക്കും വരെയുള്ള സന്ദേശമാണിത്. നിയമവും നിയമപുസ്തകങ്ങളും അത്ര ദുർബലമല്ല; അതുകൊണ്ട് എത്ര ഉയർന്ന പദവിയിലുള്ളവരായാലും അവരുടെ പദവി നോക്കാതെ, യാതൊരു വിവേചനവുമില്ലാതെ നിയമം നടപ്പിലാക്കപ്പെടും” എന്നായിരുന്നു കോടതിയുടെ വാക്കുകൾ.
തുടർന്ന് വിജിലൻസിന്റെ മറുപടി സത്യവാങ്മൂലം സമർപ്പിക്കുന്നതിനായി കേസ് സെപ്റ്റംബർ 24ലേക്ക് മാറ്റി. ശിക്ഷ മരവിപ്പിച്ച് ഇടക്കാല ജാമ്യം അനുവദിക്കണമെന്ന തച്ചങ്കരിയുടെ ആവശ്യത്തിൽ കോടതി ഈ ഘട്ടത്തിൽ ഇടക്കാല ഉത്തരവ് പുറപ്പെടുവിച്ചില്ല.
2003 മുതൽ 2007 വരെയുള്ള കാലയളവിൽ ഔദ്യോഗിക പദവിയിലിരിക്കെ വരുമാനത്തിൽ കവിഞ്ഞ് സ്വത്ത് സമ്പാദിച്ചെന്ന കേസിലാണ് തച്ചങ്കരിയെ കോട്ടയം വിജിലൻസ് കോടതി കുറ്റക്കാരനെന്ന് കണ്ടെത്തി നാലുവർഷത്തെ തടവിനും 30.84 ലക്ഷം രൂപ പിഴയ്ക്കും ശിക്ഷിച്ചത്.
ബ്രസീൽ ഫുട്ബോൾ ഇതിഹാസം റൊണാൾഡീഞ്ഞോ കൊച്ചിയിൽ; പ്രതിരോധ കുത്തിവെപ്പ് സർട്ടിഫിക്കറ്റിൽ ആശയക്കുഴപ്പം