തിരുവനന്തപുരം: ശബരിമലയിൽ കന്നി മാസ പൂജയ്‌ക്കെത്തിയ ഭക്തർക്ക് അരവണയും അപ്പവും ലഭിക്കാതിരുന്നതിൽ കടുത്ത അതൃപ്തി പ്രകടിപ്പിച്ച് ദേവസ്വം മന്ത്രി കെ. മുരളീധരൻ രംഗത്ത്. ശബരിമല നട തുറന്നാൽ ഭക്തർക്ക് അരവണ പ്രസാദം ലഭിക്കണം, എന്നാൽ അതിനായി യാതൊരു മുന്നൊരുക്കവും ദേവസ്വം ബോർഡ് ചെയ്തില്ലെന്നും മന്ത്രി പ്രതികരിച്ചു. ഈ പ്രതിസന്ധി പരിഹരിക്കാൻ ഒരു സ്‌പെഷൽ ടീമിനെ വച്ച് ഉത്സവം നടത്തണോ എന്ന കാര്യം മുഖ്യമന്ത്രിയുമായി കൂടിയാലോചിക്കുമെന്നു മന്ത്രി പറഞ്ഞു.
നട തുറന്നിരിക്കുമ്പോൾ ഭക്തർക്ക് പ്രസാദം ലഭിക്കണം. അതിന്റെ പൂർണ ഉത്തരവാദിത്തം ദേവസ്വം ബോർഡിനാണ്. ഇനിയൊരു പരീക്ഷണത്തിന് ഇല്ലെന്നും മന്ത്രി പറഞ്ഞു. അതേസമയം ശബരിമലയിൽ നിലവിൽ 5000 ടിൻ അരവണമാത്രമാണ് ബാക്കിയുള്ളത്. ഇന്നു മാത്രം ദർശനത്തിനായി 15000 ത്തോളം പേർ എത്തിയിട്ടുണ്ടെന്നും റിപ്പോർട്ടുകൾ പറയുന്നു.
